36
Elihu ni Cathut hawinae a pâpho
1 Elihu ni hettelah bout a dei,
2 Na ngaithoum awh ei,
na hmusak awh han rah.
Cathut yueng lah lawk dei hane ka tawn rah.
3 Ka panuenae hah ahlanae koe e ka la han rah,
lannae hah kasakkung koe kamnue sak han.
4 Bangkongtetpawiteh, ka lawknaw heh ayawmyin lah khoeroe ao hoeh dawkvah,
panuenae kuep katawnkung teh nang koe ao.
5 Khenhaw! Cathut teh a thasai eiteh, apihai dudam hoeh.
Ama teh athao teh thonae thaipanueknae hoi a kawi
6 Tamikathoutnaw hah pâhlung hoeh.
Hateiteh, hnephnap e naw hah lannae a poe.
7 Tamikalan teh khen laipalah awm hoeh,
hateiteh, siangpahrang hah bawitungkhung dawk yungyoe hanelah a tahung sak teh,
ahnimouh teh tawmrasang e lah ao awh.
8 Puenghoi kacaklah katek e lah o awh teh,
rucat khangnae rui hoi katek e lah awm boipawiteh,
9 Kâtapoenae hoi a sak e hah
lungpata lahoi sakyoenae hoi a kamnue sak.
10 Cangkhainae koelah hna a ang sak teh,
yonnae dawk hoi bout a ban nahane kâ a poe.
11 Lawkngai laihoi amae thaw tawk awh pawiteh,
hnopai tawnta e dawk nawm awh vaiteh,
hnin, thapa, kum naw hah lunghawinae hoi a loum sak han.
12 Hateiteh, lawkngai awh hoeh pawiteh,
tahloi hoi kahmat ka ta awh vaiteh,
panuenae tawn laipalah due awh han.
13 Hateiteh, tamikathout e lungthin ni lungkhueknae a pâtung teh,
ama ni a katek torei teh, kabawpnae hei hanelah hram awh hoeh.
14 A nawca nah a due awh teh,
a hringnae hah tami kahawihoehnaw hoi rei a pout.
15 Ama ni tami ka roedeng hah reithainae thung hoi a hlout sak.
Hnephnapnaw hno lahoi a hnâ a ang sak.
16 Takithopoung e kângairunae thung hoi ama ni a hlout sak han.
Khori kaawm hoeh e, hmuen kakawpoung koe,
tawntanae dawk a kâenkhai han,
na caboi teh tawntanae hoi kawi vaiteh a poum sak han.
17 Hateiteh, tamikathoutnaw ni hmu han kamcu e lawkcengnae hoi,
na kâvan teh, lawkcengnae hoi lannae ni na kuet.
18 Lungkhueknae ao dawkvah, kâhruetcuet.
Nahoeh pawiteh, vai touh hemnae dawk ama ni na cetkhai payon vaih.
Bangkongtetpawiteh, ratangnae kalen poung ni na hlout nahane na kabawm mahoeh.
19 Na tawntanae hoi na thaonae, na bahu onae pueng ni,
na kângairunae dawk hoi na hlout sak han na maw.
20 Karum hah kâuepkhai hanh.
Taminaw karum dawk kahmanae tueng lah ao.
21 Yonnae dawkvah kamlang hoeh nahanlah kâhruetcuet,
bangkongtetpawiteh, reithai khangnae hlak hai na kârawi e lah ao.
22 Khenhaw! Cathut teh hnotithainae dawk hoi tawmrasang e lah ao.
Apinimaw ama patetlah a cangkhai boi.
23 Apinimaw a lamthung hah a poukkhai boi.
Apinimaw na sak e hah na payon telah atipouh boi.
24 A tawk e thaw hah len sak hanelah pahnim hanh,
tami ni la lah a sak awh e hah.
25 Tami pueng ni a hmu awh teh, tami ni ahlanae koehoi a radoung awh.
26 Khenhaw! Cathut teh a lentoe poung,
maimouh ni panuek thai awh hoeh.
Kumnaw hai panue thai lah awm hoeh.
27 Bangkongtetpawiteh, tui ka ca e naw hah,
a lathueng lah a sawn teh, tuikahu kaawm e patetlah kho a rak sak.
28 Hote tâmai dawk hoi a rak sak teh,
tami e lathueng vah, kho a nan sak.
29 Tâmai ka tabawk e hoi ama ni a lathueng vah a ramuk e khoparitnaw hah,
apinimaw a panue thai han.
30 Khenhaw! a lathueng vah a angnae pheng a tue sak teh,
kadung poung e tuipuinaw hah pheng a ramuk.
31 Bangkongtetpawiteh, hete hnonaw lahoi, tami hah lawk a ceng teh,
rawca koung kakhoutlah a poe.
32 Na kut hah sumpapalik hoi a ramuk teh,
ka hanelah kâ a poe.
33 Khoparit e ni a kamnue sak teh,
saringnaw ni hai tûilî a thonae hah a kamnue sak.