1 Chunꞌ ndiꞌin la mdoꞌo Jesús chunꞌ laa tnun kanꞌ; wa tyaa ti yu, lye ꞌa ykwiꞌ neꞌ nu ngiꞌni xaꞌan chaꞌ ꞌin yu loꞌo yu chaꞌ ꞌin laa tnun kanꞌ, chaꞌ suꞌwe ꞌa ñaꞌan nchga naꞌan nu kwenta ꞌin laa kanꞌ. 2 Mxkwen Jesús ꞌin neꞌ kanꞌ bra kanꞌ:

―Ñaꞌan suꞌwe wan nchga chaꞌ nu nsuꞌwi laa tnun re ―ndukwin Jesús ꞌin neꞌ kanꞌ―. Chañi chaꞌ nu nchkwiǐnꞌ loꞌo wan ni, chaꞌ tyii laa re katin ran loꞌo ja ska ꞌa kee nu nsuꞌwi siꞌ laa re kanun ran chunꞌ taꞌa ran.

3 Loꞌo kanꞌ ndyaa neꞌ lo kiꞌya nu naan Olivos bra kanꞌ. Nde kwa ndyaa tukwa Jesús. Mnan ti ykwiꞌ neꞌ nu ngiꞌni xaꞌan chaꞌ ꞌin yu loꞌo yu bra kanꞌ, mnichaꞌ neꞌ ꞌin yu:

―Katsaaꞌ ꞌwa, ¿ni ñaꞌan bra ka chaꞌ kuxi kanꞌ ꞌin laa tnun re? Kwiꞌ ngwañaꞌan, ¿ni sa ñaꞌan ka chaꞌ bra nu tyaan xiyaꞌ, xa nu tyii chalyuu? ―ndukwin neꞌ kanꞌ ꞌin yu.

4 Ti ngwaꞌu la Jesús ꞌin neꞌ bra kanꞌ:

―Ndii ti tiꞌ wan tyiꞌin wan, kiꞌya wan kwenta chaꞌ ja tukwin kwiñi lyoꞌo ꞌwan ―ndukwin yu―. 5 Nde loo la kan tyun nten kwiñi nu chkwiꞌ chaꞌ chabiyaꞌ ꞌñaǎn ndijyan neꞌ. “Krixtu lkaǎn” nchkwin neꞌ kanꞌ ꞌwan, chaꞌ kwiñi lyoꞌo neꞌ ꞌin kaꞌan ꞌa nten nu tsaa ñaꞌan tiꞌ chaꞌ nu chkwiꞌ neꞌ. 6 Kanꞌ kanen chaꞌ nxuun neꞌ nasiyun re loꞌo neꞌ xka nasiyun, kwiꞌ ngwañaꞌan kaja chaꞌ ꞌwan chaꞌ nxuun neꞌ nasiyun tijyuꞌ. Ja kutsen wan bra kanꞌ. Ndiꞌin chaꞌ ka ngwañaꞌan, xa nu ti ji tyii chalyuu bra kanꞌ. 7 Xuun taꞌa nten re loꞌo neꞌ xka laꞌa tsuꞌ, kwiꞌ ngwañaꞌan xuun taꞌa nten ska kichen tnun loꞌo neꞌ xka kichen tnun. Kanꞌ ka jwiꞌñan ꞌin neꞌ, kan kicha nu xñi ꞌin nchga nten, kwiꞌ lye ꞌa kiñan chalyuu bra kanꞌ. 8 Nchga chaꞌ kanꞌ ka bra nu tyisnan ti ta Ndiose nu tiꞌí ꞌin nten chalyuu, siꞌi chaꞌ wa mdyii chalyuu bra kanꞌ.

9 ’Bra nu tyisnan chaꞌ kuxi kanꞌ ni, xñi neꞌ ꞌwan chaꞌ ta neꞌ nu tiꞌí ꞌwan; chka tiꞌ neꞌ kujwi neꞌ ꞌwan, chaꞌ ndiya neꞌ ñaꞌaan chalyuu nu ka tiꞌí tiꞌ ꞌwan chaꞌ ꞌñaǎn. 10 Kanꞌ chaꞌ tyun neꞌ taꞌa wan ka ndaja tiꞌ neꞌ loꞌoǔn, ja talo ꞌa neꞌ chaꞌ ndyaa ñaꞌan tiꞌ neꞌ chaꞌ ꞌñaǎn bra kanꞌ. Kwiꞌ ngwañaꞌan, ndiya neꞌ taꞌa wan nu kujwiꞌ xuꞌwa neꞌ ꞌin taꞌa wan yaꞌ neꞌ xaꞌan, kwiꞌ ndiya nu ka tiꞌí tiꞌ ꞌin taꞌa wan bra kanꞌ. 11 Kwiꞌ ngwañaꞌan, tyoꞌo tukwa kaꞌan neꞌ kwiñi, nu chkwiꞌ chaꞌ ꞌin Ndiose, nchkwin neꞌ. Kwiñi lyoꞌo neꞌ kanꞌ ꞌin tyun neꞌ taꞌa wan, nu lka wan nten ꞌñaǎn. 12 Kaꞌan ꞌa chaꞌ kuxi ka, nu kuꞌni chaꞌ ja chka tꞌnan tiꞌ wan ꞌin taꞌa nten wan. 13 Loꞌo ja kuwe tiꞌ wan, nchga wan nu talo wan chan ꞌin chaꞌ kuxi kanꞌ, kulaǎn ꞌwan bra kanꞌ, xa nu wa tyii chalyuu ―ndukwin Jesús―. 14 Ndiꞌin chaꞌ kwaꞌu wan chaꞌ ꞌñaǎn ꞌin nten, nchga chaꞌ suꞌwe nu nchkwiǐnꞌ, sa ñaꞌan ka bra nu lka Ndiose ndloo niꞌ kasiya ꞌin nten; ndiꞌin chaꞌ chkwiꞌ wan chaꞌ kanꞌ loꞌo nten ñaꞌaan chalyuu, chaꞌ ka biyaꞌ tiꞌ neꞌ nchga nasiyun chaꞌ kanꞌ. Kanꞌ tyii chalyuu bra kanꞌ ―ndukwin Jesús ꞌin neꞌ―.

15 ’Ayman Daniel nu ykwiꞌ chaꞌ ꞌin Ndiose loꞌo nten ti sꞌni, wa ykwiꞌ yu chaꞌ ꞌin ska nkwin nu kuxi ꞌa, ska nan nu kuꞌni ñuꞌun ꞌin nchga nan nu luwi. ―Ka biyaꞌ tiꞌ wan chaꞌ kanꞌ, bra nu chkwiꞌ wan lo kityi re―. Bra nu ñaꞌan wan chaꞌ nduun nkwin nu kuxi kanꞌ nde seꞌen kti ꞌa niꞌ lyaa tnun kanꞌ ―ndukwin Jesús―, 16 ka biyaꞌ tiꞌ wan bra kanꞌ chaꞌ suꞌwe la si xnan nchga wan nu ndiꞌin lo yuu ꞌin Judea re, xnan lya wan chaꞌ xuꞌwi kutsiꞌ wan lo kiꞌya. 17 Nten nu nduun ke naꞌan ꞌin neꞌ tsan kanꞌ, ja laa ꞌa neꞌ sten neꞌ niꞌ ñaꞌan chaꞌ kulo neꞌ suꞌwa neꞌ; ndiꞌin chaꞌ kiꞌya neꞌ kanꞌ lyuu ndla, chaꞌ xnan neꞌ bra ti. 18 Kwiꞌ ngwañaꞌan nten nu ndiꞌin niꞌ kixinꞌ ni, ja laa ꞌa neꞌ xitukwi neꞌ tyaan neꞌ naꞌan tyi neꞌ, chaꞌ tyaan yꞌya neꞌ teꞌ kichanꞌ ꞌin neꞌ; ndiꞌin chaꞌ xnan neꞌ ndla bra kanꞌ. 19 ¡Tꞌnan ꞌa nu kunaꞌan tnan bra nu tiya tsan kanꞌ! ¡Tꞌnan ꞌa nu kunaꞌan nu nsuꞌwi kuwiꞌ kuneꞌ nu ti ngatiꞌ ꞌin bra kanꞌ! 20 Suꞌwe la jñan wan chaꞌ ꞌin Ndiose, chaꞌ ja ndiꞌin chaꞌ xnan wan bra nu tiya tsan nu ka tlyaꞌ; kwiꞌ jñan wan chaꞌ ꞌin Ni chaꞌ ja ndiꞌin chaꞌ xnan wan tsan taꞌa nu nxitñaꞌ neꞌ. 21 Bra nu ndiꞌin chaꞌ xnan wan ni, kanꞌ lye ꞌa tyijin nten chalyuu nu tiꞌí. Ja ya tyijin nten nu tiꞌí ngwañaꞌan, ti bra nu ngwiñan Ndiose chalyuu sa bra ni; loꞌo ngwañaꞌan, ja tyijin ꞌa nten nu tiꞌí ngwañaꞌan nde loo la. 22 Wa ykwiꞌ Ndiose chaꞌ chinꞌ ti tsan tyijin neꞌ nu tiꞌí ngwañaꞌan; si chan talo tyempu kuxi kanꞌ, ja ska ꞌa nten chalyuu tyoꞌo laa neꞌ bra kanꞌ. Loꞌo kuꞌni Ni chaꞌ chinꞌ ti tsan talo tyempu kuxi kanꞌ, chaꞌ chka tꞌnan ꞌa tiꞌ Ndiose ñaꞌan Ni ꞌin nten ꞌin Ni.

23 ’Xa nu tiya bra kanꞌ, si chkwiꞌ nten: “Ñaꞌan wan nde re, nde wa ngala Krixtu”, ja kunan wan chaꞌ kwiñi nu nchkwiꞌ neꞌ kanꞌ. Ti kwiꞌ ti chaꞌ, si ndiya nten nu chkwiꞌ chaꞌ re: “Wa ngala Krixtu kichen kwa”, ja kunan ꞌa wan bra kanꞌ, 24 chaꞌ Krixtu kwiñi ka yu kanꞌ. Kwiꞌ ngwañaꞌan, tyoꞌo tukwa neꞌ kwiñi nu chkwiꞌ chabiyaꞌ ꞌin Ndiose, nchkwin neꞌ; kwiñi ti kuꞌni neꞌ kanꞌ chaꞌ tnun chaꞌ kuwe ꞌa tiꞌ nten. Loꞌo kuꞌni neꞌ kwiñi kanꞌ ngwañaꞌan, chaꞌ nchka tiꞌ neꞌ kuꞌni neꞌ kanan ꞌwan loꞌo ꞌin nchga nten nu wa ngulo suwi Ndiose ꞌin. 25 Wa ytsaǎnꞌ chaꞌ kanꞌ ꞌwan ni, xa nu ti ji ti ka chaꞌ kuxi kanꞌ, 26 chaꞌ ja tukwa ꞌa wan chaꞌ ꞌin neꞌ si chkwiꞌ neꞌ chaꞌ re loꞌo wan: “Tsaan seꞌen ndiꞌin Krixtu, chaꞌ ndiꞌin yu niꞌ kixinꞌ kwa ni.” Ja tsaa wan loꞌo neꞌ bra kanꞌ. Loꞌo ja kunan wan si chkwiꞌ neꞌ chaꞌ re loꞌo wan: “Mnan ti ndiꞌin yu niꞌ ñaꞌan kwa ni.” Ja xñi wan chaꞌ nu chkwiꞌ neꞌ kanꞌ siyaꞌ ti. 27 Sa ñaꞌan lka nxtyi xaa ndyuwi ñaꞌaan niꞌ kwan, chaꞌ ñaꞌan nchga nten ꞌin ran, ngwañaꞌan ka xa nu tiyaǎn xiyaꞌ, naꞌ nu wa msuꞌwa Stiǐn ꞌñaǎn chaꞌ ndijyaǎn chaꞌ kaǎn nten. 28 Kunan wan chaꞌ re: La seꞌen ndiꞌin nan tukun, la kanꞌ kiꞌya laxu bra kanꞌ.

29 ’Xa nu wa mdyii tsan nu ndiꞌin chaꞌ ka nu tiꞌí ꞌin neꞌ, bra ti ka tla lo kwichaa, kwiꞌ ngwañaꞌan ja ka xaa lo koꞌ bra kanꞌ. Kalu kwii kulasiin nu ndukwi niꞌ kwan la lyuu; kwiꞌ ngwañaꞌan, kiñan nchga nan nu nsuꞌwi niꞌ kwan. 30 Tyoꞌo tukwa biyaꞌ nu xtyaǎn niꞌ kwan bra kanꞌ, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten. Lye ꞌa ka xiꞌin tiꞌ nchga nten chalyuu nu ndiꞌin nchga kichen, kunan neꞌ bra kanꞌ. Loꞌoǔn nu wa ndijyaǎn chaꞌ kaǎn nten ni, ñaꞌan neꞌ ꞌñaǎn chaꞌ ndijyaǎn laja koo nu ngaten ꞌa; tnun ꞌa chaꞌ ka bra kanꞌ, chaꞌ loꞌo nchga chabiyaꞌ ꞌñaǎn kaǎn. 31 Bra nu lye kanen kuwi, bra kanꞌ kuloǔn tñan ꞌin kaꞌan ꞌa angajle ꞌñaǎn chaꞌ tsaa xoꞌ tiꞌin ꞌin nchga nten nu wa ngulo suwi Ndiose ꞌin; tyoꞌo neꞌ kanꞌ la seꞌen ndiꞌin nten ñaꞌaan chalyuu kan neꞌ tloo Ni bra kanꞌ.

32 ’Ndiya ska chaꞌ nu ka kuꞌni xaꞌaan, bra nu ñaꞌaan ska yka, ni siya yka nstin, ni siya xka la yka kwiñii. Bra nu tyisnan tyukwa nstin, bra kanꞌ tyoꞌo tukwa kuten yka kanꞌ; jlyo tianꞌ chaꞌ wa ndla ti kiꞌya tyoo bra kanꞌ. 33 Kwiꞌ ngwañaꞌan, bra nu ñaꞌan wan tyoꞌo tukwa nchga nan nu ykwiǐnꞌ loꞌo wan tsan, bra kanꞌ ka biyaꞌ tiꞌ wan chaꞌ wa ndla ti tyii chaꞌ re. 34 Chañi chaꞌ nu chkwiǐnꞌ loꞌo wan ni, chaꞌ ja ya kaja nchga nten nu nsuꞌwi chalyuu ni, bra nu ka chaꞌ nu wa ykwiǐnꞌ tsan. 35 Tyii nchga nan nu nsuꞌwi niꞌ kwan, tyii chalyuu re, loꞌo ja tyii siyaꞌ ti chaꞌ nu nchkwiǐnꞌ re, chaꞌ xkwiꞌ chañi lka chaꞌ nchkwiǐnꞌ ―ndukwin Jesús ꞌin neꞌ.

36 ’Tsan kanꞌ, ja tukwin ka jlyo tiꞌ ni tsan ka, ni bra ka kanꞌ; ja jlyo tiꞌ angajle, kwiꞌ naꞌ nu lkaǎn ska ti nu lka Sñiꞌ Ndiose, ja jlyo tiǎnꞌ. Ska ti Stiǐn Ndiose jlyo tiꞌ Ni chaꞌ kanꞌ.

37 ’Sa ñaꞌan ngwa bra nu mdiꞌin ayman Noé chalyuu ti sꞌni, ngwañaꞌan ka tsan nu kaǎn naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten; ja ka biyaꞌ tiꞌ nten ni tsan ka chaꞌ kanꞌ. 38 Sa ñaꞌan ngwa chaꞌ ꞌin Noé kanꞌ bra nu ja ya kiꞌya tyoo tlyaa, ngwañaꞌan ka tsan kanꞌ. Sa ñaꞌan nu yꞌni nten chalyuu sꞌni: yꞌni neꞌ taꞌa, yku neꞌ, yiꞌo neꞌ, mjwi kwilyoꞌo neꞌ; ja ska chaꞌ yuwe tiꞌ neꞌ siyaꞌ ti, sa ñaꞌan bra nu yten Noé kanꞌ niꞌ yka naꞌan ꞌin yu. 39 Ja mgii ꞌa tiꞌ neꞌ bra nu mdyisnan ngwiꞌya tyoo tlyaa. Loꞌo mdyii chaꞌ ꞌin nchga neꞌ kanꞌ, chaꞌ ja ynan neꞌ chaꞌ nu ykwiꞌ Ndiose. Kwiꞌ ngwañaꞌan ka tsan nu kaǎn naꞌ nu wa msuꞌwa Ndiose ꞌñaǎn chaꞌ ndijyaǎn chaꞌ kaǎn nten, ja kii ꞌa tiꞌ neꞌ ni tsan ka kanꞌ. 40 Tsan kanꞌ, bra nu ndaꞌan tukwa nten niꞌ kixinꞌ chaꞌ kuꞌni tñan, bra kanꞌ tyaa loꞌo angajle ꞌin ska yu kanꞌ, kanun xka yu bra kanꞌ; 41 kwiꞌ ngwañaꞌan tsan kanꞌ, bra nu ndiꞌin tukwa nu kunaꞌan ska ti niꞌ ñaꞌan chaꞌ koo neꞌ, bra kanꞌ tyaa loꞌo angajle ꞌin ska ti neꞌ, kanun xka neꞌ bra kanꞌ ―ndukwin Jesús ꞌin neꞌ―.

42 ’Kanꞌ chaꞌ ndii ti tiꞌ wan tyiꞌin wan, chaꞌ ja jlyo tiꞌ wan siyaꞌ ti ni tsan ka nu kan ti kwiꞌ nu nka Xꞌnan wan. 43 Ñaꞌan tiꞌ ska xꞌnan naꞌan, si wa ngii tiꞌ yu ni bra ngwa tla kan nten nu kuꞌni kunan naꞌan tyi yu, ja chan ndii ti tiꞌ yu ndiꞌin yu naꞌan tyi yu bra kanꞌ, chaꞌ ja ta yu chabiyaꞌ sten nu kuꞌni kunan kanꞌ niꞌ ñaꞌan tyi yu. 44 Kanꞌ chaꞌ nchga tsan ndiꞌin chaꞌ ndii ti tiꞌ wan tyiꞌin wan lo chalyuu, chaꞌ ja chan bra ti tyoꞌo tukwaǎn kaǎn, naꞌ nu wa msuꞌwa Ndiose ꞌñaǎn ndijyaǎn chaꞌ kaǎn nten. ¿Ni sa ñaꞌan kuꞌni wan si ja ndiꞌin wan ndii ti tiꞌ wan bra kanꞌ? ―ndukwin Jesús ꞌin neꞌ―.

45 ’¿Ta ndiya nten ꞌwan nu tyukwi ti tiye nchka tiꞌ kuꞌni tñan ꞌñaǎn a? Nde lka chaꞌ nu kuꞌni wan sikwa: Ska msu nu suꞌwe ni, ta xꞌnan yu tñan ꞌin yu chaꞌ ka yu ndloo niꞌ ñaꞌan ꞌin xꞌnan yu; kulo xꞌnan yu tñan ꞌin yu chaꞌ xku yu ꞌin nchga nten nu ndiꞌin niꞌ ñaꞌan kanꞌ, ni siya ja ndiꞌin xꞌnan neꞌ. 46 Suꞌwe ꞌa ka tiye msu kanꞌ bra nu kan xꞌnan yu xiyaꞌ, si chañi chaꞌ ti ngiꞌni yu tñan nu wa ngulo xꞌnan yu ꞌin yu. 47 Chañi chaꞌ nu nchkwiǐnꞌ loꞌo wan ni, chaꞌ tlyu la tñan ta xꞌnan yu ꞌin msu kanꞌ, chaꞌ ka yu ndloo ꞌin nchga tñan nu nsuꞌwi ꞌin xꞌnan yu bra kanꞌ. 48 Ska msu nu ndaja tiꞌ ni, nsuꞌwi tñan nu ngulo xꞌnan yu ꞌin yu, loꞌo ja nduwe tiꞌ yu. “Ja kan ndla xꞌnaǎn” nxkeꞌ tiꞌ yu, kanꞌ chaꞌ bra ti kiꞌya ska chaꞌ kuxi ke yu. 49 Kanꞌ tyisnan yu kuꞌni yu chaꞌ chen ñaꞌan, kuꞌni tlá yu ꞌin taꞌa msu yu; tsaa yku yu, tsaa yiꞌo yu loꞌo taꞌa kuꞌwi yu bra kanꞌ. 50 Loꞌo kanꞌ kan xꞌnan msu xaꞌan kanꞌ ska tsan nu ja ndii tiꞌ yu kanꞌ, chaꞌ ja jlyo tiꞌ msu kanꞌ sa ñaꞌan bra tyoꞌo tukwa xꞌnan yu xiyaꞌ. 51 Lye ꞌa ta xꞌnan yu nu tiꞌí ꞌin yu kanꞌ bra kanꞌ, sa ñaꞌan yaꞌ nu kaja yu. Kulo xꞌnan yu tñan ꞌin yu, chaꞌ tsaa yu lo jwlyaa seꞌen ja tyii chaꞌ tyijin neꞌ nu tiꞌí. Lye ꞌa xiꞌya neꞌ, kwiꞌ lye ꞌa ku liꞌya neꞌ chaꞌ kasinꞌ tiꞌ neꞌ. Suꞌwa ti tsaa yu loꞌo neꞌ kwiñi nu tukwa chaꞌ nka tiye ―ndukwin Jesús―.