CINGTHUILAWKNAW
1
Lungang kamtawngnae
Isarel siangpahrang, Devit capa Solomon e cingthuilawknaw:
Lungangnae hoi cangkhainae panue hane hoi
thaipanuenae lawk hah thaipanuek hane hoi,
lungangnae, lannae, lawkcengnae hoi lannae koelah
cangkhainae pang hane hoi,
kamawngrame kâhruetcuet poe hane hoi,
thoundounnaw ni panuenae hoi poukthainae a tawn awh nahanlah,
tami lungkaang ni a thai navah lungang a kâthap vaiteh,
thaipanueknae ka tawn e ni lamthung patue thainae a hmu han.
Cingthuilawk hoi bangnuenae,
lungangnae hoi kâpâvêinae naw thaipanuek nahanlah,
BAWIPA takinae teh panuenae kamtawngnae doeh.
Hatei, tamipathunaw ni teh lungangnae hoi cingthuinae hah a dudam awh.
Kahawihoeh e khokhannae hah roun haw
Ka capa, na pa e pâtunae hah thai nateh,
na manu e kâlawk hai pahnawt hanh.
Hothateh na lû dawk kamthoupnae sammuem lah awm vaiteh,
na lahuen dawk awi e dingyin lah ao han.
10 Ka capa, tamikayonnaw ni na pasawt pawiteh,
ngai pouh hanh.
11 Kai koe tho van haw, tami thei hanelah pawm sei.
A khuekhaw awm laipalah yonnae ka tawn hoeh naw hah
arulahoi pawm awh sei.
12 Sheol patetlah a hring lahoi payawp awh vaiteh,
kadungpoung e tangkom dawk ka bawt e patetlah,
13 Aphu kaawm e hno pueng la awh vaiteh,
lawphno hoi mamae im dawk kawi sak awh sei.
14 Kaimouh koe kambawng van leih,
maimae tangkabom suekâvan sak awh sei ati awh nakunghai,
15 ka capa, ahnimouh koe kambawng hanh.
Ahnimae lamthung hah roun hanelah kâyawmh.
16 Ahnimae khok teh yonnae koe lah a yawng teh,
tami thei hanelah a hue a rang awh.
17 Bangpatet e tava nakunghai
a hmunae koe tamlawk yangda pawiteh, ayawm doeh.
18 Hatei, ahnimouh teh amamouh hoi
amamouh kâthei hanlah a kâpawp awh teh,
amamae hringnae arulahoi ka pawm e lah doeh ao awh.
19 Hot patetlah, kamsoumhoehe pungdawnae koe lah
kahounlounnaw e hringnae teh, katawnkung hringnae hah a thei awh.
Lungang hanelah kawnae
20 Lungangnae ni a lawi lahoi kacaipounglah a kaw teh,
lam tangkuem dawk lawk ceiceikapanglah a oung.
21 Tami kamkhuengnae koe a oung teh,
khopui kâennae longkha koe lawk a dei.
22 Nangmouh kamawngramenaw,
nâtotouh maw cungkeihoehe kamawngrame hah
na lungpataw awh han rah.
Kadudamnaw ni, dudamnae dawk a nawm awh teh,
tamipathunaw ni panuethainae hah a hmuhma awh.
23 Kaie yuenae koe kamlang awh,
nangmae thung ka muitha ka awi vaiteh,
ka lawk hah na panue sak han.
24 Na kaw awh ei, na ngai awh hoeh.
Ka kut ka dâw ei, apinihai banglah na pouk awh hoeh.
25 Kâhruetcuet na poe awh e puenghai na hnoun awh teh,
na yuenae puenghai buet touh boehai bout na tarawi awh hoeh.
26 Hatdawkvah, yawthoenae na kâhmo awh toteh,
na panuikhai vaiteh, lungpuennae na kâhmo awh to hai na panuikhai awh han.
27 Takinae kahlî kathout ni na kanawi awh teh,
bongparui ni na parit awh toteh,
kângairu temdengnae a tho toteh, na panuikhai han.
28 Hatnavah, na kaw awh han, hatei, na pato awh mahoeh.
Atangcalah na tawng awh han, hatei, na hmawt awh mahoeh.
29 Panuethainae hah a hmuhma awh teh,
BAWIPA taki hane hah na kârawi awh hoeh.
30 Pouknae ka poe e hah ngai awh hoeh,
ka yuenae puenghai banglah noutna awh hoeh.
31 Hatdawkvah, a hringnuen pawhik hah amamouh ni a ca awh han.
A khopouk awh e ni letlang a paha sak han.
32 Bangkongtetpawiteh, kamawngrame ni a phen saknae ni a thei awh vaiteh,
lawlulawlei ka panuek laipalah, a onae ni a raphoe awh han.
33 Hatei, ka lawk ka tarawi e teh,
karoumcalah kho a sak han.
Thoenae taket laipalah karoumcalah ao awh han.