10
Binsaed-nikagued sunmaknaid
1 Gukur-burgwaled neg-nunu-yapanne imaked,
degidbali, ina-wawa-sobed-ibe ina-wawadikid oichoged.
Deyobi, gaya-isgana-sunmakleged, bela dule-binsaed-ibed-e-sunmaked oichoged,
e-nug-nued oichobalid.
2 Dule-binsaed-ibed-e-gwage ibmar-nued-imakedgi binsaed.
Dule-binsaedsulidaed-e-gwagedina, ibmar-isgana-imakedgi binsaed.
3 Dule-binsaedsulidaed, ar ibu imakalile, e-ibmar-imakedgi magasar na oyoged,
ede, dule-binsaedsulidye.
4 Dule-sapin-dummad-negsemaid bese ulualile, mer be abin-imakdebin sao.
Ar san-bargaagwar-imaklegedi, bukidar ibmar-noar-imakleged bargaed.
5 We-napneggi-gudiidgine, an daksabalid, sapin-dummagan-negsemamaidi, weyob ibmar noar-imakdimalad: 6 Dule-binsaedsulidaedgala, aka arbaed-nuegan ukleged. Ar dule-bur-nabir-binsamaladgardina, arbaed-baisulid ega ukleged. 7 An daksabalid, dule-maiga-gudimaladi, moli-birgi-sii gudidamalad. Ar dule-nuga-nikamaladdina, maiga-gudiiyob nagab galitodidamalad.
8 Dule yaa-matusur-akwisdibe, sunna egi argwaned.
Dule gagan-matusulid-eminaidibe, sunna dubgi warmaked.
9 Dule, akwa mamarye-sogdibe, sunna akwagi nailikgued.
Dule sapan mamarye-sogdibe, sunna e-dargagi makleged.
10 Ar akan e-nugar-berguddibe, e-nugar ebillesurbardibe, ibmar-sikegala, sabsur achiklegergebed.
Binsaed-nikaguedgi ibmar-imaklegedi, nuekwagwadgi-ibmar-imaklegedi, ibmar-nued amileged.
11 Ar naibe gar-ogoledba-ododoleged-iduar, dule-ega-gar-ogoledgi warmaksadibe,
dule gwen egi bar mani amiosulid.
12 Dule-binsaed-ibed-e-sunmaked yeer itoledaed,
dule-binsaedsulidaed-e-sunmakeddina, na dukin egi aibined.
13 Dule-binsaedsulidaed gebe sunmakdele, e-gaya-miedi, gwen nabir sunmaksulid.
Deyob gaya-nuedsuli e-sunmaked obeloddaed.
14 Degite, sunmaknaigusale, gayaburbamar suli-suli amisulid.
Dule neg-guoed gwen wissulid.
Yoedse ibmar-danibaloed gwen-wissurbalid.
Ar dule, we-ibmar, gwen wisguosulid.
15 Dule-binsaedsulidaed, arbaedgi baisursunna yegued.
Neggweburse-naed-igarbela wissurbalid.
16 Rey amba nuchukwagwar, neggwebur, wilesdakledaed.
Degine, e-sapingan-dummaganmoga, unnila wakdaradba iba-onogedgi arbadidamalad,
deyob osedoddamalad.
17 Neggwebur-e-rey dule-nuga-nikaddibe, we-neggweburgi ise-nued binsalesad.
Degine, e-sapin-dummagandina, e-wachiba na mas-gunmalad,
deyob na niga-ogannomalad.
Mumguega ambikusurmalad.
18 Wiedba neg-uas-nudaklesulile, neg-uas ayariddaed,
degine, wiedgi-neg-soblesadbali, neg maluddaed.
19 Wergulegegala, masgulleged-iba onoleged, yeer-itolegegala, vino goblebalid.
We-ibmar-imakegala, mani abeleged.
20 Reygi mer be ichakwa sunmako,
mer egi be ichakwa binsabalo.
Deginbali, dule-mani-ibedgine, mer egi be arbakee isdar sunmakbalo.
Ar sikwimar-gudidiid sunna be-barsoged,
ar sikwimarde sakan-nika nanaed,
degisoggu, baisursunna gayamar berbeged.