13
Job san-bendakded
1 Job sogdebalid:
“Bela bemar ibmar-sogsamaladi bato an itosad,
bato an we-ibmar daksad.
2 Ar bemaryopira an wismogad,
gwen be angi obinsurmalad.
3 Bur an Bab-Dummad-Bela-Gangued-Nikadbogwa an sunmakbied,
Bab-Dummadbogwa an-igar bur an nudakbied.
4 Ar bemardi unnila gakansamaladid,
ina-durgan-ibmar-wissurmaladyobi be gumalad, gwen an-bendaksulid.
5 Ar bemar wis boo ambikuele,
degidba, bemar binsaed-nikagued oyosmalaled.
6 Emisgindi, nue an-sunmaked itomalo,
an-ibmar-bega-soged-nikad be itomarmogo.
7 ¿Bemar Bab-Dummad-nuggi gakansaode?
¿Gakansaedgi bemar Bab-Dummad-bendaknaimarye sogode?
8 ¿Ar bemar ega ibmar-nued imaknaiye binsasunde?
¿Ar bemar Bab-Dummad-bendakmaladye sogmarsunde?
9 Ar Bab-Dummad bemar-wilubdaknonikile, ¿igi be gusmalale?
Ar bemar dulemargi-dodolegeyob, ¿Bab-Dummadgi be dodomarye sogmarsunde?
Gege bemar Bab-Dummadgi dodoged.
10 Ar bemar arbakee dule-wargwenbi bendakbigualile,
Bab-Dummad bemargi sabsur-gwichigusaled.
11 Ar Bab-Dummad-e-gargangued-yeerdakleged be-ogwayenonimalaled.
Bemar e-abinni bela-belad gwayidmalaled.
12 Ar bemar binsaed-nued-nika-sunmakedi binsaledid,
bemar-ibmar-sognaidi gwen gangued nikasulid.
13 ”Mer bar sunmakmala, an sunmakmogwelo.
Ar igi an-guoe, ar deyob an guodo.
14 Ar an naibigubier, an naibiguodo,
bar san-bendaklegedgi an binsasulid.
15 Ar Bab-Dummad an-oburgwebiele, an-oburgodo.
An bendaklegodeeye, bar an binsasulid, bato an bela gudiid.
Unnila Bab-Dummad-asabinni, an-gudiid na barsogoed.
16 Ar Bab-Dummad na e an-bendakoedid.
Ar dule-isganadi, Bab-Dummad-asabinni gwen gwisgunonikosulid.
17 ”An-binsaed nue itomalo,
an-ibmar-sognaid be nue itomalo.
18 An-sunmakoed bato guakwaa an ilemaksad.
Bato an wisid, Bab-Dummad ibmar-oakalossuli an-daknonikoed.
19 Ar dule-angi-yoleged-nikardina, bar an golosurdo,
an burgwed-edarbesunnodo.
20 ”Bab-Dummadye, ibmar-sogbo an bese egised.
Ar we-ibmar be anga ukele, an bar begi dukuosulid:
21 Soggwengi: Mer bar be sabsur-an-odurdako.
Sogbogi: Mer bar be sabsur-an-ogwayo.
22 Na san-bendakegala, be-asabin-gwisgudagega be anse gole,
adi, nabir an be-asabin sunmakoed.
Be anse gorsulile, an-inse an bega sunmakodo,
geb bee be an-abin-imakoed.
23 Be anga soge, ibugi an begi isgusa, ibu ibmar-isganamar an imaksa,
biti-be-igargangi an annasa, ibugi an begi yoledii gusa.
24 Bab-Dummadye, ¿ar ibiga be angi dukue?
¿Ar ibiga be-isdaradyob be an-dake?
25 Ar andi gagan-dinnagana burwaba-seledaedyob gued.
Degisoggu, ¿ibiga be an-obelobisunna?
26 Emide be, nunmaked-dummad-itogega be an-imaknaid.
Sapingwaun an ibmar-isgana-imaksad-ular, ¿deyob be an-imaknaisunde?
27 Sepo-yaba be an-nag-odosad.
Bia an nadesogele, bela be angi nakuleged,
an-nag-gannarmarba be angi nakulediid.
28 ”Dule urgo-nunguddaeyob berguddaed,
mor udubiin-gusar-bergudaedyobi, dulemar berguddaed.”