51
Yon pankângai ratoumnae
Kathutkung: Devit
1 Oe Cathut, na pahren han ngai e patetlah na pahren haw.
Kapap ni teh kahawi e na lungmanae dawkvah,
kâtapoenae hah na tha pouh haw.
2 Ka sakpayon e pueng kathoungcalah na pâsu pouh haw.
Ka yonnae dawk hoi na thoung sak haw.
3 Kâtapoenae hah ka panue toe.
Ka yonnae teh pou ka pouk.
4 Nang taranlahoi nang koe roeroe ka yon toe.
Na mithmu vah hawihoehnae ka sak toe.
Ka kong na dei toteh atang doeh.
Lawk na ceng toteh, toun han awm hoeh.
5 Kai teh payonnae lahoi khe e lah ka o teh,
anu ni yon hoi doeh na vawn toe.
6 Lungthin kalan e hah na ngai dawkvah,
ka lungthin thung lungangnae hah na cangkhai haw.
7 Dingsala hoi na hui haw, ka thoung han.
Na pâsu haw tadamtui patetlah ka pangaw han.
8 Na khoe tangcoung e hrunaw konawm nahanlah,
konawmnae hoi lunghawinae lawk na thaisak haw.
9 Ka yonnae dawk hoi na minhmai hrawk nateh,
ka yonnae pueng hah na takhoe pouh haw.
10 Oe Cathut, ka thungvah lungthin kathoung bout sak nateh,
kai dawk kacakpounge muitha hah bout roung sak haw.
11 Nang koehoi na pâlei hanh lah a.
Na Kathoung Muitha teh kai koehoi na lat pouh hanh.
12 Na rungngangnae dawk konawmnae hah bout na poe haw.
Hringpasoungnae na Muitha hoi na kuen haw.
13 Hottelah, kâtapoenaw hah na lamthung ka cangkhai vaiteh,
tamikayonnaw teh nang koe a kâthung awh han.
14 Oe Cathut, kaie rungngangnae Cathut,
tami thei e yon hoi na hlout sak haw.
Na lannae hah ka lai ni kacaipounglah la a sak han.
15 Oe BAWIPA, ka pahni heh paawng nateh,
ka pahni ni na pholen han.
16 Bangkongtetpawiteh, thuengnae hah na ngai e nahoeh.
Hoehpawiteh, yo na poe han doeh toe.
Hmaisawi thuengnae dawk hai na lungyouknae awm hoeh.
17 Cathut ngai e patetlah thuengnae hateh, muitha rek e hah doeh.
Lungthin rek laihoi pankângai e heh,
Oe Cathut, banglahai noutna laipalah na awm mahoeh.
18 Zion vah na ngai e hawinae hah sak haw,
Jerusalem rapan hah kangdout sak haw.
19 Hottelah hoiyah, lannae thuengnae hoi hmaisawi thuengnae hoi
takbuem hmaisawi thuengnae dawk na lunghawi vaiteh,
na thuengnae khoungroe van vah, maitotan hah a thueng awh han.