REYMAR-GARDA-SOGBOGWAD
2 REYES
GEBE-SOGLENAID
Garda-nug
Reymar-Garda-Sogbogwad. We-garda, Reymar-megismaladgi amba sunmaknaibalid.
Reymar-Garda-Sogbogwadgi weyob sunmaklenaid
We-gardagine, weyob ilemakar sunmaklenaid:
1. Elías, Rey-Ocozíasʼgi sunmaksad (1:1-18).
2. Eliseo, Elías-anar nug-imaklesad (2:1-25).
3. Eliseo-ibmar-imaksad (3:1–8:15).
4. Eliseo-burgwisadse, Judá-yargi, degi, Israel-yargi-neggusad (8:16–13:25).
5. Samaria-berguoedse, Judá-yargi, degi, Israel-yargi-neggusad (14:1–17:41).
6. Babiloniaʼse selesmaladse Judá-yargi-neggusad (18:1–25:30).
Be itogua.
1. ELÍAS, REY-OCOZÍASʼGI SUNMAKSAD
1
(1:1-18)
Rey-Ocozías-burgwisad
Rey-Acab-burgwisad-sorba, Moab-dulemar, Israel-dulemargi gwisgunoni gusad. Rey-Ocozías Samaria-neggweburgi, e-neg-aila-niba yawagak-bipigwadgi argwachagusad, degi, nue-nailikgusad. Geb degine, Ocozías dule-ega-gayaburba-berbemalad barmisad, weyob ega sogsad: “Baal-Zebubʼse be namar, Ecrón-neggwebur e-bab-dummadga-imakedse be egismalo, ande bule gannar nuguodibeye.”
Degi-inigwele, Bab-Jehová-e-baliwitur Tisbe-dule-Elíasʼga sogsad: “Samaria-e-rey-Ocozíasʼga gayaburba-berbemalad-abinguega be nae. Ega be sogo: ‘¿Ar Israel-yargi Bab-Dummad satesi? ¿Ibiga bemar ibmar wisguega Ecrón-neggwebur-e-bab-dummad-Baal-Zebubʼse be egisnadapmala?’ Nabir, Bab-Jehová weyob soged: ‘Napira an bega soged, Rey-nailikgumaidi, bar nuguosulid, burgoed.’ ”
Deyobi Elías, Bab-Jehová-e-baliwitur-ega-ibmar-sogsadba imaksad.
Reyga-gayaburba-berbemalad gannar nonimargua, rey amarga sogded:
—¿Bato be danibinmarde?
Geb abin-sogdemalad:
—Igarba anmar dule-wargwen-abingusad. A-dule weyob anmarga soged: ‘Rey-bemar-barmialidse gannar be namar, ega be sogmalo: Weyob Bab-Jehová sogye: ¿Ibiga ibmar wisguega Ecrón-neggwebur-e-bab-dummad-Baal-Zebubʼse be egise? ¿Israel-yargi Bab-Dummad satesi? Degisoggu, be-nailikgumaidi, bar be nuguosulid, be burgoed.’
Geb degine, rey amarse egisded:
—¿Dule, igarba-bemar-abingusad, degi, ibmar-bemarga-sogsad, igi-daklege?
Geb ega sogdemalad:
—A-dule, ibmar-durgan-absar-wawaad yoid, degi, moli-uka musirba naid.
Rey amar-abin sogded:
—¡Degirdi, we, Elías Tisbe-dule!
Geb degine, Rey-Ocozías, Elías-sunaega, sordamar-idued-wargwen, e-sordamar-dulabo-gakambegwad-abargi (50) yog-barmiar imaksad. Geb sordamar-idued nadsunnad, degi, dakdapid, Elías yar-birgi sii. Geb sordamar-idudiid Elíasʼga sogded:
—¡Bab-Dummad-e-dule, rey soged, be dagye!
10 Elías, sordamar-iduedga sogded:
—An Bab-Dummad-e-dule-sunnadiile, soo nibneg-akar aidedasun, adi, be, degi, be-sorda-dulabo-gakambegwad (50) bela ogumakega.
Deyob Elías sogsagu, soo aidenonikid, geb sorda-idudiid, degi, e-sordamar bela gummaksad. Abali, sordamar bela burgwisad.
11 Degisoggu, Rey-Ocozías, Elías-sunaega, sorda-idued-baid, sordamar-dulabo-gakambegwad-abargi (50) yog-barmiar imaksabalid. Modapgu, sordamar-idued Elíasʼga sogdapid:
—¡Bab-Dummad-e-dule, rey soged, gwae dagoye!
12 Elías, sordamar-iduedga sogded:
—An Bab-Dummad-e-dule-sunnadiile, soo nibneg-akar-aidedasun, adi, be, degi, be-sordamar-dulabo-gakambegwad (50) bela ogumakega.
Deyob Elías sogsagu, soo aidenonikid, geb sorda-idudiid, degi, e-sordamar bela gummaksad. Abali, sordamar bela burgwisad.
13 A-ilapaagwadgi, Rey-Ocozías, Elías-sunaega, sorda-idued-baid, sordamar-dulabo-gakambegwad-abargi (50) yog-barmiar imaksad. Geb sordamar-idued, Elíasʼse modapgu, Elías-asabin yokorgi-sindigar sigdapid, geb egi wilenaigusad. Weyob ega sogded:
—Bab-Dummad-e-dule, an bese wilesagwa egised, mer be an-oburgo, degi, be-maigan-dulabo-gakambegwad (50) mer be oburgwebalo. 14 Ar an nue-wisid soo nibneg-akar aidesad, sordamar-idued-e-bogwad, degi, e-sordamar bela obelosad. Agala, an bese wilesagwa-egised mer be an-oburgwemaloye.
15 Geb degi, Bab-Jehová-e-baliwitur, Elíasʼga sogded: “Melle be dobgu, eba be nae.”
Degisoggu, Elías gwichibin-imaksad, geb sordamar-idudiidba Rey-Ocozíasʼse nadsunnad. 16 Elías, reyse modapgu, reyga sogded:
—Bab-Jehová weyob soged: ‘Gayaburba-berbemalad, Ecrón-neggwebur-e-bab-dummad-Baal-Zebubʼse ibmar-wisguega be barmis gusanad. ¿Ar ibmar-wisguega Israel-yargi Bab-Dummad satesi? Degisoggu, napira an bega soged, be nailikgumaidi bar be gwisguosulid, be burgoed.’
17 Degidgine, Rey-Ocozías burgwisad. Ar igi Bab-Jehová Elíasʼga e-gayaburba-sogsa, deyob gusad.
Ocozías, masmala-nikussursoggu, e-sorba, e-gwenad-Joram negdaknonikid. Birgabogus Josafat-machi-Joram, Judá-yalagi negsemaidgi we-ibmar gusad.
18 Rey-Ocozías ibmar-baigan-imaksad, abala, Israel-e-reymar-ibmar-imaksad-gardagi narmakar-maid.