JUDAH
(The General Epistle of Jude)
1
Lawk karouknae
Jisuh Khrih e a san, Jem e a nawngha kai Judah ni, Cathut ni a lungpataw teh Jisuh Khrih ni a kaw e taminaw ca na patawn awh.
Lungmanae, lungmawngnae, hoi lungpatawnae teh nangmouh koe pung lawiseh.
Noenae
Ka lungpataw e ka huinaw, maimouh ni cungtalah hmawng awh e rungngangnae kong hah ka thut teh nangmouh koe na patawn a hanelah thouk ka panki. Tami kathoungnaw koe apuengcue vah a poe tangcoung e yuemnae phung koe lah na kâyawm awh teh na tuk awh nahan, na hroecoe awh teh na uen awh. Bangkongtetpawiteh, Cathut e a lungmanae hah, amae ngainae koe lah a pakhuppathan teh, maimae Bawipa Jisuh Khrih hah ka hnoun niteh, apuengcue hoi yonphukhangnae, noutnae a ta tangcoung e tami kaponaw arulahoi duem a kâen awh.
Lawkkam kacakhoehe naw
Hatdawkvah, na panue awh tangcoung e ei, na kâhruetcuet awh nahanelah bout ka dei ngai e teh, a yungyoe ka hring e Cathut ni Isarelnaw hah Izip ram hoi a tâcokhai nah ka yuem hoeh e naw hah bout a raphoe. Hothloilah, amamae hmuen dawk awm laipalah, amamae hmuen ka cettakhai awh e kalvantaminaw hah lawkcengnae hnin kalenpoung dawk lawkceng hanelah hmonae thungvah a yungyoe kateknae lahoi a paung. Hot patetvanlah, Sodom hoi Komorah kho koehoi kamtawng teh, a tengpam e khonaw pueng ni, ahmaloe dei tangcoung e tami kaponaw patetlah kamsoumhoehe yonnae hah a sak awh teh, mae yu hoeh e naw hoi a yon awh teh, a hring awh dawkvah, a yungyoe e hmai hoi reknae a khang awh teh khetsin hanelah sut a kamnue.
Hot boiboe lah, hot patet e taminaw niteh, amamae a takthai a khin sak awh teh, kâtawnnae a oun awh. Bawilennae hoi kaawm e taminaw hah a pathoe awh. Hatei, kalvantaminaw ukkung bawi Mikel niteh, Mosi e tak hah kahraimathout hoi a kâlawp roi navah, tha hoi oun laipalah, Cathut ni mah na yue lawiseh telah doeh atipouh. 10 Hote taminaw teh, amamouh ni a panue awh hoeh e hah a pathoe awh. Saringnaw patetlah amamouh ni a panue awh e hoi amahoima a kâparo awh. 11 Ahnimouh teh yawthoe lah ao awh. Bangkongtetpawiteh, Kain hnuk a kâbang awh. Aphu hmu hane ngai lahoi yah, Balaam a yon e patetlah a yon awh. Korah e a yon e lahoi rawknae koe a pha awh.
Lawkkam kacakhoehe naw rawknae
12 Lungpatawnae pawi koe rei kacatnaw hah barinae tawn laipalah, a kâsokâroum awh teh min mathoenae hoi ao awh. Kahlî ni a palek e tui laipalah e tâmai patetlah ao awh. Kawt ka kamyai niteh, a paw paw laipalah, vai hni touh kadout niteh, phawk lah kaawm e thingkung patetlah ao awh. 13 Kayanae ka phuen sak e tuicapa patetlah Âsi kamleng e patetlah ao awh. Hote Âsi kamleng e naw hanelah a yungyoe hmonae teh sut ta e lah ao.
14 Adam e a catoun, a se sarinae, Enok ni Cathut teh touklek thai hoeh e a tami kathoungnaw hoi a tho a han ti teh profet lawk lahoi a dei. 15 A tho toteh cathutlaipa e taminaw ni cathutlaipa lah amamae hnosak e patetlah, cathutlaipa e taminaw ni Cathut banglahai a noutna awh hoeh e lawk kahram a dei awh e patetlah tami pueng lawk a ceng han. 16 Ahnimanaw teh, cairing laihoi ayâ yon ka pen e tami, mae takngai e patetlah ka hring awh e tami, kâoupnae lawk ka dei e tami, ma hane hawinae dawk dueng ayânaw ka oup e tami lah ao awh.
17 Ka lungpataw e naw, a hnukteng e atueng dawkvah, mae cathutlaipa radueknae dawk ka hring awh niteh, 18 ka pacekpahlek e taminaw teh a tho awh han titeh, maimae Bawipa Jisuh Khrih e gunceinaw ni sut a dei awh e lawk hah pâkuem awh. 19 Ahnimouh teh nangmouh na kapek hane tami, takngainae dawk dueng ka hring a niteh, kathounge muitha tawn awh hoeh. 20 Ka lungpataw e ka huinaw, ka thoung poung e yuemnae dawkvah, namahoima roung awh nateh, Kathoung Muitha lahoi ratoum awh.
Muitha lahoi ratoum awh
21 Cathut lungpatawnae dawk awm awh nateh, a yungyoe hringnae koe na hrawi han ti hoi Bawipa Jisuh Khrih e a lungmanae hah ngaihawi awh.
22 Lunghringnae hoi kaawmnaw hah pahren awh. 23 Takthai ngainae lahoi kakhine khohna hah panuet awh. Tami tangawn hah hmai thung hoi rasat awh nateh rungngang awh, takinae hoi pahren awh.
24 Rawpnae dawk hoi a hlout awh teh nangmouh na khenyawn thai e, yonnae awm laipalah, lunghawinae hoi kakawi e nangmouh hah bawilennae hmalah na ka thak thai e, 25 Maimouh na ka Rungngangkung, Bawi buet touh dueng e Cathut ni, maimae Bawipa Jisuh Khrih lahoi bawilennae, taluenae, uknae, hoi bahu teh atu hoi a yungyoe ditouh awm yungyoe lawiseh ! Amen.