1 Bapoxonae pirapae equeicha Jesús pijimonae tsita naitʉta Tiberias pucua itapatha. Poxonae pijimonae tsita naitʉta poxonae apara iche: 2 Jesús pijimonae tatsi nacaetuta. Barapo matabʉxʉyobe meje: Simón Pedro, irʉ Tomás pon icha wʉn Gemelo, irʉ Natanael Caná tomarapin, po tomara eca Galilea nacuatha, irʉ xan, Juan, irʉ taeweicho xua Zebedeo pexantobe tatsi panbe, irʉ ichʉnberʉ. Daxita barapo matabʉxʉyobe pan panacaetutan Tiberias pucua itapatha. 3 Simón Pedro pana jei:

—Tha duwei yamonaetsi, jei.

Paxan pajanje:

—Paxan irʉ paca puna ponaeinchi, pajan.

Bapoxonae jeratha daxita panonobabiyan. Ichitha barapo merawitha jopa duwei pataeinyo, bequein payamonan. 4 Poxonae baya pentha tsina, Jesús pana tsita naitʉta pitapathiya, tuwʉtha payana dubendenan. Ichitha paxan jopa payaitaeinyo xua bapon apara Jesús. 5 Nexata Jesús pana nebarai:

—Incane, ¿jopa pataem duwei? jei Jesús.

—Jume, duwei aibi, pajan.

6 Nexata Jesús pana barai, jeye:

—Jera coxa beya bara bepaxoyama peyacamonaewa. Bapoxonae pacapirenaename duwei, jei Jesús.

Baxua paexanan. Pirapae jopa pana itacʉpaeyo xua patajutaxorenaewa peyacamonaewa, poxoru pin duwei tunto pacapirenan. 7 Nexata xan, Juan, ponxaein bichocono Jesús neantobe, Simón Pedro baran, janje:

—Apara bapon Jesús, pon Wanacanamataxeinaein, jan.

Poxonae Simón Pedro nejume taeba, bapoxonae paparuwa xua nama xuenabota nainya yacuinaya nama xatataba. Bapoxonae mene weitata jopiya. 8 Ichitha paxan pomonae jopa paraichinyo jeratha pajebounan. Barapo jera be conotha tajʉ tuwʉtha berucuarena saya cien metrobe xeina. Bewayo pajeboundenan tsipei peyacamonaewa mentha yawa ducuapona pin duwei tunto. 9 Poxonae jera wepanonobabiyan, bapoxonae isoto patan xua barapo isototha duwein yʉtaboya yawano xua pan boquiya. 10 Jesús pana barai, jeye:

—Painta xawena duwei xuaunxuae pacaebouname, pana jei.

11 Simón Pedro jeratha nontabiya. Yawa taetabo itapa bejutabotsina peyamonaewa xua bichocono wʉnca duwei. Ciento cincuenta y tres po duwei matabʉxʉmonaebe. Bequein duwei bichocono wʉnca daichitha jopa ucupanayiyo peyacamonaewa. 12 Nexata Jesús pana barai, jeye:

—Antha matha paxaema, pana jei.

Paxan jiwana dapon aibi pon peyainyabinexa, pon pejeinexa: “¿Jintam xamda?” pon jei, tsipei daxita paxan payaitan xua bapon apara pon Patatanecanamataxeinaein. 13 Bapoxonae Jesús isoto bepoinya pepichinexa pan. Bapoxonae pana necatsiba yawa duwei pana necatsiba.

14 Baxua exana poxonae nama acoibi po cuiyobe xua Jesús pana netsita naitʉta xua poxonae equeicha asʉ popona petʉpae cuiru coyene weya.

15 Poxonae pana nain wetan xua Jesús pana apata, bapoxonae Simón Pedro, Jesús yainyaba, jeye:

—Simón, pon Juan pexantom, ¿bichocono neantobem, beyacaincha xua po pebiwe neantobe? jei.

—Aa, Tanecanamataxeinaem, bara caena bayatha neyaputaneme xua tacaantobewatsi bichocono, jei Pedro.

Jesús barai, jei:

—Icha neantobem, inta tamonae tana nejume cowʉntsiwi yawende, icha pon ovejaxi pe-eenaein ichi xua yawena ovejaxi, jei Jesús.

16 Equeicha Jesús barai Pedrotha, jeye:

—Simón, pon Juan pexantom, ¿bichocono neantobem? jei.

—Aa, Tanecanamataxeinaem, bara caena bayatha neyaputaneme xua bichocono tacaantobewatsi, jei Pedro.

Jesús jume nota, jeye:

—Icha neantobem, inta tamonae tana nejume cowʉntsiwi yawende, icha pon ovejamonae pe-eenaein ichi xua yawena ovejamonae, jei Jesús.

17 Equeicha acoibi po jume cuiyobe Jesús barai Pedrotha, jeye:

—Simón, pon Juan pexantom, ¿bichocono neantobem? jei.

Pedro jʉntʉ coyene wecoyei yaitama Jesús yainyaba acoibi po jume cuiyobetha. Pedro jeye Jesustha:

—Tanecanamataxeinaem, bayatha caena daxita yaputaibame. Mataʉtano yaputanemeno xua tacaantobewatsi, jei Pedro.

Jesús jume nota, jeye:

—Icha neantobem, inta tamonae pomonae tana nejume cowʉntsiwi yawende, icha pon ovejamonae pe-eenaein ichi xua yawena ovejamonae. 18 Xaniyan catsipaebatsi poxonae matha cataunxuae pewowim jinya paparuwa bara jincoutha namaxatabeibame. Mataʉtano matha bara poneibame xua ichaxota ba ichichipa neponaewa. Ichitha poxonae perum tsane, ichamonae camaxʉ cʉbiya yotsina. Ichʉn paparuwa cama xatatsina. Ichamonae camaxʉ caponaena ichaxota jopa ichipaem xua neponaewa, jei Jesús.

19 Poxonae Jesús baxua paeba Pedro wʉnae tsiwanaya cui yaputane exainchi xua jiwi eta bichi tsane poxonae Pedro bexubinchi. Mataʉtano Jesús tsiwanaya cui yaputane exana xua jiwi Nacom wʉnae jainchinchi xua poxonae jiwi taena xua po coyene cuirutha xua poxonae Pedro tʉpaena peexanaexae pocotsiwa Nacom itoroba. Bapoxonae Jesús jeye Pedrotha:

—¡Bara ataya yacuiya poponare xua tamonae jitom! jei Jesús.

20 Poxonae Pedro napatomeicha necota, bapoxonae netaenota xua punauncuan ponxaein Jesús bichocono neantobe. Xan apara bapon pon bayatha matha imoxoyo Jesús caquita xunaecan, poxonae matha jan: “Tanecanamataxeinaem, ¿jintam pon cacaenaetapaeba?” ponxaein matha jan. 21 Poxonae Pedro netane, bapoxonae jeye Jesustha:

—Tanecanamataxeinaem, ¿incane ponje tsanerʉ? jei Pedro.

22 Jesús Pedro jume notatsi, jeye:

—Icha xan tacoutha ichichipan xua bapon Juan bara ataya asʉ poponaena beya poxonae xua equeicha caewa patopeicaein po cae pin nacuathe, baxua jopa apara cata ainya cuiyo. Jamaisa xam bara ataya yacuiya poponde po coyene xua tamonae jitom, jei Jesús.

23 Daxota Jesús pijimonae tatsi, barapomonae neyabara tsiwʉn capana pijimonaetha xua xan jopa tatʉpaewa tsane. Ichitha Jesús jopa paebiyo xua jopa tatʉpaewa tsane. Saya apara jei: “Icha xan tacoutha ichichipan xua bapon bara ataya asʉ poponaena beya poxonae xua equeicha caewa patopeicaein po cae pin nacuathe, baxua jopa apara cata ainya cuiyo”, jei Jesús.

24 Xan, Juan, ponxaein xua Jesús yabara paeban. Daxita pocotsiwa xua xuan paeban, apara pexainyeiwan. Mataʉta barapo diborothe xan apara tinan, pon Juan tsocuaein. Bara paichim daxita xua xuan tinan payaputanemerʉ xua baxuan apara bara pexainyeiwan.

25 Awiya cui yapu seica xua tayabara tinaewa pocotsiwa Jesús daxita exana. Icha daxita diwesin tsana yabara titiniyaetsipan pocotsiwa Jesús exana, metha barapo diboron jopa po cae pin nacue tsijuntutu canaʉpaetsipaetsi.

Baja Juan.