11
Zofar-sunmaknaid
1 Naamat-neggweburgined-Zofar Jobʼga sunmakded, ega sogded:
2 “¿Ar be we-ibmar-sognaidi, abin-imaklegosurde?
¿Ar we-dule gadi-sunmakedba, nodisuliyob daklegode? Sulirgebed.
3 ¿Bela-we-ibmar-soglesad-abin anmar gaya-maklegode?
¿Dule-be-abin-imakosulidba emargi-dodogoye be soge? Gege be emargi dodoged.
4 Emide, be soged: ‘An-ibmar-soged innikigwadye,
Bab-Dummad-asabinni an ibmar-oakalossurye.’
5 Bitigi Bab-Dummad begi gwichigunonikina gadin.
Bitigi begi sabsur-sunmaknonikina yeerban,
yeer an be-daksaled.
6 Ar Bab-Dummad binsaed-nikadba bega ibmar sogoed.
Ar we-igar-dukuarmamaid akusunna itoleged.
Agi, be geb magar Bab-Dummad-be-odurdaknaidi, be itosaled,
be-isguedba bur bule, be odurdaklegewilubbinye.
7 ”¿Sunna be Bab-Dummad-e-ibmar-burbar-mamaid wisguosi?
¿Sunna be Bab-Dummad-Bela-Gangued-Nikad-ibmar-wisiyob be guosi? Gege be deyob gued.
8 Ar Bab-Dummad-e-binsaed, nibnegba obined,
degite, ¿igi be wisguega imakosunna?
Bab-Dummad-e-binsaed yaa-matusulidba obined.
Degite, ¿igi be e-binsaed wisguosunna?
9 Deginbali, Bab-Dummad-e-ibmar-burbar-mamaidi, napneg-naidba bur dummadid,
demar-matasuid-naidba bur bipisulid.
10 ”Ar Bab-Dummad esgaryase be-metedibe,
degine, igar-nabogega bese gollarbardibe,
¿doa ega sogoe, mer deyob be imakye?
Dule geg ega soged.
11 Ar Bab-Dummadi dule-yardakdimalad magasar daked,
degine, e-ibmar-isgana-imaked baisur-dakosulid.
12 Moli-uayasuid-sapurbalidgine dule gwalulenonikile,
geb dule-binsaedsulidaedi, binsaed-ibedga guoed.
13 ”Ar Bab-Dummadga be gwage ukele,
be-argan ese be onakwele,
14 ibmar-isgana-imaksadgi be banguele,
geb be-neguyagi ibmar-isgana be osulobalile,
15 be bar bingeguosulid,
bar be dobgudii guosulid.
16 Naibid-itodigusadgi bar be binsaosulid,
ukiagwar-ibmar-gusayob be itogoed.
17 Neg-ibegwar-naiyob bega neg nagunonikoed, weligwar be itononikoed.
Negsichidi, bolegoe neg-ainakwiardaeyobi bega mee nagunonikoed.
18 Ar be bendaklegoed-wissoggu, be Bab-Dummadgi bensuli-gudii guoed.
Bab-Dummad be-dikarba bega nakuledii guoed,
degidbali be nue-gabdii guoed.
19 Dule gwen bar be-ogwayedii guosulid, nued be obunnodii guoed.
Deginbali, dulemar bese wilenonimarbaloed.
20 Dule-isganamardina wakinnosulid.
E-ibyamar bela akitoed.
Unnila burgwed-edarbedimalad.”