92
Yuemkamcunae hoi lungpatawnae dawk Cathut pholennae
Kasakkung: panuekhoeh
1 Bawipa koe lunghawilawk dei e heh ahawi.
Oe a Lathueng Poung Cathut,
na min pholen teh la sak e heh ahawi tangngak.
2 Rui hra touh thueng e ratoung hoi
tamawi hoi lawk phunkuep kacai e tumkhawng e hoi,
3 a pahrennae hoi yuemkamcunae naw teh,
amom karoitawi tangmin karoitawi pâpho hanelah ahawi tangngak.
4 Oe BAWIPA, na hnosak e naw ni banghloimaw
lung na hawi sak.
na kutsaknaw dawk
lunghawi hoi la ka sak han.
5 Oe BAWIPA na tawk e hah banghloimaw a len.
Na pouknae naw teh adung tangngak.
6 Tamipathu ni teh panuek hoeh,
thaipanuek hoeh.
7 Tamikathoutnaw teh phokahring patetlah a cawn awh teh,
ka payonnaw pueng a tawnta awh toteh,
a yungyoe a rawk awh nahanelah, letlang a coung.
8 Hatei, BAWIPA nang teh
a rasangnae koe na o yungyoe.
9 Oe BAWIPA, na tarannaw heh khenhaw!
Bangkongtetpawiteh, khenhaw!
na tarannaw koung a kahma han.
Payonnae ka sak e naw pueng teh, koung kayei lah ao han.
10 Hatei, ka ki heh sakrak e ki patetlah na saw sak teh,
satui katha hoi awi lah ka o.
11 Ka tarannaw koe phat seh
ka tie hah ka mit ni a hmu toe.
Na ka taran e tamikathout koe ka pouk e a kuep teh, ka hnâ ni a thai.
12 Tamikalan teh samtue patetlah kâhuen vaiteh,
Lebanon mon e Sidar thing patetlah a roung han.
13 BAWIPA im dawk ung e naw teh,
Cathut thongma dawk a kâhuet awh han.
14 A matawng totouh a pawhik katha lah tâcawt vaiteh,
pou a kâhuet awh han.
15 BAWIPA teh a lan tie kamnue saknae lah,
ama teh lungsong lah ao teh,
ama dawk lanhoehnae banghai awm hoeh.