36
Eliú-sunmaksad-ilabakegwad
1 Eliú sunmakdebalid, weyob sogded:
2 “Ar an Bab-Dummadgi amba an nued bega ibmar-soged-nikasoggu,
mer be budar itogo.
3 An-bela-bela-nue-ibmar-wisid an bega oyogwelo.
Abali an bega oyogoed, Bab-Dummad-an-obinnisadi innikii ibmar imakmaiye.
4 Inniki an bega soged, bega an gakansaosulid,
an be-asabinni dule-binsaed-ibed gwichid.
5 ”Bab-Dummad dule-gandikidid, dule-ibmar-oakalodisulid obandisulid.
Bab-Dummad gandikidid, bela magar neg-itomaid.
6 Bab-Dummad dule-isgana gudiguega imaksulid.
Dule-wiledimaladgardi igar nabiroged.
7 Bab-Dummad dule-nuegan nue-akwed,
dule-nuegan reymar-abargi-sigega imaked,
degine, dule-nuegan-nugmar odummoged.
8 Ar we-dulemar esgaryagi-sigega galenonikirdi,
wile-itoged egi dognonikirdi,
9 Bab-Dummad we-dulemarga e-isgusad ega oyonaido,
degine, ega oyonaibardo, na san-dummarba-imakedbali igi-isgusmala.
10 Degidbali na magar itomaloed, wede Bab-Dummad ega sunmaknai,
be nue-nanamarye, ibmar-isganagi be bangumarye.
11 Ar we-dulemar Bab-Dummadba ibsaele, Bab-Dummadga arbadele, e-burgwedse nasgumai gumaloed,
weligwar-gudii gumaloed.
12 Ar Bab-Dummadba ibsasurmalardi, wisguosuli ukiagwar es-suidgi burgwenonimaloed,
binsaedsulidbali burgwenonimaloed.
13 ”Dule-isganamar na sae-itodamalad.
Amba Bab-Dummadse sabsur-odurdaklenaile, bipisaale bendakleged egisdasurmalad.
14 Bab-dummaganse-goled-neggi-dule-gambasamalad-burgweyobi,
nuchukwaa burgwiddamalad.
15 Bab-Dummad dule-wiledimalad e-wilediidgi bendaked.
E-nunmaked-itodiid, baisur-itogega imaked.
16 ”Job, ar Bab-Dummad bonigangi be-bendakoed,
neg-nuedse be-ogwisgunonikoed,
bega mas-nuegan ena be-mesegi urboed.
17 Emide, dule-isganamar-wilubdaklegedyob be gunaisunnad,
igar-nabolegedse be gales gunaisunnad,
igar-inniki-imaklegedse be odurdaklegega gunaisunnad.
18 ¡Degisoggu, nue salak!
Abakalegi be manibina surbinsa itodager,
manise be binsaed-galenai gudager,
ese be baklenai gudager.
19 Be mani-ibedguedgi be bendaklegosulid,
be-garganguedgine be bendaklegosurbalid.
20 Neg-mutikid be edarbedii gudager, mer abdako.
Ar mutikidba dulemar obeloleged.
21 Nue salakar. Mer be gannar ibmar-isgana-imakedgi binsao.
Ar be ibmar-isgana-imakdigusadba be wilesad.
22 ”Bab-Dummad na e-ganguedba gannarba maid.
¿Dule Bab-Dummadyob dule-odurdaked-saila gudii? Sate.
23 ¿Doa Bab-Dummadga sogoe, ibiga be deyob ibmar imaknaiye?
Gege dule Bab-Dummadga weyob sogbalid,
noar be ibmar-imaksaye.
24 Bab-Dummad-ibmar-imaked be gatik-ogannogo,
ar namaklegedba we-ibmar-ogannolenai gusad.
25 Bela dulemar Bab-Dummad-ibmar-imaksadi dakmalad.
Ar dulemar dikasuli Bab-Dummad-ibmar-imaksadi sunna bela dakmalad.
26 Bab-Dummad dule-dummad-maisoggu, degidbali, gege anmar e-daed baramied,
e-birga-nikadi gege anmar wisgubalid.
27 ”Bab-Dummad anmarga dii barmimaid,
dii-wiedbali diwar-enguega imakmaid.
28 Mogirmar-dii-owiega imaked,
bela-belad dulemargi dii-owiega imaked.
29 ¿Doa wisguoe, ibiga mogirmar nanae?
¿Doa wisgubaloe, mar-gollalile bia noardae?
30 Bab-Dummadi, demargine mar-gaedi barmied,
degidbali, magatiba demar-naid magar-daklege imaked.
31 Bab-Dummad bela dulemar-yar-baid-baidgi-bukwamalad semaid,
mas-bukib ega ukmaid.
32 Bab-Dummad mar-dakarmakmaid e-argangi gaed,
bia mar-odebie, na e-sogedba mar-odeged.
33 Mar-goled Bab-Dummad-maid oyoged,
mar-goledi, Bab-Dummad-sae-itogedi oyoged.”