5
Nten nu mjwi chabiyaꞌ chkwiꞌ lo kityi nu mdukwa yaꞌ Ndiose
Chunꞌ ndiꞌin la naꞌaǎn chaꞌ ndiya ska kityi yaꞌ laꞌa seꞌen kwin ꞌin yu kula nu nka ndloo, ti kwiꞌ nu ndukwa lo yka xlya tnun kanꞌ bra kanꞌ. Ska kityi nu mtu ti nchkunꞌ lka ran; loꞌo ngwañaꞌan, taꞌa tyukwaa chunꞌ kityi kanꞌ, wa ndukwa chaꞌ nu ngwaꞌan Ndiose. Kati seꞌen nchkunꞌ tuꞌwa kityi kanꞌ loꞌo kiñaꞌ bra kanꞌ. Loꞌo naꞌaǎn chaꞌ nde kwa nduun ska nten nu ngula tiꞌ, ska angajle ꞌin Ndiose bra kanꞌ. Kwen ꞌa msiꞌya angajle kanꞌ:
―¿Ti ka nu ndiya chabiyaꞌ ꞌin chaꞌ xtun kiñaꞌ nu nchkunꞌ tuꞌwa kityi mtu kanꞌ, chaꞌ slaa kityi kanꞌ a? ―ndukwin angajle kanꞌ.
Loꞌo ja mjwi nu slaa kityi chaꞌ chkwiꞌ chaꞌ nu ndukwa lo ran, ni siya ñaꞌaan seꞌen ndiꞌin Ndiose, ni siya ñaꞌaan lo chalyuu, ni siya ñaꞌaan xka chalyuu seꞌen tsaa nten nu wa ngujwi. Lye ꞌa ynaǎn bra kanꞌ, chaꞌ ja mjwi nu slaa kityi chaꞌ chkwiꞌ neꞌ lo ran. Kanꞌ chaꞌ mdyisnan ykwiꞌ ska yu kula loꞌoǔn:
―Ja kunaan ꞌaa ni ―ndukwin―. Wa mjwi nu slaa kityi kanꞌ, nu ka ꞌin xtun kiñaꞌ nu nchkunꞌ tuꞌwa kityi kanꞌ. Ti kwiꞌ Ni kanꞌ lka nu ngula la tiꞌ ꞌin taꞌa yu Juda, chaꞌ ti kwiꞌ taꞌa nten ꞌin ayman David lka Ni. Wa mdijin lyo Ni ꞌin kuneꞌ xaꞌan, kanꞌ chaꞌ ni, ka ꞌin Ni slaa Ni kityi kanꞌ bra kanꞌ.
Loꞌo naꞌaǎn nduun ska nten; ñaꞌan tiꞌ ska slyaꞌ kuneꞌ, ngwañaꞌan ñaꞌan nten kanꞌ. Nduun Ni kanꞌ tloo seꞌen tnun seꞌen ndukwa Ndiose, ti kwiꞌ seꞌen nduun taꞌa yu kula kanꞌ, ti kwiꞌ seꞌen ndiꞌin ꞌni kti kanꞌ. Ti chkanꞌ seꞌen ndukwa biyaꞌ chunꞌ Ni ti bra nu yjwi nten ꞌin Ni ska yaꞌ. Ndukwa kati yka ke nu lka ñaꞌan tiꞌ slyaꞌ kanꞌ, kanꞌ lka Jesús. Kwiꞌ ngwañaꞌan, ndukwa kati kiloo; kiloo ꞌni, kanꞌ lka kati kwiꞌin luwi kanꞌ nu lka Tyiꞌi Ndiose nu ndyoꞌo ndyaa tyukwi ñaꞌaan chalyuu. Chunꞌ ndiꞌin la ndyaa nu lka ñaꞌan tiꞌ slyaꞌ kanꞌ, ndyaa yꞌya kityi nchkunꞌ nu ndiꞌin yaꞌ laꞌa seꞌen kwin ꞌin yu kula nu nka ndloo, nu ndukwa seꞌen tnun kanꞌ. Xa wa msñi Ni kityi kanꞌ, mduun xtyinꞌ taꞌa jakwa ꞌni kti kanꞌ bra kanꞌ; kwiꞌ ngwañaꞌan, taꞌa kala ndukwa jakwa yu kula kanꞌ, mduun xtyinꞌ yu tloo nu lka ñaꞌan tiꞌ slyaꞌ kanꞌ bra kanꞌ. Loꞌo snen ndukwa yaꞌ taꞌa yu kula kanꞌ, loꞌo xkuu oro ndukwa yaꞌ yu kula kanꞌ. Nsuꞌwi ynan nu nchkin niꞌ xkuu kanꞌ. Sa ñaꞌan lka bra nu nskwa tyiꞌi ynan nchkin kanꞌ, kwiꞌ ngwañaꞌan tsaa chaꞌ nu chkwiꞌ nten chalyuu nde seꞌen ndiꞌin Ndiose bra nu nchkwiꞌ nten ꞌin Ndiose loꞌo Ni. Loꞌo ngala tuꞌwa nchga nu nduun xtyinꞌ kanꞌ ska kantu chaꞌ kuꞌni tnun neꞌ ꞌin nu lka ñaꞌan tiꞌ slyaꞌ kanꞌ bra kanꞌ. Loꞌo ja ya kunaǎn kantu re nu ngala tuꞌwa neꞌ kanꞌ:
Wa nda Ndiose chabiyaꞌ ꞌin nuꞌwin chaꞌ xñii kityi nchkunꞌ kwa, ndukwin neꞌ, chaꞌ xtuun kiñaꞌ nu nchkunꞌ tuꞌwa kityi kwa.
Nan wa yjwi nten ꞌiin ska yaꞌ; loꞌo chunꞌ chaꞌ ngujwii ni, wa yꞌnii tñan chaꞌ ꞌwa, chaꞌ ka ba nten ꞌin Ndiose Sti ba bra kanꞌ.
Ndiya nten nu ndyoꞌo nchga kichen tyi neꞌ, ndiya nten nu nchkwiꞌ nchga lo chaꞌ nu nchkwiꞌ nten chalyuu,
ndiya nten nu ndyoꞌo tyukwi ñaꞌaan chalyuu seꞌen ndiꞌin nten, kanꞌ lka nten nu nguloo suwii ꞌin bra kanꞌ.
10 Nuꞌwin wa yꞌnii chaꞌ ka neꞌ kanꞌ ska lo nten nu ndloo ꞌa chaꞌ ꞌin Ndiose Stian, chaꞌ ka kuꞌni neꞌ tñan nu nchka tiꞌ Ni chaꞌ ka.
Loꞌo ngwañaꞌan, ka neꞌ kanꞌ ndloo tyukwi ñaꞌaan lo chalyuu bra kanꞌ.
11 Xa wa mdyii nganen kantu kanꞌ, xiyaꞌ naꞌan kwiꞌyaǎn la kwa bra kanꞌ. Kwiꞌ ynaǎn ngala tuꞌwa tyun ꞌa mi angajle ꞌin Ndiose; nde chunꞌ seꞌen ndukwa yka xlya tnun, nde chunꞌ seꞌen nduun ꞌni kti kanꞌ, nde chunꞌ seꞌen nduun yu kula kanꞌ, la kwa nduun kaꞌan ꞌa angajle bra kanꞌ, kwenta miyun angajle nduun kanꞌ. 12 Loꞌo kwen ꞌa ngala tuꞌwa angajle kanꞌ bra kanꞌ:
Wa yjwi nten ꞌin nu lka ñaꞌan tiꞌ slyaꞌ kanꞌ ska yaꞌ, ndukwin angajle. Siꞌya nten chalyuu, kanꞌ chaꞌ ngujwi Ni.
Loꞌo ni, ndiꞌin chaꞌ chkwianꞌ chaꞌ ꞌin Ni, chaꞌ nchga lo tñan nchka ꞌin Ni kuꞌni Ni siyaꞌ ti; kwiꞌ ngwañaꞌan, nan ꞌin Ni lka nchga lo nan siyaꞌ ti.
Nchga chaꞌ jlyo tiꞌ Ni, nchga tñan nchka ꞌin Ni; kanꞌ chaꞌ kuwe ꞌa tianꞌ ꞌin Ni, kwiꞌ kuꞌniin tnuan ꞌin Ni, kwiꞌ suꞌwe ꞌa chkwianꞌ chaꞌ ꞌin Ni loꞌo nten.
Ngwañaꞌan yla tuꞌwa angajle kanꞌ bra kanꞌ.
13 Loꞌo nganen ngala tuꞌwa nchga nten, nchga ꞌni nu ngwiñan Ndiose; ni siya nde niꞌ kwan seꞌen ndukwa Ni, ni siya lo chalyuu re, ni siya xka chalyuu seꞌen tsaa nten nu wa ngujwi, ni siya lo tujoꞌo, nchga nten kanꞌ ngiꞌni tnun neꞌ ꞌin Ndiose. Nde ndiya chaꞌ nu nchkwiꞌ neꞌ bra kanꞌ:
Kuꞌniin tnuan ꞌin ti kwiꞌ Ni nu ndukwa lo yka xlya tnun kwa, ndukwin neꞌ, suꞌwe ꞌa chkwianꞌ chaꞌ ꞌin Ni, ndukwin neꞌ bra kanꞌ.
Kwiꞌ ngwañaꞌan nu lka ñaꞌan tiꞌ slyaꞌ kanꞌ, kuꞌniin tnuan ꞌin Ni.
Kwiꞌ ska ti Ndiose nsuꞌwi chabiyaꞌ kuꞌni nchga lo tñan siyaꞌ ti; loꞌo ja tsaa tii ꞌa chaꞌ ꞌin Ndiose siyaꞌ ti, ndukwin neꞌ bra kanꞌ.
14 Taꞌa jakwa ꞌni kti kwa ni, mxkwen iꞌ ꞌin neꞌ bra kanꞌ:
―¡Ngwañaꞌan ka sikwa! ―ndukwin iꞌ bra kanꞌ.
Loꞌo mduun xtyinꞌ nu kala ndukwa jakwa yu kula kanꞌ, ngiꞌni tnun yu ꞌin Ndiose, chaꞌ luꞌu Ni nchga tyempu siyaꞌ ti.