42
Bab-Jehová-e-mai
1 Bab-Jehová soged:
“We, an-mai-gued.
Ani an we-dule-sediid.
Ani na susad.
An egi yeer itoged.
An-burba an ega uksad.
Ani Bab-Jehová, dulemar-yar-baid-baidgi-bukmaladga igar-innikigwad imakoed.
2 We-dule, binnasuli golosulid, sabsuli sunmakosulid.
Galimbaba binnasuli sunmakdii itolegosulid.
3 Nargammu-bisgedanigwichidi bar bisgosurmalad.
Gwallu-gwillo-binnagamaidi gwen oginnosulid.
Igar-napiragwadbali igar nabogoed.
4 We-dule, napneggi igar-napiragwad-omesedse gwen wieguosulid, gwen galakuosulid.
Demar-gakaba-neggwebur-bukmalad, we-dule-e-odurdaked abdakbukwad.”
5 Bab-Dummad-Jehová mogir-billi obinnisadid, mogir-billi nasiksadid, napneg onasosadid, bela egi-ibmar-sanmaked onasosadid, dulemar-bukwadga niga-ogannogedid, dulemarga burba-dulad-ukedid. We-Bab-Dummad-Jehová weyopira soged:
6 “Ani an Bab-Jehová gued.
Ani an bese gochad,
igar-innikigwad-imakega an be-semai gusad.
Ani an be-odenonikid,
an-dulamarga an dulemarbo-igar-mesisad-e-wilubga-guega an be-imaksad.
Dule-yar-baid-baidgi-bukmalad-magar-neg-itomalaga, gwallu-meegwadyobi an be-ogwisgunonikid.
7 Adi, be dulemar-aku-atakmaladga ibya egaegar,
be dule-esgaryagi-bukmalad onogegar,
degi, be dule-esgaryaba-negsichidgi-bukmalad onogegar.
8 ”¡Ani an Jehová gued!
¡Deyob an nugad!
An-nug-odummolegedi, dule-baidgadga guosulid.
An-nug-odummolegedi, ibmar-sobaled-bab-dummadyob-imaklemaladga an ukosurbalid.
9 Ibmar-iduar-an-sogsagusmalad bela gusad.
Emisgindi, ibmar-gwapidmarbi an sogbalid.
Iduakwaa ibmar-guoed an bemar-owisoged.”
Bab-Jehová-nug-odummogedgi namakleged
10 Bab-Jehováʼga namakleged-gwapidgi be namakmar.
Bemar-muu-billigi-iirmakbukwad, ega be namakmar.
Demar-yagi-ibmar-dula-bukmalad, Bab-Jehová-nug odummomar.
Napneg-ugakagi-bukmalad, Bab-Jehová-nug ogannomar.
Bemar demar-gakaba-bukmalad, Bab-Jehová-nug be odummomar.
11 Nega-dulesulidganba-bukwamalad, bemar binnasuli gormar.
Cedar-dulemar neggwebur-burwigangi-bukmalad, bemar binnasuli gormar.
Sela-dorgan, yeer-itogedba be namakmar,
yeer-itogedba yala-birgi binnasuli be gormar.
12 Gandikidba be Bab-Jehová-nug odummomar,
neggwebur-demar-gakaba-bukmaladgi binnasuli Bab-Jehová-nug be odummomar.
13 Bab-Jehová dule-bila-onogedyob nodagoed.
Dule-bila-onoged-urweyobi uludagoed.
Binnasuli urwedgi bila-onodagoed,
e-isdarmaladgi obinoed.
14 Bab-Jehová soged:
“An dikasurgusa bogidik gudigusad,
an gwen sunmaksasulid, an gwen ibmar sogsasulid.
Emisgindi, an binnasuli goloed.
Ome-ugakgunair binnasuli-bunnonaiyobi, akus-akus-bunnonaiyobi, binnasuli gornai an guoed.
15 Yalamar, degi, yar-mullugana, an obelogoed.
E-gaganmar bela an odinnogoed.
Diwarmar neg-dinnaganaga an imakoed,
dii-wilagana an odinnogoed.
16 Dule-aku-atakmalad, igar-dakdisurmaladba an nidoed,
nanaledisulid-igarba an nidoed.
Amar-asabinni, negsichidi neg-meegwadga an imakoed.
Amar-idu, neg-muru-murumalad an innikii imakoed.
Deyob an imakoed, an gwen amar-obanosulid.
17 Dulemar ibmar-sobaled-bab-dummadyob-imaklemaladgi bengudisurmaladi,
nue-bingegus bangudmaloed.
Akwa-sobarmaladga-sokardamaladi, ‘be anmar-bab-dummaganaye,’
a-dulemala, nue-bingegus bangudmaloed.”
Israel-dulemar amba gwen-durdaksurmalad
18 Bab-Dummad weyob soged:
“¡Dule-uaya-yallirmalad! Nue be itomarsun.
¡Dule-aku-atakmalad! Nue be atakmarsun.
19 ¿Doa an-maiba bur bule akusunna ataksunna?
¿Doa an-gayaburba-berbergedba bur bule uaya-yallirsunna?
¿Doa an-nuggi-barmilesadba bur bule akusunna ataksunna?
¿Doa Bab-Jehová-e-maiba bur bule akusunna ataksunna?
20 Be ibmar-bukidar-daksa-inigwele, degite, be amba aku daked.
Uaya be olloo-sii-inigwele, be ibmar-itosulid.”
21 Bab-Jehová, e-igar-innikigwad-sabedbali, yeer-itosad.
E-igar-maid-dummarba-guedbali, degi, gandikid-guedbali, yeer-itosad.
22 Ar we-dulemarde atursaledidimalad,
sabsur odurdakledidimalad.
Bela akwa-dummagan-yaba gales-bukwamaladid,
esgaryaba mellesmaladid.
Ei-ibmar atursales gudidimalad, dule gwen bendakdisurmalad.
Ei ibmar sules gudidimalad.
Gwen dulemar gannar-ega-ibmar-ukmarye sogdisurmalad.
23 ¿Doa bemar we-ibmar itogoe?
¿Doa bemar yoedse-we-ibmar-guoed nue-itogoe?
24 ¿Doa ibmar-sulesmaladyobi Jacob-wagan-uksa?
¿Doa ibmar-atursalealedyobi Israel-dulemar-uksa?
¿Ar Bab-Jehová e-dulamar egi isgusgusad urmaksasursi? Eye, urmaksa.
Ar ade, Bab-Jehová-igarba nanassurmalad,
e-Igar-Maid-sogedba ibsassurmalad.
25 A-ulale, Bab-Jehová egine ulusad,
bila egi onosad.
Soogine sabsur-odurdaksad, degi-inigwele, amba aku-itosmalad.
Sabsur-odurdakles-inigwele, amba eba ibsassurmalad.