10
Israel-dulemar na e-isgued barsogsamalad
1 Esdras Bab-Dummadse-goled-neg-asabin, Israel-dulemar-isgusad-ular, ise-boale, degi, yokorgi-sindigar, Bab-Dummadse gorsiidgine, bukidar Israel-dulemar: Machergan, omegan, mimmiganse-bakale, ese ambikunonikid. A-dulemar, bela ise-boedbimarmogad. 2 Geb degine, Jehiel-machi-Secanías, Elam-wagangi-danikid, Esdrasʼse aligusad.
Geb weyob ega sogded: “Anmar, omegan-Israel-dulesurmalad nikus-nanasoggu, anmar-Bab-Dummadgi nue-nosad. Degi-inigwele, amba sunna anmar bendakleged. 3 Degisoggu, anmar, anmar-Bab-Dummadbo, igar mesmardo. Emi, bela we-omegan-Israel-dulesurmalad anmar metemaloye, mimmigangi bangumarbaloye, be anmargala binsaed-uksadba, deyob anmar imakodo. Degi, dule-Bab-Dummad-Igar-Maidba-nanadimalad-sogsamogadba, deyob anmar imakodo.” Degisoggu, Bab-Dummad-Igar-Maidba imaklesundo.
4 Geb degi, Esdrasʼga sogdemalad: “Gwichibin be imake, ar we-igarde be imakergebed, ar anmar be-bendakmogoed, gandik be-sae, be ibmar imake.”
5 Degidgine, Esdras gwichibin imaksad. Geb Esdras, dule-irwa-Bab-Dummadse-gormalad-e-dummagan, Levita-dulemala, bela Israel-dulemala ibmar-sogsamaladba-ise-sogar-imakega, imaksad. Degisoggu, Israel-dulemala ise-sogar eyeye na sogsamalad, deyob imakmaloye. 6 Geb agi, Esdras, Bab-Dummadse-goled-neg-asabin-sii nadsunnad. Geb Johanán-e-gabednegse naded. Johanánʼde, Eliasib-machid. Agine, dulemar-galesgusmalad-gannar-nonimalad-e-isgusadba, Esdras, nue bukib-binsaedba, gwen gobsasuli, mas-guchasuli, gabided.
7 Geb sorbali, dulemar-galesgusmalad-nonimaladse gorlesad. We-dulemarse gorlesad: Judá-yalagi-bukmaladse, degi, Jerusalénʼgi-bukmaladse. Ega weyob soglesad: “Jerusalén-neggweburse ambikunonimaloye.”
8 Degi, ega soglesbalid: “Dule ibapaagwadgi nonisulile, bela ei e-nainumar-nikadi sulegoye. Ar igi-dummagan, degi, Judío-girmar-dummagan igar-mesisa, deyob guoye. Degi, dulemar-galesgusmalad-nonimalad-imbagi, bemar-ononnolegoye,” ega soglesad.
9 Geb degine, a-ibapaagwadgi, bela machergan Judá-yarginmalad, degi, Benjamín-yarginmalad, Jerusalén-neggweburse ambikunonimalad. Deunni, nii-walabakebakgi, e-iba-durgwengi, bela dulemar Bab-Dummadse-goled-neggi ambikued-neg-naidgi ambikusmalad. Degi, weyob ibmar-soglesadba, nue dobee itodmalad. De-ukinbali, dii nue-winaibarsoggu, a-bakas bela-belad wawanmakbukwad. 10 Geb degi, dule-irwa-Bab-Dummadse-goled-Esdras gwichibin imaksad. Geb amarga weyob sogded:
—Bemar, bela-belad Bab-Dummadgi nue isgusad, omegan-Israel-dulemarsurmalad be nikusmalad. Degidbali, bela-belad Israel-dulemar-isguega be imaksamalad. 11 Emi, anmar-dadgan-e-Bab-Dummad-Jehová-asabin, be-isgusmalad be barsogmarsun. Bab-Jehová-ibmar-abegedba be imakmalo. Degine, dule-Bab-Jehová-wissurmaladgi be bangumalo, omegan-be-dulamarsulid be metemalo.
12 Geb, bela dulemar gandikidba, Esdras-abin sogdemalad:
—Ar deyobdo. Degiirdi nabir, be-sogedba anmar imako. 13 Degi-inigwele, anmar bukidarsoggu, degine, diide nue-winaibarsoggu, anmar geg weyob magaba bukwa gued. Ar we-igarde binsa ibagwenadye, degi, ibabogwadye soglesulid, ar ade, anmar bukidar na we-igargi isgusmaladbiid.
14 ”Degisoggu, anmar sogsundo, dule e-neggweburga-dummadga-gudimalad, e-sordagan-ular, wegi beoye, adi, amar-ular sunmakegar. Geb dulemar-omegan-Israel-dulesulid-nikusmalad iba-sogedba nonimaloed. Wemar dule-dummagan-abargi, dule-igar-nabiromalad-abargi, degi, e-neggwebur-e-neggwebur-iliba wese nonimaloed. Adi, Bab-Dummad anmar egi-isgusad-ular anmarse-urwemaidi, melle bar anmarse urwegar.”
15 Geb degi, unnila Asael-machi-Jonatán, Ticva-machi-Jahazías, wemar-ebogwad, we-ibmar-sogsamaladgi gwisgusad, degine, Levita-dulemar-ebogwad Mesulam, Sabetai, we-dulemarba nai gusmarmogad. 16 Dulemar-gales-selesgusmalad-nonimaladdi, na sogedba imaksad. Geb degine, dule-irwa-Bab-Dummadse-goled-Esdras, neguya-gwenna-gwennagi dummadga-gudimalad amisad, adi, dulemar-omegan-Israel-dulesulid-nikusmaladga igar-amiegar. Geb, nii-warambegi, a-ibagwenadgi, dulemar e-neggweburmar-ular dummadga-besmaladi na igar-amidmalad. 17 Degi, gebe-nii-yolesad-ibagwenadgi, bela-dulemar omegan-Israel-dulemarsulid-nikusmaladga igar-nabiroleged bergusad.
Dulemar-omegan-Israel-dulemarsulid-nikusmalad-e-nugmar
18 Dule-irwa-Bab-Dummadse-gormalad-e-wagan, omegan-Israel-dulesulid-nikusmalad, wemalad:
Josadac-machi-Jesúa, Josadac-wagangi-danikid,
degi, e-gwenadgan: Maasías, Eliezer, Jarib, Gedalías.
19 We-dulemar na nue-ise-sogar sogsamalad, we-omegan-Israel-dulesurmalad anmar metemaloye. Degine, amarde, e-isgued-eliega, Bab-Dummadga sibad-wawaad-machered-wargwen ogumakar uksamarbalid.
20 Imer-wagansikid:
Hanani, Zebadías.
21 Harim-wagansikid:
Maasías, Elías, Semaías, Jehiel, Uzías.
22 Pasur-wagansikid:
Elioenai, Maasías, Ismael, Natanael, Jozabad, Elasa.
23 Levita-wagansikid:
Jozabad, Simei, Kelaía. Kelaíaʼde, Kelita-duled.
Petaías, Judá, Eliezer.
24 Dule-Namakmalad-e-wagansikid:
Eliasib.
Dule-yawagak-dakmalad-e-wagansikid:
Salum, Telem, Uri.
25 Deginbali, Israel-dulemar-baigansikmalad.
Paros-wagansikid:
Ramía, Jezías, Malquías, Mijamín,
Eleazar, Malquías, Benaía.
26 Elam-wagansikid:
Matanías, Zacarías, Jehiel, Abdi, Jeremot, Elías.
27 Zatu-wagansikid:
Elioenai, Eliasib, Matanías, Jeremot, Zabad, Aziza.
28 Bebai-wagansikid:
Johanán, Hananías, Zabai, Atlai.
29 Bani-wagansikid:
Mesulam, Maluc, Adaía, Jasub, Seal, Ramot.
30 Pahat-Moab-wagansikid:
Adna, Quelal, Benaía,
Maasías, Matanías, Bezaleel, Binúi, Manasés.
31 Harim-wagansikid:
Eliezer, Isías, Malquías, Semaías, Simeón,
32 Benjamín, Maluc, Semarías.
33 Hasum-wagansikid:
Matenai, Matata, Zabad, Elifelet, Jeremai,
Manasés, Simei.
34 Bani-wagansikid:
Madai, Amram, Uel, 35 Benaía, Bedías, Quelúhi,
36 Vanías, Meremot, Eliasib, 37 Matanías, Matenai, Jaasai,
38 Bani, Binúi, Simei, 39 Selemías, Natán, Adaía,
40 Macnadebai, Sasai, Sarai, 41 Azareel, Selemías, Semarías,
42 Salum, Amarías, José.
43 Nebo-wagansikid:
Jeiel, Matatías, Zabad, Zebina, Jadau, Joel, degi, Benaía.
44 Bela-wemar, omegan-Israel-dulemarsurmalad-nikusmaladid. Geb degi, na e-omegangi bangudmarsunnad, e-mimmigangi aibatemarsunnad.