30
Raquel geg Jacobʼga mimmi-bake-itoargu, e-ior-Leaʼgi nobgualid. Raquel e-sui-Jacobʼga sogded:
—¿Ibiga geg be anga mimmi bake? Mimmi an abege. Be anga baksulile, an burgoed.
Jacobʼdi Raquelʼse uluded, ega sogded:
—¿Ar ani an Bab-Dummadsi? Ar Bab-Dummad geg mimmi-bake be-imaksad. Ani an deyob be-imaksasulid.
Geb degine, Raquel Jacobʼga sogded:
—An-mai-Bilhaʼse be gole. A-omegwa mimmigan-nikusale, an-sunnad mimmigan-nikusadyob an guoed.
Weyob Raquel e-sui-Jacobʼga e-mai-Bilha-uksad, adi, Jacob Bilhaʼse golegar. Geb degine, Jacob Bilhaʼse gochad. Agi, Bilha bonigwar gunonikid, Jacobʼba machi-wargwen baknonisunnad.
Geb degine, Raquel sogded: “Ar Bab-Dummad anga igar-nued imaksad. Ar Bab-Dummad an ese-gordiid an-itosadba, anga machigwa uknonikid.” A-ular, we-machigwa Danʼye nugguoed.
A-sorbali, Raquel-e-mai-Bilha machigwa-baid Jacob-ebo baknonibalid. Agi, Raquel sogded: “An-iorbo an nue-urwedii gusad, emidi an egi obichad. A-ular, we-machigwadi Neftalíʼye nugguoed.”
Lea geg bar mimmigan-bake-itoargu, e-mai-Zilpaʼye-nugad, Jacobʼga uksad, adi, Jacob Zilpaʼse golegar. 10 Agi, Zilpa Jacobʼba machigwa baknonikid. 11 Geb degi, Lea sogded: “¡Ibiyob nued angi binsalesa!” A-ulale, a-machigwa Gadʼye onugsasad.
12 Geb a-sorbali, Lea-e-mai-Zilpa Jacob-ebo machigwa-baid baknonibalid. 13 Geb agine, Lea sogded: “¡Yeer-itoleged! Emigindi, omegan sogmaloed, ande weligwar-itoye.” A-ulale, machigwa Aserʼye onugsasad.
14 Ibagwengine, orosgi-dakleged-trigo-weed-ibagangine, Rubén sapurba naded. Agi, sapi-bipi-sanmar mandrágoraʼye-nugad amisad. A-sapi-bipi-sanmar e-nan-Leaʼga sesad. Raquel a-sanmar-daksagu, Leaʼga sogded:
—Mandrágora-e-sanmar be-machi-bega-senonikid, wis be anga udamoga.
15 Ar Leaʼdi abin-sogded:
—¿Ar emide, be angi-sui-egwachad, unni be itosursi? Ar emide, mandrágora-sanmar an-machi-anga-senonikid be abebalid.
Raquel abin-sogded:
—Be-machi-mandrágoraʼmar-bega-senonikid be anga ukele, emi-mutik Jacob bese goloed.
16 Sedogidba, Jacob sapurba-gudidanigu, Lea Jacob-abin noded, ega sogded:
—Emi-mutik be anse goloed, ar ade, an-machi mandrágora-e-san-anga-senonikidbo an be-ogwasad.
A-mutik, Jacob, Leaʼse gochasunnad.
17 Bab-Dummad Lea-ese-goled-itosadba, Lea bonigwar gunonisunnad. Lea wesega Jacobʼga masmala walatargus bakdanikid. 18 Geb degine, Lea sogded: “Ar an-suiga an-machi an uksadbali, Bab-Dummad nabir angi binsasad.” Lea we-machigwa Isacarʼye onugsasad.
19 Geb a-sorbali, Lea baid-machigwa Jacob-ebo nikunonibalid. Agi, machimala walanergwa (6) guded. 20 Lea sogded: “Bab-Dummad ibmar-nued anga uksad. Emigindi, an-sui bur-yeer an-dakoed, ar ade, an ega masmala walanergwagus (6) nikudanikid.” A-ulale, we-machigwa Zabulónʼye onugsasad.
21 Napidgine, Lea bunolo nikunonikid. A-bunolo, Dinaʼye onugsasad.
22 Bab-Dummad Raquelʼgi nued binsadmogad. Bab-Dummad Raquel-ese-goledi itosad, mimmigan-nikuega imaksad. 23 Geb degine, Raquel bonigwar gunonisunnad, machigwa ega uklenonikid. Agi, Raquel sogded: “An geg-mimmi-bakedba an-bingegudiidi, Bab-Dummad anga osulosad. 24 Bitigi Bab-Jehová baid-machigwa anga ukbalina gadin.” A-ulale, machigwa Joséʼye onugsasad.
Jacob ibmar-ibedga gusad
25 Raquel goe-José-baksad-sorbali, Jacob Labánʼga sogded:
—An-yarse gannar an naega be anga igar uke. 26 Ar be nue-wisid, igi an-omegan-ular an bega arbasa. Degisoggu, an-omeganga, degi, an-mimmiganga be igar uke, anba namalagar.
27 Ar Labánʼdi abin-sogded:
—Ar nued be angi binsaele, mer be nagwele, wis be napi-begwele. Ar an nerse-oyosadba an wisgusad, be-nukad, Bab-Jehová ise-nued angi binsamaid.
Labán Jacobʼga sogdebalid:
28 —Anga be sogdo, igi-manigi anga be arbaoe. An be-bennukoed.
29 Geb degine, Jacob ega sogded:
—Ar nue be wisid, igi an bega arbasa, igi an bega be-ibmar-durgan an akwisa. 30 An-nonikid-idu ibmar-ichee-be-nikadi, bega napiragwad merguded, ar ade, an bese nonikid-akar Bab-Jehová ise-nued begi binsasad. Degite, ¿emide, sana an-mimmiganga an na arbadmogosunna?
31 Geb Labán Jacobʼse egisdesunnad:
—Degite, ¿igi-mani be-bennukbi be an-abesunna?
Jacob weyob abin-sogded:
—Mer be an-bennuke. Ar ibmar an bega sogoed nabir be itogele, napi an bega be-sibad-wawaadmar an edarboed.
32 Emi an be-sibadmar-abargi,
bela sibad-wawaadmar-gutu-nanaimalad,
mata-matamalad,
sibad-wawaad-senigan-sichigana egwaoed.
Deginbali, sibadmar-gutu-nanaimalad,
mata-matamalad an egwabaloed,
adi, weyob-daklemalad angadga guegar.
We-ibmar-durgangi be an-bennukodo. 33 Degisoggu, ibagwengi be dakdanikogu, be dakoed, an bule ibmar-inniki-imaked-duledibe.
An-sibadmar-abargi,
sibad-gutu-nanaisurmalad,
mata-matasurmalad,
sibad-wawaad-senigan-sichiganasurmalad gudiile,
an bei atursasdo.
34 Labán Jacob-abin sogded:
—Nueddo. Be-sogedba an imakodo.
35 Degi-inigwele, aka Labánʼdi, a-ibagi,
e na sibad-machergan bara-baramalad,
mata-matamalad,
sibad-omegan gutu-nanaimalad,
wis sipu-sipu nanaimalad,
degine, sibad-wawaad-sichigana,
bachikii urbisad.
Geb degine, Labán e-masmalaga uksad, adi, ega akwemalagar. 36 Geb Jacobʼgi we-sibadmar-obanguegala, ibapaa-bangu-nanalege-wilub sesad.
Jacobʼdina, sibad-baigan Labánʼga akwedii gusad.
37 Jacob we-sapi-e-anagan siksad: Álamo-e-ana, almendro-e-ana, degi, castaño-e-ana. Degine, amar-sapi-anagan bara-bara-daklegegala, a-e-uka saguar-saguar esisad. 38 Geb degine, sibadmar-dii-gobnonidamaladgi sibadmar-asabin, a-sapi-anagan-bara-bara-dakleged urbisad. Ar ade, agi sibad-machergan sibad-omegangi nakwenonidamalad. 39 Ar suarmar-bara-barad-asabin sibadmar nakwedamarsoggu, e-mimmigan bara-bara, gutu-gutu, degine, mata-mata gwalulemamaid. 40 Geb degine, Jacob a-sibadmar Labán-e-sibadmar-bukwad-asabin bachikii urbisdaed. Weyob Jacob Labán-sibadmargi na e-sibad bachikii urbemai gusad.
41 Sibadmar-bur-wardadamalad omegi-nakwed-irbali, Jacob sibadmar-dii-gobedgi suarmar-bara-barad urbisdaed, adi, omegi nakwialile, suarmar-bara-barad dakegar. 42 Ar sibadmar-garagana-nakwialirdi, Jacob suarmar-bara-barad urbedasulid. A-ulale, sibadmar-garagandi, Labánʼgad daed. Sibad-wardummagandi, Jacobʼgad daed.
43 Weyob Jacob mani-ibedga gunonikid,
ichesur sibadmar-wawaad,
maigan-machergan,
maigan-omegan,
moli-yargan-muremalad,
degine, moli-uayasuigan-nika gunonikid.