21
BAWIPA rungngangnae dawk konawmnae
Kathutkung: Devit
1 Oe BAWIPA, na thaonae dawk siangpahrang ni a konawm han.
Na rungngangnae dawk banghloimaw a konawmnae a tawn han,
2 Apâhni hoi a kâhei e hah na oun hoeh niteh,
a lungthin ngainae hah na poe toe. Selah.
3 Bangkongtetpawiteh, hawinae yawhawi hoi na dawn teh,
a lû dawk suikathoung bawilukhung hoi na kâmuk sak.
4 Nang koe a hei e hringnae,
a yungyoe hoi a yungyoe totouh hringsawnae hah na poe.
5 A bawilennae teh na rungngangnae dawkvah a len,
barinae hoi taluenae teh ahni dawk na patue toe.
6 Bangkongtetpawiteh, a yungyoe hane yawhawinae lentoe kacoekung lah na sak teh,
na hmalah puenghoi a lung kahawi hanelah na coung sak.
7 Bangkongtetpawiteh, siangpahrang ni BAWIPA hah a kâuep.
Lathueng Poung lungmanae lahoi kâhuen mahoeh.
8 Na kut ni na taran pueng hmawt vaiteh,
aranglae na kut ni na ka hmuhma e pueng hah a hmu han.
9 Na lungkhuek toteh, ahnimouh hah takhuen patetlah na coung sak han.
BAWIPA ni ahnimouh teh,
a lungkhueknae lahoi payawp vaiteh,
a hmai ni koung a kak awh han.
10 A catounnaw hah talai van hoi koung takhoe pouh vaiteh,
a catounnaw hah miphunnaw thung hoi na takhoe han.
11 Bangkongtetpawiteh, nang taran lahoi,
hawihoehnae hah sak han a kâcai awh teh,
a sak thai awh hoeh e hah sak han a kâcai awh.
12 Hatdawkvah, ahnimouh teh na yawng sak vaiteh,
ahnimae a mithmainaw dawk na licung hoi coungkacoe na nue toe.
13 Oe BAWIPA, na thaonae dawk tawm lah na o.
Na thaonae pholen hoi la ka sak han.