4
Elifaz Jobʼga sabsur-ibmar-sogsad
1 Elifaz Temán-neggweburgined, weyob Jobʼga sogded:
2 “Job, an bega ibmar-sogoedi, be isdar-itogodibe,
degi-inigwele, an bega ibmar sogergebed.
3 Emide, be emar-bukidar odurdakdidaed,
be emar-niga-ogannodidaed,
4 be-sunmakedgi wile-itodimalad-ogannodidaed,
degine, be dule-gege-itomalad-bendakdidaed,
5 degite, emisgindi, begi bonigan-yolenonikidi geger be itoged.
Bonigan begi obin na be itoged.
6 Ar Bab-Dummadgi be dobekwaa gudiiye-sog-inigwele, degite, ¿ibiga be Bab-Dummadgi bensunna?
Na be nued gudiiye-binsadiidde, degite, ¿igi be gudsunna?
7 ”Nue be itogena: Ar dule ibmar-oakalodsulile, ¿sunna we-dule oburgwiledasi?
Dule ibmar-inniki-imakdiile, ¿sunna we-dule oakaloledasi? Suli.
8 Bato an nue neg-daksamogad,
ar dule ibmar-isgana-imakdidibe, ibmar-isgana egi aibined.
9 Ar Bab-Dummad dule-isganagi-uludele,
unnila e-bunnogedgi sunna oburgwed.
10 Amba achumigur-nono-wawaad uludele, degi, e-mimmigan uludmogale, e-nugarmar bibisgoed.
Bab-Dummad deyob dule-isgana-imakoed.
11 Ar igi-achumigurmar, mas-satedba burgwiddae, degi, e-mimmigan banna-banna aineba duurmakdedae,
Bab-Dummad deyob dule-isgana-imakoed.
12 ”Gayaburba-gwensak anse arbakee nonikid,
unnila an sikwas-bollee itosad.
13 Deunni, mutiki dulemar bela gabmamaigua, negburgan an dakalid,
agine, an sulibinsa-itoalid,
14 angi dobed-dummad nagunonikid,
an wawanmakded, bela an-niga batided.
15 Ibmar-burba an-ebus an itononigu,
bela an-abagan iko-iko itonaded.
16 Agine, geb an-asabinni duleyob gwisgunoniki an itoged,
e-daklegeddi aku dakleged.
Gwisgunonigu, bela neg boo nagunonikid,
e-sunmaked sikwas-soge an itoged:
17 ” ‘¿Ar dule Bab-Dummadba bur bule innikidaed nikasi?
¿Ar dule we-napnegse-e-odenonikidba bur bule dule-islidikga gusi?
18 Ar Bab-Dummadi, e-maiga-gudimaladginbela bengudiid.
Ar Bab-Dummadi, e-baliwiturmarbela egi yole daked.
19 Degisoggu, dulemargin-bulesunna, dulemardi unnila napsa gued,
dule ukub-birgi neg-soblessiidyob gued,
samuyob baisursunna abulemaladid.
20 Wakdaradbali, nued-gudii gued,
sedogidbali, bato bergus gued.
Unnila dulemar sikwas wis-dula gudii gued.
Ar burgwidele, bar dulegi binsalegosulid,
deyob dule yoggudoed.
21 Na e-mormar-nikad bela e-ibe miledoed,
gwen binsaed-nikagussuli burgwidoed.’ ”