48
Zion vah Cathut bawilennae
Kathutkung: Korah capanaw
1 BAWIPA teh a lentoe poung.
Cathut khopui dawk lentoe poung lah,
amae mon kathoung dawk pholen hanlah a kamcu.
2 Zion mon atunglah kaawm e teh
arasang teh a meihawi.
3 Cathut teh a im dawkvah ao teh,
a kânguenae rapan tie panue lah ao.
4 Bangkongtetpawiteh, siangpahrangnaw a kamkhueng awh teh,
cungtalah a dei awh.
5 A hmu awh toteh, a kalue awh teh
koung a yawng awh.
6 Kanîtholah e kahlî hoi
Tarshish long kalennaw ouk a raphoe e patetlah,
7 Haw tueng vah, takinae ni a man awh teh,
napui camokhe pataw e patetlah a man awh.
8 Panue awh tangcoung e hoi hmu awh tangcoung e patetlah,
ransahu BAWIPA khopui, maimae Cathut khopui teh,
Cathut ni a yungyoe hanelah a caksak han.
9 Oe Cathut, na bawkim lungui vah,
na pahrenlungmanae ouk ka pouk awh.
10 Oe Cathut, na min patetlah nang pholennae ni,
talai pout totouh a pha teh,
nange aranglae kut teh lannae hoi akawi.
11 Na lawkcengnae dawkvah,
Zion mon teh lunghawi naseh,
Zion canu hai konawm naseh.
12 Zion hah lawngven awh nateh,
imrasangnaw hah parei awh haw.
13 Sekatha dawk kaawm han rae naw koe
patuen na dei thai awh nahanlah,
kalupnae hah pâkuem awh nateh,
siangpahrang imnaw hah pouk awh haw.
14 Bangkongtetpawiteh, Cathut teh a yungyoe maimae Cathut doeh.
Ahni teh maimouh due totouh hai na kahrawikung lah ao.