20
Zofar, dule-isganamargi sunmaksad
1 Weyobi, Zofar Naamat-neggweburgined, Job-abin sogded:
2 “An we-ibmar-itosad sunmakebier an-imaked.
An-binsaed-oburusadba sunmakebier an itoged.
3 We-ibmar-sunmaklesad-an-itosadi, isdarsunna an-imaked.
An ibmar-wismogadba an abinsamogargebed.
4 ”Neg-gusad be nue-wisimakaled,
gebesailanagine, we-napneggi dule-aidenonikid-akale,
5 dule-isgana-werguedi sikwas nagudaed.
Unnila sikwas yeer-itodii gudidaed, bato yog-berguar naddaed.
6 Dule-isgana-e-san-dummarba-imakedi, amba nibnegse warmakdibe,
dule-isgana-e-nono amba mogir-ebudibe,
7 we-dule, e-ibmar-isgana-berguddaedyobi bergudoed.
E-aimar sogdemaloed: ¿Bia we-dule nade?
8 We-dule gabdaklegedyobi bergudoed,
negburgan-daklegedyobi sikwas daklegoed.
9 Dulemar, we-dule-isgana-daksagusmalad bar dakosurmalad.
E-neguyagi-gudigusmaladse-bakale, bar dakosurmalad.
10 We-dule-isgana-e-mimmigan, dule-wilegana-wiolesad bendakedsegad.
We-dule-isgana-e-mimmigan, dule-wilesmalad-ibe ibmar-nuegan-susmaladi gannar ukedsegad.
11 Dule-isgana sapingwagwadgine, gandik na itodiile,
ibagwengi amba neg-urba dogedsegad.
12 ”We-dule ibmar-isgana ibnuedga imakdiid,
ibmar-ochiganayob dakdiid.
13 Gwen ibmar-isgana metebigudisulid,
aka egi wergudiid.
14 Igi-dule ibmar-ochigwad dogdar-masale, saban-nunmaked ega ukdae,
deyobi, ibmar-isgana dule-isganaga naibe-e-gichiyob gunonikoed.
15 Ibmar-bukidar-emar-yardakedgi-amisad gannar e-ibe sulegoed.
Bab-Dummad-sogedba gannar e-ibe bela sulegoed.
16 Dule-isgana-e-isguedi naibe-e-gichiyob gued,
we-gichigi dukin burgoed.
17 Bela moli-nunis-bukidar, achanis-bukidar,
diwar-ariomaiyob-guedgi gwen wergudii guosulid.
18 Ibmar-bukidar-amisadi, gannar uknai dakledagoed,
gwen egi werguosulid, egi ibmar-nued amiosulid.
19 Dule-isgana dogdar dule-wilemalad wiosad,
gwen negmar-e-sobsasulid emar-ibe susbalid.
20 ”We-dule-isgana sulibinsa ibmarbina-itodii gusad,
gwen ibmar-nikad itossulid.
Bela ese ibmar sulemai gusad.
21 Ibmar gwen abin sigissulid, bela ese sulesad.
A-ulale, e-ibmar-nasgumaid bergudoed.
22 Ibmar-bukidar-nikadbali, sulibinsa-itodii gudoed,
degidbali, ega boni-dummagan nonikoed.
23 Dule-isgana ibmarba nue-yeer-itodiidgine,
Bab-Dummad egi yolenonikoed, egi ise-urwar gwichigunonikoed.
24 Dule-isgana aisaar gingimar-esgorogi-sobaledgi wakinbi-gudagoenad,
sigu-esgoro-gordikidgi ibitogoed.
25 Sigu-esgoro-gordikidbiid egi yolenonikoedi, ungebigudagoenad,
sigu-duku binagi buudu-noedi ungebigudagoenad.
Dobedbali, surbinsa itodoed.
26 Negasichidi, dule-isgana-edarbenaid,
soo-dule-ogaed-abesulidi, dule-isgana-obelogoed,
e-negse-bakale, ogumakoed.
27 Nibneg, dule-isgana-e-isgusad magar-dakle imaknonikoed.
Napneg, dule-isgana-isgusad barsognonikoed.
28 Bab-Dummad-urwenonikoed-ibagine, dule-isgana-e-neg-bukwad,
dii-dummad-muredba seledoed.
29 Weyobi, Bab-Dummad dule-isganaga bergued nasiksad.
Weyobi, Bab-Dummad, dule-isganaga bergued-igar mesisad.”