TIMOTEOʼSE-NARMAKLESAD-GARDA-GEBED
1 TIMOTEO
GEBE-SOGLENAID
Garda-nug
Pablo, Timoteoʼse we-garda narmaksad, Timoteoʼga binsaed ukegar. Timoteo-e-neggwebur Listraʼye-nugad. E-nande, Judío-dolad. E-babdi, Griego-duled. Pablo na e-machiyobi Timoteo-daksad, birgaba eba bipirmakdii gusad. Timoteo, Pablo-sogedba bela ibmar imaksad, Bab-Igargi gwenadgan-odurdakdii gusad. Binsamardo, we-garda birga 61ʼgi narmakles-insaye.
Timoteoʼse-Narmaklesad-Garda-Gebedgi weyob sunmaklenaid
Pablo, Éfeso-neggweburgi Timoteo-obesgusad, adi, Jesúsʼba-nanaimalad gatik odurdakegar. Pablo ega sogsiid, igi-Jesúsʼba-nanaimalad nanamalargebe. Pablo, Timoteoʼga sogsabalid, dulemar-noar-odurdakdimalad be igar-gaoye. Ega sogsabalid, Jesúsʼba-nanaimalad-e-dummagan igi sulege. Sognaibardo, gwenadgan-idumalad gwenadgan-odurdakega, igi-nanaergebe. Timoteoʼga sogsabali, igi ome-ei-sui-burgwismaladga igar mai. Degine, Timoteoʼga sogsabalid: “Timoteoʼye, na be dukin nuekwaa dakmogoye, nue na be Bab-Dummad-Igargi nanamogoye.”
We-gardagine, weyob ilemakar sunmaklenaid:
1. Gebe-sikwas-soglenaid (1:1-2).
2. Noar-odurdakdimaladgi nue-salakarmarye (1:3-11).
3. Bab-Dummad Pablo-wiledaksad (1:12-20).
4. Pablo Babse-goled-igargi sunmaksad (2:1-15).
5. Jesúsʼba-nanaimalad-e-idumaladga-gued-e-igar (3:1-7).
6. Jesúsʼba-nanaimalad-bendakmalad weyob daergebed (3:8-13).
7. Bab-Jesús-Igar-napiragwad-maid (3:14-16).
8. Dulemar Bab-Jesús-Igargi bangudmaloed (4:1-5).
9. Jesucristoʼga-nued-arbaed-duled (4:6-16).
10. Jesúsʼba-nanaimalad igi-dule-baigangi daoe (5:1–6:2).
11. Dogdar maniginbi-binsaele, boniga guddaed (6:3-10).
12. Bab-Jesús-Igar bensulidgi alamakleged (6:11-19).
13. Napi-soglenaid: Pablo we-gardagi Timoteoʼga napi igar uksad (6:20-21).
Be itogua.
1. GEBE-SIKWAS-SOGLENAID
1
(1:1-2)
1 Ani Pablo, Jesucristo-e-sapin-bur-dummadga-gumogaga nugsalesmogadid. Bab-Dummad-anmar-Abonoged, a an-barmialid, degi, anmar-Dummad-Jesucristo anmar-bensulidgi-edarbediid, a-nuggi an barmilealidbalid. 2 Timoteo, we-garda na bese narmaked, be Bab-Jesúsʼba-naid-ular, an-machi-sunnadyob gunonikid.
Bab-Dummad-anmar-Baba, degi, anmar-Dummad-Jesucristo, begi nued binsamarsun, degine, wile be-dakbarsun, deginbali, ulubgi bogidik be-itogega imakbarsun.
2. NOAR-ODURDAKDIMALADGI NUE-SALAKARMARYE
(1:3-11)
3 Macedonia-yarse an naed-iduar igi bega an sogsa, Éfeso-neggweburgi be beoye, deyob gannar an bega sogbar, adi, dulemar-noar-odurdakdimaladga be sogegar, mer be Bab-Igar noar odurdakmarye. 4 Sergan-igar-nui-sunmaklemalad, degi, dadgan-e-anagan-dikasur-danimaladgi, mer egi be sunmakdii gumalo. We-igargan binsa unnila na abin-abin-imakmalad-igalad, Bab-igarsikdi gwen anmar-ogannogosulid. Bab-Dummad-Igar-Maiddi unnila bensulidgi abingaleged. Deyob be dulemar-odurdakoed.
5 We an bega igar-ukedi, adi, na be muchub-muchub nue-napiragwadgi gwage-swilidikidgi sabgumalagalad, degine, ulubgi akar-itosulidgi sabgumalagalad, deginbali, napiragwadgi Jesúsʼgi-bensulidbali na be sabgumarbaligalad. 6 Gwenna-gwenna dulemar weyob-sabgued-igargi bangudmalad. Agala, binsa yogasaar sunmakdemalad. 7 A-dulemardi, Moisés-Igar-Maid-odurdaked-nue-wisye sogdimalad. Ar degite, emarbela we-Igar-Maid amba aku itomalad, degine, wissurmarbalid, ibigi sunmakdimarbali.
8 Ar anmar nue-wismalad, Moisés-Igar-Mesisad, igar-nikaa anmar nue-ebudiile, igar-nuedid. 9 Anmar nue wisid, Bab-Dummad anmarga Moisés-Igar-Uksadi, dule-nuegangarsulid.
Unnila wemarga uklesad:
Dule-isganamarga,
dule-uaya-nikaadasurmaladga,
dule-Bab-Dummadgi-binsasurmaladga,
dule-isgudimaladga,
dule-Bab-Dummad-Igargangi-dododimaladga,
degi, Bab-Dummad-nuggi-dododimaladga,
dule-na-e-bab-oburgwemaladga,
na-e-nan-oburgwemaladga,
dule-aimar-gindakmaladga,
10 abirgunagwarsuli-negsichigi-yolemaladga,
omegiidmaladga,
machergangiidmaladga,
dule-emar-atursamaladga,
dule-gakansamaladga,
gakansaar-ise-sogar ibmar-samaladga,
degi, bela dulemar-Bab-Igargi-gwisgudimaladgar.
A-ular, Bab-Dummad amarga Moisés-Igar mesisad. Degisoggu, Moisés-Igar-Megisadi, bela dulemar Bab-Igargi-yoledimaladga megisad. 11 Bab-Dummad-nuedid E-Gayaburba-Nued-Birigined, an egi sunmakega anga uksad. Ar we-Gayaburbadi igar-nueganginbi dulemar-odurdaked.
3. BAB-DUMMAD PABLO-WILEDAKSAD
(1:12-20)
12 Emi Cristo-Jesús-anmar-Dummad-an-ogannogedga, dog-nuedye an soged. Ar angi-bengussulidba, ega arbaega an-nug-imaksad. 13 Epennedi, galagwensuli Jesucristoʼgi-dodoar an sunmakdii gusad, e-sapingan-baregindii an nanasad, degine, egi urwedii an nanasbalid. Degi-inigwele, Bab-Dummad wile an-daksad, ar ade, aku an ibmar-itogedba, amba an Bab-Jesús-bengudigusadba, an deyob gudii gusad. 14 Ar a-ular, anmar-Bab-Dummad ibiyobi bela-bela nued angi binsasa. Abali, Jesúsʼgi-bensuli-gued, degi, e-sabgued anga uknonikid. Ar Cristo-Jesúsʼgi anmar akanaid-ular, wemar bela anmarga uksad.
15 We gayaburba-napiragwadid, bela dulemar bensulidgi abingaewilubbid: “Cristo-Jesús bela dulemar-isgudimalad-abonogega we-napnegse noniye.” Ar andi bur bule amarba dule-isgusad-duled. 16 Ar an bur bule isgus-inigwele, Bab-Dummad nue-wile an-daknonikid, an-abonononikid. Adi, angin-inse Cristo-Jesús bela na e-sabgued-geg-bergued angi oyogegar. Degisoggu, e-wilubga an gunonisunnad, adi, dulemar-an-sorba-Jesucristoʼgi-benguosurguoed burba-geg-bergued-nikumaloedga, oyogegar.
17 Degisoggu, aga anmar-Rey-Dummad-degisadegu-maid, geg burgwed, a-e-nug odummolesun. We-Rey-Dummad sanar dakledisulidid, unnila abi bela-ibmar-wisimaidid, a e-nug odummolesun. Ar deyobdo.
18 Degisoggu, Timoteo, be an-machiyobsoggu, we-igar na bega uksunnad. Bab-Dummad-gayaburba-barsogmalad iduakwaa bato begi sogsamaladyob an bega sogmosunnad, adi, be nue-napiragwadgi-alamaknai guegar. Be nue salakar. 19 Gatik Jesucristoʼgi be bensuli guo, degine, ulubgi gwen-akar-itosuli be gudii guo. Gwenna-gwennadi weyob gwen imaksasurmarsoggu, galakudmarsunnad, Bab-Jesúsʼgi bangudmarsunnad. 20 Deyob Himeneo, degi, Alejandro gusmalad. Degisoggu, amar mer bar Bab-Dummadgi isdar sunmakmalaga, an nia-saila-Satanásʼga urmaksasunnad.