6. HABACUC, BAB-DUMMADSE-GOLED
3
(3:1-19)
1 Bab-Dummad-gayaburba-barsoged-Habacuc, Bab-Dummadse-goled. We-Bab-Dummadse-goledi, Sigionot-gar-goledba gorlegoed.
2 Bab-Jehová, be-nug-dummarba-gued an itosad,
Bab-Jehová be-ibmar-imaksadi, be-dobekwaa-nanaega an-imaked.
Bab-Jehováʼye, emi anmar-dulagudiidgi be gannar a-ibmarmar imake,
be gannar a-ibmarmar oyoge.
Bab-Jehováʼye, be uludele,
be-dule-wiledaked mer be iego.
3 Bab-Dummad neg-Temánʼye-nugad-akale, danikid,
Dule-Isligwaled yar-Paránʼye-nugad-akale, danikid.
Bab-Dummad-e-gangued-yeerdakleged bela nibneg-gasad,
bela dulemar-we-napneggi-bukwadi e-nug odummomalad.
4 E-dakarmakedi, mala-dakarmakmaiyobi gued.
E-argangine malamar milemaid,
agine, e-gargangued dukuar maid.
5 Bab-Dummad-daged-idu, bonigan-bulegan ainied.
Bab-Dummad-sorbali, soo-ginnitibi danidaed.
6 Bab-Dummad gwisgunonikile, napaneg giglimakde daed.
Dulemar-yar-baid-baidgi-bukwad-dakdele, dulemar wawanmakde daed.
Bela yar-dummagan-dikasurgus-bubukwad malud daed,
yar-senigana-sergan-bubukwad babatid daed,
ar Bab-Dummad-igardi degisadeguad.
7 Cusán-dulemar-danar-danar-bukwadi, suli-suli-itobukwa an daksad.
Madián-dulemar-bukwadi, bela-bela dobe-itobukwa an daksad.
8 Bab-Jehová, ¿diwarmarse be ulus gusa?
¿Suke-iirmakmaidse be urwemai gusa?
Be-moli-birgi-sii be abarmakmaigua, be-ur-napagined-gege-galakuedgi be nakwisgua,
¿demarse be nue-urwemai gusa?
9 Be-warsi na be guagwar ganikid,
be-saguyaba sigumar be enosad.
Be napaneg-marisadgi dii-iirmakega imaksad.
10 Yarmar-bubukwad be-dakdedba wawanmakdemalad.
Mogirmala, diidar-dummad owinonikid,
muu-billi binnasuli uurmakded, demar-mullugana dunguded.
11 Be-mala-ibyemaidba, dad-ibeler geg gaed,
be-mala-dakarmakmaidba nii geg noed.
12 Sae-itodiidba, napneggi be bipirmakdiid.
Urwedgine, be dulemar-sabsur-imaked.
13 Be-dulamar-bendakegala, be noalid,
na be dule-nug-imaksad-bendakegala, be noalid.
Dule-isganamar-e-rey-nono, be maad imaksad,
bela e-negsemaid e-ibe be obelosad.
14 E-sordamar-e-nono, be-eswargi be buudu imaksad,
we-sordamar an-oaisakiega burwa-dummadyobi, angi yolenonikid.
Dule-wileged dule-e-bendaked-satedba, igi dule egi yolenonidae,
deyobi, we-sordamar bela-bela-yeer-itogedba angi yolenonikid.
15 Be-moli-birgi-sii, be demargi bipirmakdiid,
demar-binnasuli-arwemamaid-birgi, be bipirmakdiid.
16 An deyob itosgua, bela an-gwage-ulubse an-ebusad,
an be-gaya-itosgua, an-gakuli wawanmakded.
Bela an-garmala gulleded, an-nagmar bela nollomakded.
Degi-inigwele, andi binnalee, anmar-wionanaid-e-sabsur-odurdaklegoed-iba-nonikoedi, an edarbed.
17 Ar amba sapi-higuera sanmaksulile,
uva-dubmar sanmaksurbalile,
andi Bab-Jehováʼgi yeer itogoed,
Bab-Dummad-an-abonogedgi, an weligwar itogoed.
Amba olivo-sapi e-san nikusulile,
amba nainumargi ibmar-gwag welesurbalile,
andi Bab-Jehováʼgi yeer itogoed,
Bab-Dummad-an-abonogedgi, an weligwar itogoed.
Amba sibad-wawaadmar e-galugi bar bukwasulile,
amba moli-bebe-nikad wargwensaale, e-galugi bar bukwasurbalile,
18 andi Bab-Jehováʼgi yeer itogoed,
Bab-Dummad-an-abonogedgi, an weligwar itogoed.
19 Bab-Jehová-Bela-Gangued-Nikadi, an-ogannogedid.
Goe-sapur-gwae-gwae-abarmakeyobi, an-imaked,
nega-matusulidganba nanaega an-imaked.
Gar-gormalad-dub-nikadba-namaklegega narmaklesad. Namakmalad-e-iduedga narmaklesad.