DULE-IGAR-NABOMALAD-GARDA
JUECES
GEBE-SOGLENAID
Garda-nug
Dule-Igar-Nabomalad-Garda.Igar-nabomaladi igar-nikaa-negsemaladye sogleged. We-dulemala, dule-bulegan gusmalad.
Dule-Igar-Nabomalad-Gardagi weyob sunmaklenaid
Josué-burgwisad-sorbali, dule-igar-nabomaladi, Israel-dulemar-seali gusad. Geb Israel-dulemar rey-nikunonimaladse dule-igar-nabomalad bergunonikid. Gandikidba dulamar-idusmalad, degine, dule-isganamargi dulemar-bendaksad. Bela we-dulemala, Bab-Dummad-sogedba arbadii gusmalad. Dule-igar-nabomaladi, e-ibmar-imakmaladi na akar-akar nanaed. Bab-Dummadi dule-igar-nabomaladba Israel-dulemar-bendakdii gusad.
We-gardagine, weyob ilemakar sunmaklenaid:
1. Dummagan-igar-nabomalad-ibagan (1:1–3:6).
1a. Israel-dulemar Canaán-yargi ambikunonimalad (1:1–2:5).
1b. Israel-dulemarga dule-igar-nabomalad barmilemaigusad (2:6–3:6).
2. Dummagan-Israel-dulemarga-igar-nabomalad (3:7–16:31).
2a. Otoniel, Aod, degi, Samgar igar-nabomaladga megisad (3:7-31).
2b. Bab-Dummad-gayaburba-barsoged-bundor-Débora (4:1–5:31).
2c. Gedeón, degi, Abimelec igar-nabomaladga megisad (6:1–9:57).
2d. Tola, degi, Jair igar-nabomaladga megisad (10:1-5).
2e. Jefté igar-nabogedga megisad (10:6–12:7).
2f. Ibzán, Elón, degi, Abdón igar-nabomaladga megisad (12:8-15).
2g. Sansón igar-nabogedga megisad (13:1–16:31).
3. Igar-baigan (17:1–21:25).
3a. Levita-dule-Micaía Dan-waganba nagusad (17:1–18:31).
3b. Levita-dule-ome-nukad Benjamín-sordamargi bila-onolesad (19:1–21:25).
Be itogua.
1. DUMMAGAN-IGAR-NABOMALAD-IBAGAN
1
(1:1–3:6)
1a. Israel-dulemar Canaán-yargi ambikunonimalad
(1:1–2:5)
Judá-wagan, Simeón-wagan-ebogwa Adoni-Bezec-gasmalad
1 Josué-burgwisad-sorba, Israel-dulemar Bab-Jehováʼga sogdemalad:
—Canaán-dulemarbo bila-ononaega, ¿doa inse naoe?
2 Bab-Jehová abin-sogded:
—Judá-wagan-inse naoe, ar ade bato a-yala amarga, an uksad.
3 Judá-wagan, e-gwenad-Simeón-waganga sogded:
“Anmarga-yar-uklenaidse be anmarba namala, Canaán-dulemarbo anmar bila-onomaloed. Geb a-sorba anmar bemarba namarmogoed, Canaán-dulemarbo bila-onogegar.”
Degi, Simeón-wagan Judá-waganba nadmarsunnad.
4 Judá-wagan bila-ononadmargu, Bab-Jehová Canaán-dulemargi, degi, Ferezeo-dulemargi Judá-wagan nakwega imaksad. Deun, Bezecʼye-neg-nugadgi miliambe (10,000) sordamar-ogilosmalad. 5 Agine, Judá-wagan, Adoni-Bezec-abingunonimargu, ebo-bila-onodmalad. Geb Canaán-dulemar, degi, Ferezeo-dulemar Judá-wagan-idu duurmakdemalad. 6 Adoni-Bezec wakite gusad. Geb Judá-wagan balegitemargu, bargadapmalad. Gasmargu, e-goo-dummagan, degi, e-nag-goo-dummagan e-ibe siksamalad.
7 Geb degi, Adoni-Bezec weyob sogded: “An reymar-dulapaa-gakambed (70) e-goo-dummagan, degi, e-nag-goo-dummagan an ei siksagusad. Degine, an-mese-urba mas-milemalad gundii damalad. Degisoggu, a-ulale, Bab-Dummad deyob an-imaksamogad.”
Geb a-sorbali, Jerusalén-neggweburse Adoni-Bezec-sesmalad. Agine Adoni-Bezec burgwedapid.
Judá-wagan Jerusalén-neggwebur, degi, Hebrón-neggwebur-susad
8 Judá-wagan, Jerusalén-neggweburgi gwichigudapmalad, geb Jerusalén-neggwebur susmalad. Es-suidgi Jerusalén-dulemar ogilolesad. Geb a-sorbali, Jerusalén-neggwebur-ogumaksamalad.
9 Geb degi, Judá-wagan, Canaán-dulemar-yalaganba-bukwamaladgi bila-ononadmarbalid. Degi, Canaán-dulemar-Neguevʼgi-bukwamaladgi, degine, Canaán-dulemar dad-argwanedsik-nebaganba-bukwamaladgi bila-ononadmarbalid. 10 Deginbali, Judá-wagan, Canaán-dulemar-Hebrónʼgi-bukmaladgi duurmakdemarbalid, ebo-bila-onomalagar. Hebrón-neggweburde, Quiriat-Arbaʼye iduar nuganad. Agi, Judá-wagan, Anac-wagangi nakwismalad: Sesaiʼgi, Ahimánʼgi, degi, Talmaiʼgi.
Otoniel, Debir-neggweburgi-nakwisad, degi, Acsa-nikusad
(Josué 15:15-19)
11 Judá-wagan, Hebrón-akale, Debir-dulemargi duurmakdemarbalid, egi bila-onomalagar. Debir-neggweburde, Quiriat-Seferʼye iduar nuganad. 12 Degine, Caleb sogded: “Ar doa-dule Quiriat-Sefer-neggwebur-ogalakusale, degi, a-neggwebur-susale, egi nakwisale, a-dulega an-sisgwa-Acsa an ukoed, na nikuegar.” 13 Geb Otoniel, Quiriat-Sefer-neggwebur susad. Degisoggu, Caleb, Otonielʼga na e-sisgwa-Acsa-uksasunnad, na nikuegar. Otonielʼde Cenaz-e-machid. Cenazʼdi Caleb-e-urbad.
14 Acsa Otonielʼba nasokargu, Otoniel ega sogded: “Be-babse be nainu egise.” Agi, Acsa moli-uayasuid-birgi-siid aidesad. Geb e-bab-Caleb deyob daksagu, ega sogded:
—¿Igi be itoge?
15 Acsa, e-bab-abin sogded:
—Be anga ibmar-baid-udabi an abedo. Bato be anga napanegdi Neguevʼgi uksad, dii-gammumar-aryomamaid an abebalid.
Degidgi, Caleb, dii-gammumar-nakwar-mamaid ega uksad, degi, dii-gammumar-dear-mamaid ega uksabalid.
Judá-wagan, degi, Benjamín-wagan neggwebur-baigangi nakwisad
16 Moisés-e-saka-e-wagan-Ceneo-dulemar, Judá-waganmarba Sapimar-Ogobgi-Dakleged-Neggwebur-akar, Judá-nega-dulesulidganse nade gusmalad. A-nega-dulesulidgande, Neba-Neguevʼye-nugadba naid, Arad-neg-nugadmobin. Agi megidapmalad.
17 Geb degine, Judá-wagan, Simeón-waganmala bila-ononadmarbalid. Degi, Canaán-dulemar-Sefatʼgi-bukmaladgi nakwismalad, bela swanga neggwebur imaksamalad. A-ulale, Sefat-neggwebur, Hormaʼye onugsasmalad. 18 Judá-wagan, Gaza-neggwebur susmalad, degi, Ascalón-neggwebur, Ecrón-neggwebur susmarbalid. Degine, bela e-nainumarse-bakale, ei-susmalad.
19 Bab-Jehová Judá-sordamarba nue-gudiid. Amarde, yalaganba dulemar-bukwad-onosmar-inigwele, ar nebagi-dulemar-bukwaddi ur-napagined-esgoromar-nikad nikasoggu, onossurmalad. 20 Igi-Moisés-sogsa-gusa, deyob Hebrón-neggwebur Calebʼga uklesad. Geb Caleb, a-neggweburgi Anac-e-masmala-walapaagwad onosad. 21 Degi-inigwele, Benjamín-e-wagandi, Jebuseo-dulemar-Jerusalénʼgi-bukwad onossurgusad. A-ulale, we-garda-narmaklenaidse, Jebuseo-dulemar, Benjamín-dulemar-ebo, bular Jerusalén-neggweburgi bukwagusmalad.
José-wagan Betel-neggwebur susad
22 José-wagan Betel-neggweburgi bila-ononade gusmalad. Bab-Jehováʼdi, José-waganba nue-gudiid. 23 José-wagan dule-ega-neg-argamalad Betel-neggweburse barmisad. We-neggweburde Luzʼye iduar nuganad. 24 Degi, dule-neg-argamalad, dule-wargwen neggweburgi-nodani-daksamargu, ega sogdemalad: “Neggweburse-igar-doglemaid be anmarga oyogele, wile an be-dakmaloed.”
25 Geb a-dule, neggweburse-igar-doglemaid ega oyosad. Degi, na dogsamargu, bela dulemar-neggweburgi-bukwamalad es-suidgi ese-ogilolesmalad. Geb dule-ega-igar-oyosaddi, degi, e-gwenadgandi wiledaksamalad, ogilossurmalad. 26 Degine, a-dule, Het-dulemar-yarse nade gusad. Agi, neggwebur sidapid. Luzʼye e-neggwebur-onugsasad. We-garda narmaklenaidse deyob nuggusad.
Manasés-wagan, degi, Efraín-wagan dulemar-baigan onissulid
27 Manasés-wagan, amba Canaán-dulemar-onissurmogad. Amarde, wemalad:
Bet-Seánʼgi-bukmalad, degi, e-neggwebur-burwiganase-bakar,
Taanacʼgi-bukmalad, degi, e-neggwebur-burwiganase-bakar,
Dorʼgi-bukmalad, degi, e-neggwebur-burwiganase-bakar,
Ibleamʼgi-bukmalad, degi, e-neggwebur-burwiganase-bakar,
Meguidoʼgi-bukmalad, degi, e-neggwebur-burwiganase-bakar.
Degisoggu, Canaán-dulemar, e-yargine, yapa-ainie na bukwa gusmalad.
28 Geb Israel-dulemar gangudmargu, Canaán-dulemarga arbaed-gandikid uksamalad. Degi-inigwele, Canaán-dulemar amba bela onilessurgusad. 29 Efraín-wagan, Gezerʼgi-Canaán-dulemar-bukwad-onissurmogad. Degisoggu, Canaán-dulemar amba Efraín-wagan-abargi bukwagusmalad.
Israel-wagan-baigan dulemar-bukwad onissurmalad
30 Zabulón-wagan, Quitrón-neggweburgi-dulemar-bukwad onissurmarmogad, degi, Naalal-neggweburgi-bukwad onissurmarbalid. Degisoggu, Canaán-dulemar amba Zabulón-wagan-abargi bukwagusmalad. Degi-inigwele, Canaán-dulemarga arbaed-gandikid-uksamalad.
31 Aser-wagan, amba Canaán-dulemar-onissurmogad. Amarde, wemalad:
Acoʼgi-bukmalad, Sidónʼgi-bukmalad,
Ahlabʼgi-bukmalad, degi, Aczibʼgi-bukmalad,
Helbaʼgi-bukmalad, Afecʼgi-bukmalad,
degine, Rehobʼgi-bukmalad.
32 A-ulale, Aser-wagan, Canaán-dulemar-abargi bukwagusmalad.
33 Neftalí-wagan, amba Canaán-dulemar Bet-Semesʼgi-bukwad, degi, Bet-Anatʼgi-bukwad onissurmogad. Degisoggu, Neftalí-wagan, Canaán-dulemar-abargi bukwagusmalad. Degi-inigwele, Bet-Semes-dulemarga, degi, Bet-Anat-dulemarga arbaed-gandikid uksamalad.
34 Amorreo-dulemar, yalaganba Dan-wagan ise-barmiar-imaksad, degine, nebaganba-aidegega gwen imaksasulid. 35 Degisoggu, Amorreo-dulemar na Heres-yargi yapa-ainie gusmalad, degi, Ajalón-yargi, degine, Saalbim-yargi yapa-ainie gusmalad. Degi-inigwele, José-wagan gangudmargua, Amorreo-dulemarga arbaed-gandikid uksamalad.
36 Dakargu, Amorreo-dulemar-e-yar-abingunaid, Acrabim-yar-nakwialidgi onoded, Selaʼse, degi, niba nakwidbalid.