59
Israel-dulemar e-isgued barsogsad
1 Bab-Jehová anmar-abonogega, ganguedsurye soglesulid.
Degi, aku-anmar-itoye soglesurbalid,
ar bela magar anmar-itoged.
2 Ar bemar-isguedi, Bab-Dummadgi-banguega bemar-imaked.
Ar be-isgumaladi, Bab-Dummad bemar-idu wagar-aibirar-megega imaked,
adi, melle bemar-itogegar.
3 Ar bemar ablisbi argan sedimalad,
degi, goonumar isguedbi na be sedimalad.
Be-gwabin-duku unnila gakansaedgi sunmaked,
be-gaya unnila igar-isganaginbi sunmaked.
4 Dule igar-innikigwadgi-sunmaked sulid,
dule napiragwadgi-igar-naboged sulid.
Gakansalegedgi bensurmalad,
na muchub-muchub gakansamalad.
Binsaed-isganagi binsadamalad,
degi, igar-isgana imakdedamalad.
5 Dulemar, naibe-nuegan-e-akwa-bukwayobi binsaed-isgana sedimalad,
diba-nagueyob, igar-isgana amimalad.
Dule, binsaed-isgana we-naibe-akwayob gunnele, burgoed.
Ar dule, we-naibe-akwa marele, ega naibeyob binsaed-isgana ainidagoed.
6 Dibagi geg mor sobleged,
dule diba-soblealed geg e-morga imaked.
Dule-ibmar-imakedi ibmar-isganabi-imakmalad,
e-ibmar-samaladi, unnila sabsur-neg-gagaed.
7 A-dulemar ibmar-isgana bur-imakmalad,
bur dule-ibmar-akalodisulid-ibe ablis eomalad.
E-binsaedi, galagwensur-igar-isganagi binsamalad.
E-ibmar-imakedi bela neg-oichoged.
8 Gwage-bogidikid-igar gwen wissurmalad.
E-ibmar-imakedgi igar-innikimalad naisulid,
unnila igar-noarmaladbi onoardaed.
Ar dule we-igar-isganamarba nanadiile,
gwage-bogidikid-igar wisguosulid.
9 Isaías sogded:
“A-ulale, igar-napira-maid anmargi banguded.
Degi, igar-innikigwadi anmargi aibated.
Neg-meegwadi anmar abdakdii gusanad.
Degi-inigwele, neg-gubyagwaledgi anmar bukudapid.
Neg-ibegwaledi anmar abdakdii gusanad.
Degi-inigwele, anmar negsichidgi bukudapid.
10 Dule-aku-atakmaladyobi, anmar galu-ebu-ebu gudimalad.
Dule-ibyasurmaladyobi, anmar negsichidgi acha-acha gudimalad.
Neg-mutikidyobi, anmar neg-ibgine yoleddamalad.
Anmar bonisuli-inigwele, burgwaleyob na gudimalad.
11 Bela anmar wiob-uurmakedyob, uurmakbukwad.
Nuu-sibu akiginnedyob, anmar akiginbukwad.
Aisaar igar-innikigwad-imaked anmar na abdakbukwanad, gwen imaklessulid.
Ollorgued-igala anmargi amba dikasulid.
12 ”Be wisid, anmar-isguedi bukidarad.
Anmar-isguedi, anmargi aibined.
Anmar-ibmar-isgana-imaked anmarba gudiguad.
Anmar isguedgi-gudiidi, na magar itomalad.
13 Anmar, uayasuli gusad.
Anmar, Bab-Jehová-obachamalad.
Anmar, Bab-Dummad-iedmalad.
Anmar, dogdar dule-mesagwar imakmalad,
degi, dogdar dule-yardaksamalad.
Anmar-binsaedgi-gakansaed-ainiedi, anmar dulemarga sogsamalad.
14 Igar-napira-maidi isdar-daklege gusad,
degi, igar-napiragwadi amba anmargi dikasulid.
Dulemar-ambikuedgi igar-nabirid-oyoleged bergusad.
Binsaed-nikadaedi, bar anmar oyosurgusad.
15 Dule ibmar-nabir-imaked, bar daklesulid.
Ar dule isguedgi bangudele, bela e-ibmar-nikadi ei obelodamalad.
”Bab-Jehová bela igar-innikimalad-bergusa-dakargu, nabir-itossulid.
16 Bab-Dummadi, dule igar-nuegangi bar-binsasuli dakargu, geger dakalid.
A-ulale, Bab-Dummad na e-gangued oyogoye binsaalid.
Adi, anmar-abonogegar, e-igar-innikigwadba anmar-abingaegar.
17 Bab-Dummadi e-igar-innikigwadi, sigu-abgaedyobi yooed,
degi, bormo-gurginyobi abonoleged-igar sioed,
buged-imaked-mola yooed,
urwed-mola yooed.
18 Dule-ibmar-imaksamaladba sabsur-odurdakoed.
Neggwebur-demar-gakaba-bukmaladga buged-imakoed:
E-isdarmaladse urwoed,
degi, e-isdarmaladgi buged-imakoed.
19 ”Dad-argwanedsikmalad Bab-Jehová-nug dobgudmaloed.
Dad-nakwedsikmalad Bab-Jehováʼgi binsaed-nikaa gudmaloed.
Ar ade, diwar-gwichigudanidaedyobi Bab-Jehová na e-buu-imakedba danikoed.”
20 Bab-Jehová weyob soged:
“Dule-bendakedi, Sión-yalase danikoed,
Jacob-wagan-e-isguedga-bukib-binsaega imaknonikoed.
21 ”An bemarbo igar mesed,
An-Burba bemargi maigu guoed.
Be-gwabindukugine, an bega an-gayaburba-nasiksadi, bar begine alliosulid.
Degi, be-mimmigangine, be-wagangine, bar an-gayaburba alliosulid,
emi-ibadse degisadegu guoed.”