30
Dule-uayasatemalad, duledar-wilesmar
Bab-Jehová weyob sogsad:
“Bemar-uayasuli-damaladi, ¡be duledar-wilesmar!
An-wissuli-igar-imakmaladi, an-ega-ibmar-sogsulidba ibmar-imakdimaladi, isguedginbi-nanadimaladi, ¡dule-wilesmar!
Anse-idaksuli Egipto-yalase igar amibukmalad.
Faraónʼgi bendakleged-amiega ese naddamalad.
Egipto-dulemargi bendakleged amibukmalad.
We-Faraón-be-bendakedi, be-bingeguega guoed
Egipto-dulemargi be dukued-amiedi, nug-bipii be-imakoed.
Zoán-neggweburgi e-dummagan ega mamai-inigwele,
Hanes-neggweburse e-garda-berbemalad mosa-inigwele, gwen bendakosurmalad.
Bela Israel-dulemala, neggwebur ega ibmar-nued-imaksulidba bingedar itodmaloed.
Ar Egipto-dulemar wis gwen ega ibmar-nued imakosulid.
Unnila we-dulemala, emar-obingegsaedginbi binsadimalad,
dulemar-isdar-obelogedgi binsadimalad.”
Isaías sogdebalid: “Bab-Jehová weyob Neguev-e-ibmar-durgan-guoedgi sunmaksad:
‘Israel-dulemar, Egipto-yalase bela e-ibmar-nuegan, moli-uayasuidgi semamaid,
bela e-manimar moli-yargan-muregedgi semamaid.
Nega-dulesulidganba obakmamaid,
ar ade, nega-bulegan naed,
ar a-nega, achumigur-bulegan nika-naed,
naibe-bulegan nika-naed,
degi, naibe-gukuar-gukuar-nanamalad nika-naed.
Egipto-neggwebur gwen emar-bendakosulid.
A-ulale, weyob an bied:
Ibdula-ursiliye, gwen dule-oakalosulidye.’ ”
Bab-Dummad weyob Isaíasʼga sogdebalid:
“Emisgwa be, we-ibmar dulemar-wagab narmak.
Urgogi be narmakar-omeso,
adi, ibagan-danikoed-idu degisadegu narmakar-oyomai guegar.”
Geb Isaías sogdebalid:
“Ar we-dulemar uayasulidamalad, dule-isgana gumalad,
Bab-Jehová-Igar-Maid itobisurmalad.
10 Emide, dulemar-yoedse-ibmar-guoed-sogedga sogdamalad:
‘Melle bar be negburgan-daked sogmarye.’
Bab-gayaburba-barsogmaladga sogdamarbalid:
‘Melle bar be anmarga Bab-Dummad-gayaburba-napiragwad sogmarye.
Binsa nabir ibmar-nuegangi be anmarga sunmakmarye,
binsa gakangi be anmarga sunmakmarye.’
11 Muchub-muchub sokarmalad:
‘Bab-Igargi be bangumar,
melle Bab-Dummadba be ibsamar.
Melle bar be anmarga Israel-dulemar-e-Bab-Dummad-Isligwaledgi sunmake.’ ”
12 A-ulale, Israel-dulemar-e-Bab-Dummad-Isligwaled weyob soged:
“An-bemarga-ibmar-soged be itobisurmalad,
mesagwar-gued bur be abemalad.
Igar-isgana bur be itodmalad.
Bur be we-igar-isganaba be akasmalad.
13 A-ulale, we-isguedi, bemargi gwichiguoed.
Igi-galu-matusulid marar-gwichile, ukiagwar ailaddae,
deyob bemargi isgued gwichigudagoed.
Ukiagwale, ilagwensaale bemargi babatedagoed.
14 We-isguedi, napsa-bormo ise bela-belad goa-goa-mareyob guoed.
Igi napsa-bormo bipisaale, gwen e-goa bar sogun-weega abelesurdae,
igi bar diagi dii-weedga ebulesurdae,
deyob we-isgued guoed.”
15 Ar weyob Bab-Jehová-Israel-dulemar-e-Bab-Dummad-Isligwaled soged:
“Dule e-isguedga-bukib-binsaedgi bendaklegoed,
nued-nanaedgi, bendaklegoed.
Bargaagwar-gudiidgine, degi, angi-bensuli-nanaedgine, gannaleged siid.
Ar degi-inigwele, bemar an-abesulid.
16 Ar bemardi weyob sogmalad: ‘Anmar moligi wakinmaloe.’
Degisoggu, deyob bemar wakinmalargebdo.
Bemar weyob sogmarbalid: ‘Moli-gwae-gwae-abarmakedgi anmar wakinmaloe.’
Degi-inigwele, dule-be-baleginmaloedi, beba bur bule abarmake gumaloed.
17 Dule-gwensak-bemar-oburgwebied-asabinni, bemar-milibalidi (1,000), dobedba duurmakdemaloed.
Dule-e-ataled-bemar-oburgwebied-asabinni, bela bemar, dobedba duurmakdemaloed.
Igi yar-birgi suarbi ganna-gwisdae,
deyobi be gumaloed.
Igi-yar-mullugi ibmar-wilub gwisdae,
deyobi bemar napi-bemaloed.
Deyobi bela neg-olloo nadoed.”
Bab-Dummad Israel-dulemarga wiledaked-igar mesisad
18 Isaías sogdebalid:
“Degi-inigwele, Bab-Jehová, wile-bemar-dakegala, bemar-abitomaid.
Bemarga e-sabgued-nikadi, oyobied.
Ar Bab-Dummad-Jehová, igar-innikigwad imakedid.
Dule-Bab-Dummadgi-bensuli-gudimaladgi, nued binsalesad.”
19 Sión-dulemar Jerusalén-neggweburgi-mamaid, bipisaale, bar be boosurmalad. Bab-Dummad be-bendakega ese binnasuli be gornanaile, Bab-Dummad-dule-wiledakedi, wile be-dakoed. Be-itosayalabali, be-abinsaoed. 20 Ar Bab-Jehová igar-bulegan bemarga barmidago-inigwele, degi, wile-itoged-ibagan bemarga barmidago-inigwele, be-odurdaked-saila bar bemargi dukuosulid, bemar-sunnagwad be dakmaloed. 21 Ar be igar-noar aibatedibele, be-yarganbali dule bese-gole be itogoed, weyob bega soge be itogoed: “Noar be aibatemala, wesik igar-mai. Wesik be namala.” 22 Degisoggu, be-ibmar-sobarmalad-bab-dummadyob-imaklemalad-manibiidi, be-ibmar-wilubgan-orbimaladi, bela ibmar-isedyob be metemaloed. Be sogdemaloed: “Wegi-bukwad be nae.”
23 Degisoggu, be ibmar-gwag digele, Bab-Jehová bemarga dii barmidagoed. Ibmar sanmakdagogu, nue-sanmakoed, degi, yeer-gullemaladbi guoed. A-ibagangine, be moli-bebe-nikamalad nainu-dummagangine, gagan-madii gudoed. 24 Moli-bebe-nikad-alugwasuarmalad, degi, moli-uayasuigan be-nainugi-arbamaladi, gagan-nuegan bato egwaar-guagwar-bukwad-madii gumaloed. 25 Bab-Dummad be-isdarmalad-obeloged-ibagine, e-neg-suigan ayaridele, yala-matusurmaladbali, degi, bela yala-mulluganbali dianmar megidoed, diimar iirmakdoed. 26 A-ibagangine, Bab-Jehová bemar-nailikgusmalad bemarga nudakoed, ar bemar e-dulaga gumalad. Nii-gaedi, dad-ibeler-gaeyob mee gadoed, degi, dad-ibeler-e-gaedi, ilagugle-wilub bur bule mee-gaeyob (7) gadoed. Dad-ibeler-gwagugle-mee-ganaiyob (7) dad-ibeler gaoed.
Bab-Jehová Asiria-dulemargi gwichigusad
27 Isaías sogdebalid:
“Be dakmar, Bab-Jehová-sunnagwad bannaba-dikasuli danikid.
E-urwedi, soo-gwabunye-gwichidyobi, waa-bupurmakgwichiyob danikid.
E-gaya, degi, e-gwabin-duku, soo-ginnitibi-gwichiyobi dakleged.
28 Bab-Dummad-e-ibmar-sogedi, diwar-nollosur-uurmakmaid-neg-odogeyob gued.
Bab-Dummadi, dulemar-yar-baid-baidgi-bukmalad-oros-omukueyobi-imakega danikid,
adi, bela obelogega danikid.
Moli-gaya-bargaed-yoiyobi dulemar imaksad,
adi, igar-baidsig sedegar, adi, yoggumalagar.
29 Ar bemardi, Islidikid-Iba-onolegedgi-namaklegedyob namakdemaloed,
gwage-ulubgi, be weligwar-itodmaloed.
Igi dule, Bab-Jehová-yalase-nadapile, Bab-Jehová-Israelʼga-akwasailayobi-guedse-nadapile,
gar-gammu ogornadapdae, deyobi bemar itomaloed.
 
30 ”Bab-Jehová, e-gayaburba-gandikid-itomalaga dulemar-imakoed.
Bemarga e-gangued weyob oyogoed:
Soo-ginnitibi gwichigudoed,
malamar aidedoed,
diimar suamakdoed,
dii-gwamakarmaladi babatidagoed.
31 Bab-Jehová e-gayaburbaba, Asiria-yala obelogoed.
E-ganguedba obelogoed.
32 Bab-Jehová we-dulemar-sabsur-odurdaked-ilibali, gar-panderoʼmar gotoed,
degi, gar-arpaʼmar gotoed.
Bab-Jehová Asiria-dulemarbo-urwenaile,
e-sakwa minaidbioed.
33 Ar Bab-Jehová, Asiria-dulemarga, degi, e-reyga, sabsur-odurdakleged-neg bato dikasurgus guagwar sisad.
Yaa-dummad-matusulid-yabali soo-duurmaked sobsad,
degi, sapanmar-ichesuli urbisad.
Bab-Jehová soogi buu imakdogu, soo-azufre-gwabunye-gwichiyobi, gadoed.”