4
2c. Jesús, nia-sailase wilubdaklesad
(4:1-11)
(Marcos 1:12-13; Lucas 4:1-13)
1 Juan Bab-Dummad-diigi-ogleged-igargi Jesús-ogsad-sorbali, Bab-Dummad-Burba-Isligwaled, Jesús nia-sailase-wilubdaklegega, nega-dulesulidganba Jesús-sessunnad.
2 Jesús Bab-Dummadse-golegala, iba-dulabogus (40) mutikidba, degi, ibginedba mas-gunsuli gudii gusad. A-sorba, ukur itoalid. 3 Degi, nia-saila-emar-wilubdaked ese nonikid, ega sognonikid:
—Ar be Bab-Dummad-Machi-sunnadiile, we-akwamarga be soge: ‘Maduga be binyeye.’
4 Jesús, nia-saila-abin sogded:
—Noar be soged. Ar Bab-Dummad-Gardagi narmakar maid:
‘Dule maduginbi dula-gudii guosulid,
bela Bab-Dummad-gayaburba-itogedgi dula gudigubaloed.’
Deuteronomio 8:3
5 Geb degi, nia-saila Jerusalén-neggwebur-islidikidse Jesús-sesad. Agi Bab-Dummadse-goled-neg-uas-birgi ogwisdapgu, 6 Jesúsʼga sogded:
—Ar be Bab-Dummad-Machi-sunnadiile, be napase ichomakdo. Ar Bab-Dummad-Gardagi narmakar maid:
‘Na e-baliwiturmar bega barmidagoed,
e-argangi be-gamalagar,
adi, melle be akwagi gowarmakegar.’
Salmo 91:11-12
7 Jesús, nia-saila-abin sogded:
—Nabir be sogendo. Ar Bab-Dummad-Gardagi narmakar maibalid:
‘Melle Bab-Dummad-be-Dummad, be wilubdako.’
Deuteronomio 6:16
8 Geb degi gannar nia-saila yar-matusulidse Jesús-sesbalid. Agi belagwable napa-naid, degi, e-gangumalad ese oyosgu, 9 Jesúsʼga sogded:
—An-nug-odummogega be sindigar an-asabin sigele, geb we-ibmar belagwapa an bega ukoed.
10 Geb degi, Jesús, abin-sogded:
—Nia-saila-Satanás, be angi bangu. Ar Bab-Dummad-Gardagi narmakar maid:
‘Bab-Dummad-be-Dummad-e-nug be odummodii nanao.
Unnila agarbi be ibmar imako.’
Deuteronomio 6:13
11 Geb degi, nia-saila Jesúsʼgi bangussunnad. A-sorba, baliwiturmar Jesúsʼse nonikid, ega ibmar imaknonimalad.
3. JESÚS IBMAR-DAKDISURMALAD IMAKSAD
(4:12–13:58)
3a. Jesús gannar Galilea-yargi e-arbaed-onoded
(4:12-25)
Jesús e-arbaedgi onoded
(Marcos 1:14-15; Lucas 4:14-15)
12 Jesús itoargu, Diigi-dule-oged-Juan esgaryagi mellesiiye, Jesús gannar Galilea-yarse nonikid. 13 Nazaret-neggweburgi-maid bangudgu, Capernaúm-neggweburgi megnonikid. We-neggwebur, Zabulón-yar-naidgi, degi, Neftalí-yar-naidgi mata-dummad-naid-walik siid. 14 Ar epenne Bab-Dummad-gayaburba-barsoged-Isaías-sogsagusadba-guegala, deyob gunonikid. Deun sogsagusgu:
15 “Zabulón-yala, degi, Neftalí-yala,
mata-dummad-naidsik,
Jordán-diwar-obakar-bukmalad,
Galilea-dolad, Judíoʼsurmalad.
16 Dulemar-negsichidgi-gudigusmaladi,
neg-meegwad daksamalad.
Negsichidgi-bukwagusmaladga,
neg mee gunonikid.”
Isaías 9:1-2
17 Degi, agi Jesús Bab-Dummad-gayaburbagi sunmakarsunnad. Weyob sogded: “Ar Bab-Dummad-e-negdakmaid bemarse warmaksad. Degisoggu, be-isgudiidga na be bukib binsamar. Be-daed na be ogwamar.”
Jesús ua-gamalad-warbakegwadse gochad
(Marcos 1:16-20; Lucas 5:1-11)
18 Jesús Galilea-mata-dummad-gakaba nadapgu, dule e-urba-ebo mata-dummadgi saki-minai dakalid. Gwensak Simónʼye nugad. A-dule, Pedroʼye nugbalid. E-urbadi, Andrésʼye nugad. Amarde gusgu ua-gaedgi arbamaladid. 19 Jesús amarga sogded:
—Anba be dagmar. Igi bemar ua-gae, deyobi, dulemar-anba-nagumalaga, dulemar-gaega an be-imakmaloed.
20 Simón, degi, Andrés, e-saki abga yog-indakar imaksamalad, Jesúsʼba yog-naar imaksamalad.
21 Jesús sikwas nadbargu, Jacobo, e-urba-Juanʼbo, urgi e-bab-Zebedeoʼmala saki-matumakbukwa dakdapid. Jesús, eba-dagega, e-sapinganga-guega, amar-ebogwadse gochamogad. 22 Amar, Jesúsʼba-naegala, yog ur-mete, degi, e-bab-Zebedeo-mete nadmalad.
Jesús dulemar-bukidar-nudaksad
(Lucas 6:17-19)
23 Jesús bela Galilea-yargi, Judíoʼmar-onmakedneggi dulemar-odurdakdii gusad, Bab-Dummad-e-negdakmaid-gayaburba-nuedgi sunmakdii gusad. Degine, bela dule-uellemalad, degi, galagwensuli ibmar-nunmak-itomalad-nudakdii gusad.
24 Jesús dulemar-nudakdiidba, bela Siria-yalase e-nug dunguded. A-ular, dulemar bela ibmar-naibi-itodimalad, galagwensuli-gegudimalad, abagan-nunmakdimalad, niasamalad, suu-itodimalad, abagan-burgwarmalad, Jesúsʼse senonimalad. Bela Jesús amar-nudaksad.
25 Dule-bukidar Jesúsʼba duurmaknadap gusmalad:
Galilea-dorgan,
Neggwebur-Gwaambe-bukmaladginmalad (10),
Jerusalénʼginmalad,
Judeaʼginmalad,
degi, Jordán-diwar-obakarmalad,
amar Jesúsʼba duurmaknadap gusmalad.