33
BAWIPA dawk hringnae
Kathutkung: Panuekhoeh
1 Oe, tamikalannaw, BAWIPA dawk konawm awh nateh, la sak awh.
Pholennae teh lungthin kalannaw hanelah a kamcu doeh.
2 Ratoung hoi BAWIPA teh pholen awh.
rui hra touh e ratoung hoi pholen awh.
3 Ama koe la katha sak awh nateh,
lunghawilawk hoi kathoum katang lahoi kueng awh.
4 Bangkongtetpawiteh, BAWIPA lawk teh a lan,
a tawk e pueng teh yuemkamculah ao.
5 Lannae hoi kângingnae hah a lungpataw teh,
talai teh BAWIPA hawinae hoi koung akawi.
6 BAWIPA e lawk hoi kalvannaw sak lah ao teh,
kalvan kaawm e pueng hai a kâko hoi e kâha hoi sak e seng doeh.
7 Talîpui tuinaw hah a pâkhueng teh,
kadungpoung e tuinaw hah ao nahane hmuen koe a hruek.
8 Talai pueng ni BAWIPA taket naseh,
talaivan kaawm e pueng ni ama teh taket awh naseh.
9 Bangkongtetpawiteh, lawk a dei boteh ao.
Kâ a poe boteh, kacaklah hmawi a kangdue.
10 BAWIPA ni miphunlouknaw e kâpannae teh a takhoe toe.
Tamimaya ni sutpouknae hai banghai bang hoeh lah a coung sak.
11 BAWIPA ni kâpankhai e teh a yungyoe a kangning.
Sut a pouk e teh catounnaw hane totouh a cak.
12 A Cathut Jehovah lah kaawm e miphun teh a yawhawi.
Ama ni râw lah a rawi e miphun teh, tami yawkahawi e doeh.
13 BAWIPA ni kalvan hoi a khet teh,
tami capa pueng koung a hmu.
14 A onae hmuen koehoi talai van
kaawm e pueng koung a radoung.
15 Tami pueng e lungthin koung a pathoup teh,
a sak e puenghai koung a pouk pouh.
16 Siangpahrang teh ransa moikapap a tawn dawk
rungngang lah awm hoeh.
Tami a tha kaawm hai a thaonae ni rungngang mahoeh.
17 Marang teh rungngang nahanelah
cungkeihoehe ngaihawinae doeh.
Thaonae kalen ni hai rungngang thai hoeh.
18 Duenae koehoi hringnae rasa hane hoi
takang dawk due hoeh nahanlah,
19 khenhaw! BAWIPA e mit ni
ama ka taketnaw koe pou a khet.
20 Ka hringnae ni BAWIPA a ring,
ama teh kabawmkung hoi ka bahling doeh.
21 Bangkongtetpawiteh, ka lungthin teh ama dawk a konawm han.
Bangkongtetpawiteh, a min kathoung teh kâuep awh.
22 Oe BAWIPA, nang dawk ngaihawinae ka tawn awh e patetlah
na pahrennae teh, kaimouh lathueng awm lawiseh.