4. YOEDSE-GANDIKIDBA NEG-OYOLEGOED
49
(49:1–66:24)
4a. Yoedse-dule-abonoged-danikoed
(49:1–59:21)
Bab-Jehová-e-mai
Dikasur-demar-gakaba-bukmaladi, be an-itomar.
Neggwebur-bannaba-bukmaladi, an-ibmar-sogoed itomalo:
Gwaluleged-iduale, Bab-Jehová bato anse gochad.
Sapibeneggi-mai, bato an-nug bisad.
Es-suid-swiswidikidyobi an-gayaburba imaksad.
E-argan-yaurgine an-odukusad.
Sigu-daarmakaledyob an-imaksad,
e-sigumar-saboged-yaba an-odukusad.
Bab-Dummad anga weyob sogsad:
“Israel-wagan, be an-maiga gued.
Begine, an-nug odummolegoed.”
Geb an abinsaded:
“Binsarsunna an arbasad.
Binsarsunna an gar-itosad,
gwen ibmar-nued an nikgussulid.
Degi-inigwele, an-ibmar-imakedi, Bab-Jehováʼgi siid.
Bab-Dummad anga-ibmar-nuegan-ukoed bato guagwar sisad.”
Emide, Bab-Jehová soged:
“An e-maiga-guegala,
sapibeneggi-mai anga burba uksad.
Adi, Jacob-wagan gannar eba nanaegar,
Israel-dulemar gannar ese ambikudagegar.
Ar ande Bab-Jehová-asabin an-nug gannarba gued.
Agala, an-Bab-Dummad anga niga-ogannoged.”
Bab-Dummad weyob e-maiga soged:
“Be an-maiga-guedgi, unnila be anga Jacob-waganbi gannarse nudakosulid.
Unnila be anga Israel-dulemarbi gannar-e-yarse sedagosurbalid.
Dulemar-yar-baid-baidgi-bukmaladga, neg-meegwadga-guega an be-imakbalid,
degi, bela napaneg-naid-ugakaasega, an-abonoleged-igar-sedega an be-imakbalid.”
 
Bab-Jehová, Israel-dulemar-ollor-imakedi, Bab-Dummad-Isligwaledi, weyob soged,
dulemar-yar-baid-baidgi-bukmaladse mesagwar-gulediidga, isdar-daklediidga,
degine, dummagan-negdakmamaid-e-maiganga, weyob soged:
“Reymar be-dakdamalogu, gwisgudmaloed.
Dule-dummagan-nuga-nikamalad be-dakdamalogu, be-abin dulluu imakmaloed.
Israel-dulemar-e-Bab-Jehová-Isligwaled-ular, be-nug odummodmaloed.
Ar ade, Bab-Dummad, dule-napiragwadid,
degi, na e be-susadid.”
Bab-Dummad Israel-dulemar gannarse urbisad
Bab-Jehová weyob soged:
“Iba-nuegangi an be-itosad,
degi, abonoleged-ibagangi an be-bendaksad.
Emigindi, an nue-be-akoed,
degi, an begine dulemarga igar mesoed,
adi, be gannarse neggwebur-urbegar,
degine, nainumar-olloo-nanaid be mimiegar.
Adi, dule-galesmaladga weyob be sogegarba: ‘Be ainimarye.’
Degi, dulemar-negsichidgi-bukmaladga weyob be sogegarba: ‘Bemar ollorgusmarye.’
 
”Bemar, igarbali, be-ibdurganga gagan-ara-aramalad amimaloed,
bela nega-dulesulid-yar-mullugangi gagan-ara-aramalad be amimaloed.
10 Bemar ukudmaada itogosurmalad.
Dad-ibeler-gaedi, degi, neg-ueguedi, budar-itoge be-imakosurmalad.
Ar dule-wile-be-daked, be-nioed,
dian-aryomamaidba be-sedoed.
11 Bela an-sapurmar-nanaidgi igar-mamai an imakoed,
an-igarmar an omesoed.
12 ¡Be dakmalana!
Wemarde dikasuli danimaloed.
Gwen-gwen dad-nakwed-argan-sapiledsik danimaloed,
baigandi, dad-argwanedsik danimarmogoed,
degi, baigandina, Sinim-yar-akar danimaloed.”
 
13 Nibneg-naid, be weligwaledba, ¡binnasuli gole!
Napneg-naid, ¡be wergusun!
Sapurmar, ¡gandikidba be namakmar!
Ar Bab-Jehová e-dulemar-gwage armaked,
e-dulemar-wilesagwa-gudimalad wiledaked.
14 Degi-inigwele, Sión-yalagi-bukmalad weyob sogsad:
“Bab-Jehová walagwen an-meted,
Bab-Jehová an-iesad.”
15 Bab-Jehová sogdebalid:
“¿Ar sunna nan-gwensakde e-mimmi-iesi?
¿Ar sunna e-mimmi-baksad sabgusuli gusi?
Ar we-nande, e-mimmi-nue-ieye-sogele,
andi an gwen be-iegosulid.
16 An-argangi-sobar-naiyobi an be-sediid.
Be-galu-matusurmaladi, an iedisulid.
17 Bega-neg-sobmaladi, begi gwae-gwae danimalad.
Be-obelomaladdi, begi bangudmalad,
bei neg-ollomaksamalad begi bangudmalad.
18 Nue be-atake, be-dikarba nue be neg-dake.
Bela bulakwaa ambikunonimalad, bese danimalad.”
Bab-Jehová soged:
“An dula-maisoggu, bela wemar, ibmar-nuegan-ebulegedyobi gumaloed,
abirgin-nikued-mor-yolegedyobi gumaloed.
 
19 ”Be-yala obelosmar-inigwele,
akwamarbi ganna-ganna obesmar-inigwele,
degi, olloo nasiksamar-inigwele, be-yala be-dulemarga unniguosulid.
Dule-be-wiosmaladdi, dikasuli bemargi bukwa gumaloed.
20 Be-mimmigan-bei-yoggusye-na-be-bisadi, bega sogdamaloed:
‘Dogdar we-yala anga bipii noye.
Anga be neg-amiye,
agi nabir an gudisaegarye.’
21 Geb degi, be binsadoed:
‘¿Doa we-mimmigande anga baksasunna?
An mimmi satenad,
ar an geg mimmi bakenad.
An ononnoles gudiinad,
emarse-obanagwar an gudiinad.
Ar we-mimmigande, ¿doa anga odummossunna?
Ar an walagwen gudiinad,
emide, ¿ar bia wemarde danimarsunna?’ ”
22 Bab-Jehová-Bur-Biriginedi weyob soged:
“Dulemar-yar-baid-baidgi-bukmaladga an igar ukoed,
neggwebur-bukmaladsik an-bander an onakoed,
adi, wemar, e-sakwagi-mai bega be-mimmigan-sedamalagar,
degi, e-gukingi-mai bega be-bunamala-sedamarbaligar.
23 Reymar e-mimmiganga be-imakmaloed,
degi, rey-omegan be-nanga gumaloed.
Be-asabinni, dulluu napase imakmaloed.
Degi, maligi ukub-naile, bega elimaloed.
Geb agi, be wisgumaloed, ani an Bab-Jehová gued.
Dule-angi-bensurmaladi, bingedar itogosurmalad.”
 
24 Dule-bila-onomalad bila-onogedgi-ibmar-susadi, ¿sunna e-ibe be susi? Geg gue.
Dule-galesadi, ¿sunna dule-isgana-e-gasadgi wakinnosi? Suli.
25 Degi-inigwele, Bab-Jehová weyob soged:
“Dule-bila-onoged bila-onogedgi-ibmar-susadi, e-ibe sulegoed.
Deginbali, dule-isgana dule-gasa-sesadi, gannar e-annik sulegoed.
Ar andi, dule-begi-urwedimaladgi an be-bendakoed.
An-sunnagwadi, an be-mimmigan bendakoed.
26 Be-isdarmalad na dukin e-san-gunmalaga an imakoed.
Vino-gobeyobi, na dukin e-ablisgi-mumgumalaga an imakbaloed.
Degisoggu, bela dulemar wisgumaloed, ani an Bab-Jehová gued.
Ani an be-Abonogedid.
Ani an Jacob-waganga dule-gandikid gued.
Ani an be-bendakedid.”