1 Bra wa mdyii ykwiꞌ Jesús chaꞌ kanꞌ loꞌo neꞌ, mdoꞌo yu seꞌen ndiꞌin yu lo yuu ꞌin Galilea, ndyaa yu nde lo yuu ꞌin Judea. Mdijin Jesús chku Jordán, 2 loꞌo kaꞌan ꞌa nten ndaꞌan ñaꞌan ꞌin yu chaꞌ kuꞌni yu joꞌó ꞌin nchga nu tiꞌí nu ndijyan loꞌo neꞌ. Kwiꞌ yꞌni Jesús joꞌó ꞌin nu tiꞌí kanꞌ, nchkaa neꞌ kanꞌ bra kanꞌ.

3 Loꞌo kanꞌ mdiyan chinꞌ neꞌ fariseo seꞌen ndiꞌin Jesús chaꞌ chkwiꞌ biyaꞌ neꞌ loꞌo yu, si tyija ska chaꞌ kuxi ꞌin yu ꞌin neꞌ siꞌya ska chaꞌ nu nchkwiꞌ ti yu, nchka tiꞌ neꞌ.

―¿Ta ndiya chabiyaꞌ chaꞌ kulaa tiꞌin ska nten ꞌin kwilyoꞌo yu siyaꞌ ti, si ja nchka ꞌa tiꞌ yu ꞌin kwilyoꞌo yu a? ―ndukwin neꞌ ꞌin Jesús.

4 ―¿Ta ja ya chkwiꞌ wan lo kityi chaꞌ ꞌin Ndiose a? ―mxkwen Jesús ꞌin neꞌ kanꞌ―. “Ti kulo mñan Ni nten, ska yu kiꞌyu loꞌo ska nu kunaꞌan” ngwañaꞌan ndukwa chaꞌ lo kityi kanꞌ. 5 Loꞌo ykwiꞌ Ndiose chaꞌ re: “Kanꞌ chaꞌ tyoꞌo tsuꞌ ska yu kiꞌyu seꞌen ndiꞌin sti yu, seꞌen ndiꞌin jyaꞌan yu, chaꞌ kaja kwilyoꞌo yu loꞌo ska nu kunaꞌan, chaꞌ ka neꞌ ska ti neꞌ taꞌa tyukwaa neꞌ.” 6 Siꞌi tukwa nten lka neꞌ bra kanꞌ; sa ñaꞌan si lka neꞌ ska ti nten, ngwañaꞌan lka chaꞌ ꞌin neꞌ bra kanꞌ. Kanꞌ chaꞌ ja suꞌwe kulaa tiꞌin neꞌ ꞌin kwilyoꞌo neꞌ, chaꞌ wa mda Ndiose chabiyaꞌ chaꞌ nchka kwilyoꞌo neꞌ.

7 Xiyaꞌ mnichaꞌ neꞌ fariseo ꞌin Jesús:

―¿Ni chaꞌ lka mda ayman Moisés chabiyaꞌ re ꞌñaan sikwa? Ka kulo yu kiꞌyu ska kityi chaꞌ kulaa tiꞌin yu ꞌin kwilyoꞌo yu, ndukwin ayman kanꞌ.

8 Xiyaꞌ mxkwen Jesús ꞌin neꞌ kanꞌ bra kanꞌ:

―Ja nnan wan chaꞌ nchkwiꞌ Ndiose siyaꞌ ti, kanꞌ chaꞌ mda ayman Moisés chabiyaꞌ ꞌwan chaꞌ kulaa tiꞌin wan ꞌin kwilyoꞌo wan loꞌo ska kityi ti ―ndukwin Jesús ꞌin neꞌ―. Siꞌi ngwañaꞌan ngwa tiꞌ Ndiose ti bra nu mñan Ni chalyuu. 9 Naꞌ chkwiǐnꞌ chaꞌ re loꞌo wan ni: Bra nu kulaa tiꞌin ska nten ꞌin kwilyoꞌo chaꞌ kaja kwilyoꞌo loꞌo xka nu kunaꞌan, kuꞌni yu chaꞌ kuxi loꞌo kwilyoꞌo yu bra kanꞌ. Ska ti xa wa yten yuꞌwi kwilyoꞌo yu loꞌo xka yu kiꞌyu, ñi ka chaꞌ kulaa tiꞌin yu ꞌin nu kunaꞌan kanꞌ bra kanꞌ. Kwiꞌ ngwañaꞌan loꞌo nu kunaꞌan nu wa ngulaa tiꞌin ꞌin kwilyoꞌo kanꞌ, si xiyaꞌ kaja kwilyoꞌo loꞌo xka nten, chaꞌ kuxi kuꞌni neꞌ kanꞌ bra kanꞌ.

10 Loꞌo ykwiꞌ neꞌ nu ngiꞌni xaꞌan chaꞌ ꞌin Jesús loꞌo yu bra kanꞌ:

―Suꞌwe la ni siya ja kaja kwilyoꞌoan siyaꞌ ti, si ngwañaꞌan ka chaꞌ ꞌin ska yu kiꞌyu loꞌo kwilyoꞌo yu ―ndukwin neꞌ.

11 ―Ndiya ꞌa nu kiꞌyu nu ja talo yu chaꞌ tyiꞌin yu ska ti yu ―ndukwin Jesús ꞌin neꞌ nu ngiꞌni xaꞌan chaꞌ ꞌin yu bra kanꞌ―. Ska ti si kulo Ndiose tñan ꞌin ska nten chaꞌ ja kaja kwilyoꞌo, bra kanꞌ ka talo yu chaꞌ ja kalaꞌ yu ꞌin ska nu kunaꞌan siyaꞌ ti, bra nu tayaꞌ Ndiose ꞌin yu kanꞌ. 12 Ndiya tyun lo chaꞌ nu ngiꞌni chaꞌ ja nchka kaja kwilyoꞌo ska yu kiꞌyu: ndiya nu kiꞌyu nu kicha yu ti bra nu ngula yu; kwiꞌ ndiya chinꞌ nu kiꞌyu nu ja nchka ꞌin yu chunꞌ wa yꞌni ñuꞌun nten ꞌin yu kanꞌ; kwiꞌ ndiya chinꞌ nu kiꞌyu nu wa ngulo suwi Ndiose ꞌin yu chaꞌ kuꞌni yu tñan ꞌin Ni, kanꞌ chaꞌ suꞌwe la chaꞌ ja kaja kwilyoꞌo yu kanꞌ bra kanꞌ, chaꞌ ska ti Ndiose ka ndloo ꞌin yu bra kanꞌ, nskeꞌ tiꞌ yu. Ska yu kiꞌyu nu ngwañaꞌan ni, ndiꞌya yu kwenta ti ykwiꞌ ti yu si ka ꞌin yu tyiꞌin yu ska ti yu; suꞌwe si talo yu kanꞌ tyiꞌin yu ska ti yu sikwa.

13 Ngwa ska tsan mdiyan loꞌo neꞌ ꞌin tyun nu xuwe ti seꞌen ndiꞌin Jesús. Ngwa tiꞌ neꞌ chaꞌ xtya yaꞌ Jesús ke nu xuwe ti kanꞌ, chaꞌ chkwiꞌ yu loꞌo Ndiose chaꞌ ꞌin nu xuwe kanꞌ. Loꞌo yꞌni tlá neꞌ nu ngiꞌni xaꞌan chaꞌ ꞌin Jesús ꞌin neꞌ kanꞌ bra kanꞌ. 14 Bra ti ykwiꞌ Jesús loꞌo yu kuneꞌ kanꞌ:

―Ta wan chabiyaꞌ ꞌin nu xuwe ti chaꞌ kan neꞌ seꞌen ndiꞌiǐn ―ndukwin Jesús ꞌin yu kanꞌ―. Ja tukunꞌ ꞌa wan chaꞌ ꞌin nu xuwe, chaꞌ ja kan neꞌ. Sa ñaꞌan lka bra nu ndyaa ñaꞌan tiꞌ nu xuwe ꞌin sti neꞌ, ngwañaꞌan ndiꞌin chaꞌ tsaa ñaꞌan tiꞌ nten ꞌin Ndiose chaꞌ ka Ndiose ndloo niꞌ kasiya ꞌin neꞌ.

15 Mstya yaꞌ Jesús ke nu xuwe kanꞌ bra kanꞌ, mdoꞌo yu ndyaa yu bra kanꞌ.

16 Ngwa ska tsan mdiyan ska nu kiꞌyu kuneꞌ seꞌen ndiꞌin Jesús.

―Mstru, nuꞌwin suꞌwe ꞌa ngiꞌnii nchga tsan ―ndukwin yu ꞌin Jesús―. Kuꞌnii chaꞌ suꞌwe katsaaꞌ ꞌñaǎn, ¿ni sa ñaꞌan chaꞌ suꞌwe kuꞌniǐn chaꞌ kaja chalyuu nu ja tsaa tii ꞌa ꞌñaǎn? ―ndukwin yu.

17 Ykwiꞌ Jesús loꞌo yu bra kanꞌ:

―¿Ni chaꞌ nchkwiiꞌ chaꞌ suꞌwe ꞌa ngiꞌniǐn? ―ndukwin Jesús ꞌin yu kanꞌ―. Ska ti Ndiose nu chañi chaꞌ suꞌwe ꞌa ngiꞌni. Kunaan nchga tñan nu ngulo Ndiose ꞌin nten, si nchka tiiꞌ kaja chalyuu nu ja tsaa tii ꞌa ꞌiin.

18 ―¿Ni sa ñaꞌan tñan lka kanꞌ? ―ndukwin yu kuneꞌ kanꞌ ꞌin yu.

Loꞌo ngwaꞌu la Jesús chinꞌ chaꞌ ꞌin yu kanꞌ bra kanꞌ:

―Ja kujwi wan ꞌin taꞌa nten wan; ja sten yuꞌwi wan loꞌo kwilyoꞌo xka nten; ja kuꞌni wan kunan chaꞌ suꞌwe nu nsuꞌwi ꞌin taꞌa nten wan; ja chkwiꞌ wan kwentu ꞌin taꞌa nten wan; 19 kwiꞌ ngwañaꞌan, kuꞌni tnun wan ꞌin sti jyaꞌan wan; chka tꞌnan tiꞌ wan ꞌin taꞌa nten wan, sa ñaꞌan lka bra nu nchka tꞌnan tiꞌ wan ꞌwan, ti ykwiꞌ ti wan.

20 Mxkwen yu kuneꞌ ꞌin Jesús bra kanꞌ:

―Ti kuneěnꞌ wa ndukwaǎn nchga tñan kanꞌ nchga tsan ―ndukwin yu kuneꞌ kanꞌ ꞌin Jesús―. ¿Ta ndiya la chaꞌ nu ti ji kuꞌniǐn sikwa a? ―ndukwin.

21 ―¿Ta chañi chaꞌ nchka tiiꞌ chaꞌ ka luwi kasiya ꞌiin a? ¿Ta nchka tiiꞌ kaja chalyuu kwi nu ja tsaa tii ꞌa ꞌiin a? ―ndukwin Jesús ꞌin yu kuneꞌ kanꞌ―. Si chañi chaꞌ nu nchkwiiꞌ, yaa lyaa kujwiiꞌ nchga chaꞌ suꞌwe nu nsuꞌwi ꞌiin; tyoꞌo tñi chaꞌ taa ꞌin nu tiꞌi bra kanꞌ. Loꞌo ta Ndiose chaꞌ suꞌwe ꞌiin seꞌen ndiꞌin Ni nde loo la. Bra wa yꞌnii chaꞌ kanꞌ, kaan seꞌen ndiꞌiǐn chaꞌ tyaꞌaan loꞌoǔn bra kanꞌ.

22 Bra wa ynan yu kuneꞌ kanꞌ chaꞌ nu ykwiꞌ Jesús loꞌo yu, mdoꞌo yu ndyaa yu bra kanꞌ; xiꞌin ꞌa tiꞌ yu chaꞌ ykwiꞌ Jesús chaꞌ kanꞌ, chunꞌ kuliyaꞌ ꞌa yu.

23 Loꞌo ykwiꞌ Jesús chaꞌ re loꞌo neꞌ nu ngiꞌni xaꞌan chaꞌ ꞌin yu bra kanꞌ:

―Chañi chaꞌ nu nchkwiǐnꞌ loꞌo wan ni ―ndukwin―, tukwi ꞌa lka chaꞌ, chaꞌ sten ska neꞌ kuliyaꞌ chaꞌ ꞌin Ndiose, chaꞌ ka Ni ndloo la niꞌ kasiya ꞌin yu. 24 Sa la tñan tyijin ska ꞌni kiyaꞌ kuxa, ni siya ska ꞌni tnun ñaꞌan tiꞌ ska camello; sa la chaꞌ kanꞌ, loꞌo tukwi la kala ska neꞌ kuliyaꞌ seꞌen lka Ndiose ndloo.

25 Yuwe ꞌa tiꞌ neꞌ nu ngiꞌni xaꞌan chaꞌ ꞌin yu xa nu ynan neꞌ chaꞌ kanꞌ.

―¿Ti ka lka nu ka tyoꞌo tsuꞌ ꞌin chaꞌ kuxi nu nsuꞌwi chalyuu chaꞌ kala seꞌen ndiꞌin Ndiose sikwa? ―ndukwin neꞌ ꞌin Jesús bra kanꞌ.

26 ―Kanꞌ lka ska tñan nu ja nchka kuꞌni ska nten chalyuu; Ndiose ni, kanꞌ nu nchka kuꞌni chaꞌ kala nten seꞌen ndiꞌin Ni ―ndukwin Jesús ꞌin neꞌ.

27 Ykwiꞌ Tyu loꞌo Jesús bra kanꞌ:

―Loꞌo bare ni, wa ngulaa tiꞌin ba nchga nan nu nsuꞌwi ꞌwa chaꞌ tyaꞌan ba loꞌo nuꞌwin, sa ñaꞌan yaꞌ nu ndukwiin chaꞌ kuꞌni ba ―ndukwin Tyu ꞌin Jesús―. ¿Nan ka kaja ꞌwa nde loo la bra kanꞌ a?

28 ―Chañi chaꞌ nu nchkwiǐnꞌ loꞌo wan ni ―ndukwin Jesús ꞌin neꞌ―, bra nu ka chalyuu kwi kanꞌ, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten, kanꞌ tyitukwaǎn seꞌen suꞌwe la ti la kwa, chaꞌ kuꞌni biyaǎnꞌ ꞌin nchga nten chalyuu bra kanꞌ. Loꞌo ꞌwan nu ndaꞌan wan loꞌoǔn, tyukwa wan lo tii tyukwa yka xlya tnun nu suꞌwe ꞌa, chaꞌ kuꞌni biyaꞌ wan ꞌin taꞌa nten wan, nu lka tii tyukwa ta neꞌ Israel kanꞌ. 29 Kwiꞌ ngwañaꞌan nchga nten nu ndiꞌin chaꞌ tsaa tijyuꞌ chaꞌ kuꞌni neꞌ tñan ꞌñaǎn, nu loꞌo kulaa tiꞌin neꞌ nchga nan nu nsuꞌwi ꞌin neꞌ chaꞌ kuꞌni neꞌ tñan kanꞌ, ja kulaa yaǎnꞌ ꞌin neꞌ kanꞌ ngwañaꞌan ti; ni siya xnun neꞌ naꞌan tyi neꞌ, ni siya taꞌa ngula neꞌ, ni siya sti neꞌ, ni siya jyaꞌan neꞌ, ni siya sñiꞌ neꞌ, ni siya yuu nu nsuꞌwi ꞌin neꞌ, ni siya xnun neꞌ nchga chaꞌ kanꞌ, kaja chalyuu nu ja tsaa tii ꞌa ꞌin neꞌ nde loo la. Kwiꞌ kaja kaꞌan la chaꞌ kanꞌ ꞌin neꞌ kanꞌ xiyaꞌ, sa ñaꞌan nan nu mnaꞌ ꞌin neꞌ kanꞌ, nxkeꞌ tiꞌ neꞌ, ngwañaꞌan nan nu kaja ꞌin neꞌ. 30 Loꞌo tyun nten nu tyoꞌo tukwa xa wa tyii ti chaꞌ, kanꞌ lka nu ka nde loo la bra kanꞌ; loꞌo tyun nten nu mdoꞌo tukwa ti kulo, kanꞌ lka nu kanun nde chunꞌ la bra kanꞌ.