19
Ka kuep e BAWIPA kamnuenae
Kathutkung: Devit
1 Kalvannaw ni Cathut bawilennae a pathang awh.
Kakaw poung e kalvan ni a kutsak tie a kamnue sak.
2 Khosei ni khodai koe lawk a dei teh,
karum ni karum koe a cangkhai.
3 Lawk dei e, lawk kâpan e
ahnimae pahni dawk hoi thai hoeh eiteh,
4 ahnimae lawk teh talai van pueng a cei teh,
talai poutnae koe totouh a pha.
Ahnimouh koevah, kanî hanelah lukkareiim a ta pouh.
5 Hahoi, kanî teh, yupaluenkung imrakhan thung hoi ka tâcawt e patetlah ao teh,
yawngkâtânae koe a tha kaawm poung e, konawm laihoi ka yawng hane patetlah ao.
6 Avang lae kalvan apoutnae koehoi, a tâco teh,
avanglae kalvan apoutnae koe totouh, a kâhei dawkvah,
a kâannae dawk hoi kahlout e awm hoeh.
7 BAWIPA e kâlawk teh akuep dawkvah,
hringnae a roung sak.
BAWIPA e lawkpanuesaknae teh a kamceng dawkvah,
kamawngrame hah a lung a ang sak.
8 BAWIPA e phunglawk teh a lan teh, lungthin a konawm sak.
BAWIPA ni kâpoe e teh a thoung teh, mit a ang sak.
9 BAWIPA takinae teh a thoung teh, a yungyoe a kangning.
BAWIPA lawkcengnae teh a lan teh, katang e lah ao.
10 Sui hlak hai sôlêi e sui hlak hai ngai hanelah ao.
Khoitui hoi khoipha hlak hai a radiphnawn.
11 Hothloilah, hotnaw hno lahoi na san hah kâhruetcuet na poe teh,
hote lawknaw tarawinae tawkphu teh a len poung.
12 Apimaw mae payonnae ka panuek thai.
Pâpha e payonnae dawk hoi na thoung sak haw.
13 Na san heh yonnae ka sak hoeh nahanlah,
thama lahoi na kuen nateh,
hotnaw teh ka lathueng vah kâ tawn sak hanh.
14 Oe BAWIPA, ka thaonae hoi na ka ratangkung,
ka dei e dawk hoi ka pouk e naw heh,
na mithmu vah na lung ka youk lah awm seh.