COLOSAS-DULEMARSE-NARMAKLESAD-GARDA
COLOSENSES
GEBE-SOGLENAID
Garda-nug
Pablo, Romaʼgi esgaryagi-mellesigu, gwenadgan-Colosas-neggweburgi-bukmaladse we-garda narmaksado. Colosas-neggwebur, Frigia-yargi siid. Binsamardo, we-garda birga 60ʼgi narmakles-insaye.
Colosas-Dulemarse-Narmaklesad-Gardagi weyob sunmaklenaid
Gwenadgan-Colosasʼginmalad gebesailagi dule-Epafrasʼye-nugadba Bab-Jesús-abingasmalad. A-sorbali, na war-wargwen Bab-igar-oakalobi guarmalad. Bab-Dummadse-goledyobi baliwiturmarse gordii guarmalad. Pablo, Bab-Dummad-Burba-Isligwaledbali we-gardagi gwenadganga sogsiido, melle dukin igar-mesmaloye. Melle we-ibmar ebugoye, melle we-ibmarmar gunnoye, melle we-ibmarmarse warmakoye.
Jesús, we-belagwapa-ibmarmar-obinnilesad e-ibedye, degi, Jesúsʼba ibmarmar obinnilesbarye, degine, bela Jesús-sogedba ibmarmar selemaibarye.
We-gardagine, weyob ilemakar sunmaklenaid:
1. Gebe-sikwas-soglenaid (1:1-8).
2. Bab-Dummadgi-abonoleged-igar (1:9-14).
3. Cristo, bur-dule-dummadid (1:15-23).
4. Pablo-e-arbasad (1:24–2:5).
5. Cristoʼgi burba-dulad-amileged (2:6–4:6).
6. Napi-soglenaid (4:7-18).
Be itogua.
1. GEBE-SIKWAS-SOGLENAID
1
(1:1-8)
1 Ani Pablo, Bab-Dummad-sogedba Jesucristo-e-sapin-bur-dummadga gumogadid. Gwenad-Timoteo anbo, 2 gwenadgan Colosas-neggweburgi Cristoʼba-nanaidse, degi, gwenadgan-gwen-galakudisurmaladse, we-garda anmar barmisiid:
Bab-Dummad anmar-Baba, degi, Bab-Jesucristo, bemargi nued binsamarsun, degi, ulubgi-bogidik bemar-itogega-imakbarsun.
Pablo, Bab-Dummadga dog-nuedye soged
3 Anmar bemarga Babse-goled-irba, Bab-Dummadga, anmar-Bab-Jesucristo-e-Babga dog-nuedye sogdaed. 4 Ar anmar be-itomalad, bemarde Cristo-Jesúsʼgi nue-bensurmarye, degi, Jesucristoʼba-nanaimalad nue-sabmarbarye. 5 Ar bemar deyob gudimalad, ar ade, bemar nibneggi-megmaloed nue-bensuli edarbedimalad. Ar we-nibneggi-megmaloed nue-bensuli bemar edarbedimaladi, bato bemar Gayaburba-Nued-napiragwadba wisgusmalad. 6 Ar we-Bab-Dummad-Gayaburba-Nued bemarse mosad. We-Gayaburba-Nued gebe bemar itononimargu, bemar nue mag itosmalad, Bab-Dummad bemar-abonoge-wilubsulinad. Emigindi, na e nabir-bemargi-binsaedba bemar-abonononikid. Deyobi, a-Gayaburba-Nued bela we-napneggi nasgumaid, degi, bemar-abonolesadyobi, dule-baigan abonolemaimogad. 7 Anmarba-arbaed-Epafrasʼye-nugad, an nue-sabmalad, weyobi we-igargi bemar-odurdaksad. Epafrasʼde bemar-abargi Cristoʼga gwen galakusuli arbanaid. 8 Epafras anmarga sognonikid, Bab-Dummad-Burba-Isligwaledba bemarde na muchub-muchub nue-sabmarye.
2. BAB-DUMMADGI-ABONOLEGED-IGAR
(1:9-14)
9 A-ulale, anmar degi-itosad-akale, anmar bemarga Bab-Dummadse-goled gwen iedisulid. Anmar bega Bab-Dummadse egisdisunnad, bitigi bemar Bab-Dummad-e-binsamaid gatik magar itosmalana gadinye, degi, Bab-Burba-Isligwaled nue-binsaed-nikagued-uked, degi, burbar-ibmar-mag-bela-itoged-uked, bemar nikusbalina gadinye. 10 Adi, bemar nabir Jesúsʼba-nanaimalad-daed-sunnadyob nanamalagar. Unnila Bab-Dummad-ibmar-yeerdakedbi-imakdii gumalagar. We-obared, ibmar-nuegan-imaked-oyodii guedye, degine, Bab-Dummad-bur-gatik-wisgumai guedye. 11 Anmar Bab-Dummadse bemarga egisbalid, na e-gangued-gandikidbali be-ogannomarye, adi, bemar bonigan-dummagan-abin gandikidgi, degi, baisur-itogedgi gwisgumalagar. 12 Bemar Bab-Dummadga weligwaledgi dog-nuedye sogmaloed. Ar Bab-Dummad anmarga igar-egasad, adi, anmar nabir Bab-Dummad-gwallu-meegwad-neggi Jesucristoʼba-nanaimalad-e-ibmar-abingamaloed abingamarmogagar. 13 Bab-Dummad nia-saila-anmar-ganikidgi anmar-onononikid. Geb E-Machi-sabed-negdakmaidse anmar-odosad. 14 Jesucristo na e-abe-aryosadgi anmarga isgued nabosad, anmarga isgued elinonikid.
3. CRISTO, BUR-DULE-DUMMADID
(1:15-23)
15 Cristo-Jesús, Bab-Dummad-akudakleged-e-wilub gued,
Cristo-Jesús bela ibmar-obinnilesad-iduar bato gudibinned.
16 Ar Cristoʼgi belagwapa ibmar-nibneggined, ibmar-napneggined,
ibmar mag-dakleged, degi, ibmar-akudakleged, obinnilesad.
Deginbali, burbar-dummagan-gangi-bukmalad,
burbar-dummagan-negsemamaid,
burbar-dummaganga-mamaid,
degi, burbar-gandikidba-gangued-nikmaladse-bakale,
bela Cristoʼgi, degi, Cristoʼga obinnilesad.
17 Cristo bato bela we-ibmar-iduale, gudiid,
Cristoʼgi bela ibmar nabir selemaid.
18 Cristo, eba-nanaimalad-danar-ambikunonidamalad-e-nonoga gued,
wemar Cristo-sanye sogleged.
Ar Cristo, gebesailadid,
e-inse burgwismalad-abargi gannar durgusadid.
Adi, Cristo na e-inse bela-ibmar-iduedga guegar.
19 Ar Bab-Dummad na e-abegedbali, bela Cristoʼga na Bab-Dummadga-gued uksad.
20 Bab-Dummad, Cristoʼgi bela ibmar-we-napneggined,
degi, ibmar-nibneggined, na ebo igar-naboged imaksad.
Bab-Dummad Cristo-e-abe-nakrusgi-aryonai-gusadba igar nabononikid.
21 Iduale, bemar be-binsaedgi-gudiidbali, degi, ibmar-isgana-imakdiidbali, Bab-Dummadgi bangus gudimalanad, degi, bemar e-isdaradmarbalinad. 22 Emigindi, Bab-Dummad, Cristo-dulega-imaksadgi, nakrusgi-burgwenai-gusadba bemarbo igar nabononikid. Deyob Bab-Dummad imaksad, adi, bemar swilidiki, gwen gutu-naisuli, degi, begi dule-ibmar-akar-soged-sate, Bab-Dummad-asabin gwisgumalagar. 23 Ar deyob be gumalaga, bemar Bab-Jesúsʼgi-bensulidgi gandikidba, ise-sakdigale, degi, sikirmaksuli, alamaknai gumalargebed. Degi, Bab-Dummad-Gayaburba-Nued-be-abonogedgi, be bangusur-gudii gumalargebed. We-Gayaburba-Nued bemar itosad, degi, we-napneg-naidgi bela dulemarga egi sunmaklenaid. Ani, Pablo, we-igar-barsogegala an nugsalenonikid.
4. PABLO-E-ARBASAD
(1:24–2:5)
Pablo-e-arbasad
24 Emigindi, an bemar-ular-wilediidgi an weligwar itoged. Ar deyobi, Cristoʼba-nanaimalad-danar-ambikunonidamaladga, Cristo-wileged-yoo-bergued an-sangi an wiledisunnad. 25 Bemar-bendakega, Bab-Dummad, Jesúsʼba-nanaimalad-danar-ambikunonidamalad-e-maiga-guega an-sunonikid. Bab-Dummad e-Gayaburbagi-sunmakega an-barmisad. 26 We-Gayaburba bela dikasurgus, degi, gebe-dula-ambikusad-akale, Bab-Dummad igar-odukuar-mesisgusadgi sunmaked. Emigindi, Bab-Dummad, Jesucristoʼgi-akananaimaladga a-igar magarononikid. 27 Amarga, Bab-Dummad we-igar-dukuar-maidgi Judíoʼsurmaladga ibmar-nuegan-mamaid oyononisunnad. We-igar-dukuar-maidi, Cristo gued. We-Cristo bemargi-maid, a bemarga yoedse ibmar-nued-uklegoye-soglesad gued.
28 Anmar we-Cristoʼgi bela dulemarga sunmakdiid, dulemar-unadiid, degi, nue-binsaed-nikaa dulemar-odurdakdiid, adi, bela dulemar Cristo-Jesúsʼgi isgussuliyob Bab-Dummadga oyogegar. 29 A-ular, Cristo na bela e-gangued-anga-ukedba an arbanaid, degi, an alamaknaibalid.