2 San Juan
Mamabʉinore coyʉiyebu Juan mácʉ ʉ̃i toivacaiye báquede iyoca mamayoca yóbocayoca ʉ̃i paperayocare. Juan mácʉ barejaquémavʉ judíovacacʉ, Galilea ãmicʉrijoborõcacʉ, aru Jesús ʉ̃i yávaiye méne beorĩ coyʉicõjeimaracacʉ. Ʉ̃i mamicʉ Santiago bácʉque moa boaipõecʉ bácʉ barejaquémavʉ, Jesúi órejaquiye jipocare ʉ̃ mácʉre. Lucas bácʉ coyʉrejaquemavʉ Juan mácʉi borore Hch 3:1-4:22. Majidivʉ ne dápiaiyepe, toivacarejaquemavʉ diyocare ʉ̃ mácʉ cʉcʉ bácʉ Éfeso ãmicʉriĩmaroi, ne coreóvaiye boje ʉ̃ mácʉ Éfesocavʉ Jesúre jʉ aipõevare coreipõecʉ bácʉre. Apevʉ ne dápiaiyepe, ico jʉ aipõeco báco aru õi mára mácavʉ, ʉ̃i toivacaimara mácavʉ, Partia ãmicʉrijoborõcavʉ barejaquémavʉ. Põecʉ cʉbebi majicʉ ye ʉjʉ ʉ̃i toivacaiʉjʉ bácarõre diyocare, ʉbenita obedivʉ ne dápiaiyepe ãniʉjʉa báquede 87-90 d.C. baji, ʉ̃i toivaquiye jipocare ʉ̃i coyʉiyede Jesucristorã aru Jesucristoi jã́d̶ovaiye báquede ʉ̃ mácʉre, ʉbenita ʉ̃i toivacarĩburu yóbore ʉ̃i mamayoca paperayocare.
Toivacarejaquemavʉ Jesúre jʉ aipõevare, ne ʉrãjiyepe ayʉ Jʉ̃menijicʉre aru apevʉ Jesúre jʉ aipõevare máre, aru ne majinajiyepe ayʉ aipe d̶aiye jaʉrõre jʉjovaivʉque, ina Jesúre jʉ aivʉpe teniduivʉque.
1
Bueiye jãve aru jãve ʉe máre
(Jn 13.34; 14.15, 23-24; 15.12, 17; 1 Jn 5.3; 3 Jn 3)
Yʉ, bʉcʉcʉ, Jesucristore jʉ aivʉre coreipõecʉ, toivacaivʉ mʉre, jíco, Jʉ̃menijicʉi beoimore aru mímarare máre. Meaicõjeivʉ mʉjare. Yʉ́vacari jãve ʉvʉ mʉjare, maje coreóvaiye boje Jʉ̃menijicʉi yávaiyede jãvene. Aru yʉ cũinácʉra ãmevʉ ʉcʉ mʉjare. Ʉbenita caivʉ ina coreóvaivʉ Jʉ̃menijicʉi yávaiyede jãvene, na máre ʉrivʉbu mʉjare. Ñʉja ʉrivʉbu mʉjare, ñʉje majié boje Jʉ̃menijicʉi yávaiyede jãvene. Que baru caivʉ maja cʉrivʉbu majidivʉ iye yávaiyede jãvene caride. Aru cainʉmʉa cʉrãjaramu maja dieque. Maje cʉede ijãravʉi cʉrãjaramu maja me, coreóvaivʉ Jʉ̃menijicʉi yávaiyede jãvene aru ʉrivʉ majevʉre. Majepacʉ Jʉ̃menijicʉ, mamacʉ Jesucristomaque, mearo d̶acacʉyʉme majare bojecʉbeda ʉ̃i me boje, ʉ̃i cõmaje ãroje jã́iyede aru ʉ̃i cãrijimene cʉre d̶aiyede máre.
Majivʉ yʉ apevʉ mímaracavʉre cʉrivʉre jʉ arĩ Jʉ̃menijicʉi yávaiyede jãvene yópe majepacʉ Jʉ̃menijicʉ ʉ̃i d̶aicõjeiyepe majare. Que baru pare torojʉvʉ yʉ ji ũmei. Aru mʉ, jíco, ji ʉmo, caride yʉ jẽniaivʉ mʉre. Ʉrãjarevʉ majevʉre, caivʉ maja Jesúre jʉ aivʉ. Yʉ toivacabevʉ mʉre apeno d̶aicõjeino mamarore. Quénora ji toivacaiye mʉre cũinátʉrʉbu no d̶aicõjeino mácarõ, maje jʉ aiye báque Jesúre mamarʉmʉre. Aru maja ʉrivʉ baru Jʉ̃menijicʉre, d̶arãjivʉbu caiyede yópe ʉ̃i d̶aicõjeiye báquepe. D̶aicõjeimi ʉ̃ majare apevʉre ʉrĩ cʉrivʉre. Mʉja jápiaivʉbu no d̶aicõjeino mácarõre, mʉje jʉ aiye báquede Jesúre mamarʉmʉre. Aru caride máre jʉ aivʉbu nopedeca.
Ina jʉjovaivʉ põevare
(Mt 7.15; 1 Jn 2.18, 22-23; 4.1-3, 15)
Obedivʉ jʉjovaivʉ cuivʉbu yore ijãravʉi. Nárecabu jʉ abevʉ Jesucristore jãve dayʉ bácʉre põecʉpe ijãravʉi. Ácʉ põecʉ que ayʉ baru, ʉ̃́recabe jʉjovayʉ põevare aru maucʉvacʉ Cristore máre. Me jã́jara mʉja, mʉje bíjabenajiyepe aivʉ yo bojed̶aino jaʉrõre mʉjare, mʉje memecaiye boje. Quénora me d̶ajarã mʉja, cʉvarãjivʉ caino no bojed̶aino jaʉrõre mʉjare.
Aru ácʉ põecʉ buebecʉ yópe Jesucristo ʉ̃i bueiye báquepedeca quénora bueyʉ baru ape bueiyede Jesúi bueiye báquede jarʉvarĩ, ʉ̃́recabe yóvabecʉ Jʉ̃menijicʉre. Ʉbenita ácʉ põecʉ bueyʉ baru yópe Jesucristo ʉ̃i bueiye báquepedeca, ʉ̃́recabe yóvayʉ Jʉ̃menijicʉre aru Jʉ̃menijicʉi mácʉre máre. 10 Ácʉ põecʉ buecʉdayʉ baru mʉje yebai ape bueiyede Jesúi bueiye báquede jarʉvarĩ, ñaine copʉ etabejarã mʉje cʉ̃ramiai aru jacoyʉbejarã ʉ̃́re. 11 Que teni ʉ̃́re jacoyʉivʉ baru, jʉ aivʉ ʉ̃i bueiye borocʉede, yóvaivʉbu ʉ̃́que ãmeina d̶aivʉ.
Meaicõjeino
(3 Jn 13-14)
12 Apeno ʉrarõ coyʉinore coyʉiyʉvʉ mʉjare. Ʉbenita yore toivaiyʉbevʉ yʉ. Quénora napini coreivʉ yʉ jã́cʉdacʉyʉ mʉje yebai, yávacʉyʉ ji bajumiareca, maje bʉojarãjiyepe ayʉ torojʉrivʉ maje ũmei. 13 Mimamicoi mára, Jʉ̃menijicʉi beoimo mácoi mára, meaicõjed̶ama mʉre. Quénoramu.