13
Bab-Dummad sabsur Israel-dulemar-odurdakoed
Gebeunni, Efraín-dulemar, Israel-yargi nuga-nikarbamaladinad.
Ibmar-sogdemalale, dulemar, dobee itodamalad.
Emide, Efraín-dulemar, bab-dummad-Baalʼye-nugad-e-nug odummod gusmalad.
A-isgued-nukad, Efraín-dulemar burgwenoni gusad.
Degi-inigwele, amba bur bule isguedgi nanabukmalad.
Dulemar-ega-ibmar-sobmaladga sogdedamalad:
“Be anga bab-dummagan-imaklegoyob-manibiid be sobye.”
Geb a-dulemar na e-dakedba ega sobdamalad.
Degi, bab-dummadyob-imaklemalad-e-wagar-uddamalad,
degine, dule-ogumakar-ukleged ega ukdedamarbalid.
Agala, igi-bolegoe-boo-bate,
igi-boo wakudaryalaba-milege,
deyob gumaloed.
Igi-gagan-dinnagana burwaba-seleddae,
igi-waa soogi-ainakwider seleddae,
deyob gumaloed.
Bab-Dummad Israel-dulemarga sogded:
“Israel-dulemar, Egipto-yargi be bukwamargua,
bato an bemar-Bab-Dummadid.
An-imbagi Bab-Dummad-baid be nikuosurmalad,
an-imbagi Abonoged-baid be nikuosurbalid.
Unnila anbi be-Bab-Dummadga gued.
Ar ani an nega-dulesulidganba, napa-uedikidba be gudigu be-akwisad.
An bemarga masgunned uksagusad,
agi bemar nue-immeles gusmalad.
Degi-inigwele, ar bemardi san-dummarbaa itosgusmalad,
degidbali, be an-ies gusmalad.
Degisoggu, an bemarga achumigur-nono-wawaadyob gumaloed.
An bemar-idu achu-sapur-barbadyob dukumaloed.
Igi wiob-ome ei mimmigan-sulesale, uluardae,
deyobi an bemargi gwichigudoed.
Be-gwage-dubmar-mamaid an bei itiroed.
Achumigur-nono-wawaadyobi an bemar-obelogoed.
Ibdurgan-ursilimaladyob an bemar-ichimakoed.
 
”Israel-dulemar, ani an bemar-obelogoed,
ar bemar, be-bendakdiidgi be gwisgunanaid.
10 Ar bemar gordigusmalad: ‘Anga be rey-udaye,
dule-negsemalad be anga udabarye.’
Degite, bemar-neggwebur-bendakega, ¿bia be-reymarde?
¿Bia dulemar-bega-negsemaladde?
11 An-urwedgi an bemarga rey-uksad,
an-urwedgi an bemar-annik susbalid.
12 Efraín-dulemar-e-ibmar-isgana-imakmaladi nue-narmakar maid,
bela an e-isgumalad semaid.
13 Israel-dulemarga gwaluleged-ibagan nonikinad,
degi-inigwele, igi sikwi muu-neggi aidegega geg nuekwaa mege,
deyobi be binsaedsuli gusmalad.
 
14 ”¿Degite, amba neg-uan-e-ganguedgi bemar-bendakbi be an-abede?
¿Burgwedgi an bemar-bendakode?
Burgwed, ¿bia be-boni-dummadgande nadsunna?
Neg-uan, ¿bia be-dule-obeloged nadsunna?
Burgwed, neg-uan, be dagmar,
wile bar an wemar-dakosulid.
 
15 ”Ar bemar, Efraín-dulemar, be-gwenadgan-abargi be nasgudele,
ani an bemar-obelogoed.
Igi-burwa-dad-nakwedsikid nega-dulesulidgansik-goledi, dianmaid, degi, diwarmaid dinnaa imake,
deyobi an bemar-imakoed.
Geb agi, be-isdarmalad be-ibe
bela be-ibmar-nuegan sumaloed.
16 Samaria-dulemar, e-isgusad-nukad, an sabsur-odurdakoed,
ar e-Bab-Dummadgi yolesmalad.
E-dulemar bila-onogedgi burgwemaloed,
e-mimmigan napagi sabsur-omukulenai gumaloed.
E-omegan-gurgin-nikamalad-ibe,
saban sabsur-egalenai guoed.”