19
Jesús, ome-metedgi, degi, sui-metedgi sunmaksad
(Mateo 5:31-32; Marcos 10:1-12; Lucas 16:18)
1 Emi Jesús deyob-ibmar-sogsad-sorba, Galileaʼgi bangudsunnad. Judea-yalaganba, degi, Jordán-diwar-obakar nade gusad. 2 Dulemar-bukidar Jesúsʼba nade gusmalad, agi Jesús dule-uellemalad onudaksad.
3 Geb agi gwenna-gwenna Fariseoʼmar Jesúsʼse nonimalad, yamo yardakega ese nonimalad. Ega sognonimalad:
—¿Wede yogsaar sunna ome-meteleye igar mai?
4 Jesús abin-sogded:
—¿Ar bemarde Bab-Dummad-Gardagi absodisurmarsi?
Gebesailagi Bab-Dummad we-napneg-nasikargu,
‘machered ome-ebo abirgunagwar ogwisnonikid.’
Génesis 1:27; 5:2
5 Degi, Jesús sogdebalid:
—Bab-Dummad-Gardagi sognaibalid:
‘A-ulale, machered ome-nikusale, e-babgi bangudoed, e-nangi bangudoed.
Geb machered e-ome-ebo garmakdii guoed. Ebogwadi, san-wargwennagwadga gunonikoed.’
Génesis 2:24
6 ”Ar degisoggu, bar warbosulid. Unnila san-wargwenna gunonimarsunnad. Ar degisoggu, dule, Bab-Dummad-dule-abirgunagwar-imaksadi, gwen na metemalaga imakosur.”
7 Fariseoʼmar, Jesús-abin sogdemalad:
—Ar degite, ome-metega, ¿ibiga Moisés ome-meted-garda-imakoye igar-mesissunna?
8 Jesús abin-sogded:
—Ar Moisés bemar-gwage-dutusulidba, ome-metega, sunna bemar ome-meted-garda imakye bemarga igar mesisgusad. Ar iduardi, deyob igar maisulinad. 9 Andi an bemarga soged, ar doa-dule, unnila e-ome e-dikarba-nosardi, nabir meted. Ar degisulirdi, we-machered ome-baid-nikusale, ome-dikarba negsichigi yolediid. Ar doa-dule, ome-melleded-nikusale, we-dule, negsichigi yoledimogad.
10 Jesús-sapingan Jesúsʼga sokarmarsunnad:
—Ar weyob macheredga ome-nikuedsik ega igar maile, mer bur ome-nikued nabirsundo.
11 Geb degi, Jesús e-sapingan-abin sogded:
—Suli, be noar sogmala. We-ibmar-soglenaid be aku itomalad. Unnila, Bab-Dummad, dulemarga-igar-uksadga, amarbi nabir ome-nikuosuli nanamaloed. 12 Ar gwen-gwen gusgu muu-neg-akale, geg-ome-nikued danikid. Ar gwen-gwen yamo siamar-baisur-dakega alu-gwasuar imaklesmalad. Ar gwen-gwenbali, na dukin Bab-Dummad-e-negdakmaid-ular, mer-ome-nikued imaksamalad. Ar dule na unni omesuli nanao-itogele, omesuli-nanaed-igar na abingado.
Jesús, mimmigangi nued binsasad
(Marcos 10:13-16; Lucas 18:15-17)
13 Geb degi, Jesúsʼse mimmigan-senonimalad, e-argan mimmigan-nonogi mesega, adi, Bab-Dummadse ega golegar. Jesús-sapingan dulemar-mimmigan-senonimaladse uluarmalad. 14 Jesúsʼdi e-sapinganga sogded:
“Mer ese urwemar. Mimmigan anse daged be imakmar. Mer be igar gamala. Ar Bab-Dummad-e-negdakmaid we-mimmiganyob-damaladgadid.”
15 Geb Jesús mimmigan-e-nono-birgi e-argan mesisgu, Bab-Dummadse ega gochad. A-sorba, Jesús nade gusad.
Dule-mani-ibed Jesúsʼse nonikid
(Marcos 10:17-31; Lucas 18:18-30)
16 Geb degi, dule-wargwen Jesúsʼse nonikid, ega sognonikid:
—Odurdaked-saila-nued, burba-geg-bergued an nikuega, ¿ibi-nued an saergebe?
17 Jesús abin-sogded:
—¿Ibiga dule-nuedye be anga soge? Ar dule-nued niksulid. Unnila Bab-Dummadbi wargwenna dule-nued gued. Ar burba-geg-bergued be nikubiele, Bab-Dummad-Igar-Mesisadba be nanaergebed.
18 Dule abin-sogded:
—¿Igid-igarmala?
Geb Jesús abin-sogded:
—‘Melle be dule-oburgo.
Melle be be-abirginsulid-ebo galagwensuli nanao.
Melle be ibmar-atursao.
Melle be gakansaar aimargi sunmako.
19 Be-bab-nug-odummodii, degi, be-nan-nug-odummodii be nanamalo.
Degine, na be dukin san-sabeyobi, emar be sabgumogo.’
Éxodo 20:12-16; Levítico 19:18; Deuteronomio 5:16-20
20 Sapingwa Jesús-abin sogded:
—Gusgu an sapingwagwad-akar bela we-Igarmar-Mamaidba an nanadiid. Emidi, ¿ibubi napi-imaked an abesunna?
21 Jesús abin-sogded:
—Ar igar-napiragwadbi-imakdii be nanabiele, be-negse be nae. Bela be-ibmar-nikadi, manigi be uko. Geb a-mani, dule-wileganaga be mimio. Degiir, geb be nibneggi ibmar-nued nikuoed. Geb a-sorba, anba be dago, an-sapinga guegar.
22 Sapingwa, deyob Jesús ega soge itosgu, naibi-ito naded, ar ade, dule-mani-ibedid.
23 Geb degi, Jesús e-sapinganga sogdesunnad:
—Napira an bemarga soged, ibiyobi dule-mani-ibganga Bab-Dummad-e-negdakmaidse-doged igar dutusuli, ar ade, dogdar maniginbi binsamalad. 24 Gannar an bemarga soged, moli-yargan-mureged bur-baisursunna iko-ibyagi doged, ar dule-mani-ibeddi bur beedse Bab-Dummad-e-negdakmaidse doged.
25 Jesús-e-sapingan, Jesús-wegi-soge-itosgu, nue-geger-ito nadmalad. Agala, sogdemarsunnad:
—¿Ar doa degite, sunna abonolegosunna?
26 Jesús e-sapingan-dakdegu, ega sogded:
—Ar dulemargardi, geg ibmar gued. Bab-Dummadgardi, bela ibmar nabir guedbiid.
27 Geb degi, Pedro abin-imakdegu, sogded:
—Anmardi beba-naega belagwapa ibmar obesad. Degite, anmardi, ¿ibu nikumarmogosunna?
28 Jesús abin-sogded:
—Napira an bemarga soged, Bab-Dummad we-ibmar-bela-ogwaoed-ibagangi, ani Dule-Machi, an-ologan-yeerdaklegedgi an sigidapir, bemar-anba-nagusmalad ologan gwaambe-gakabogwadgi (12) sigmarmogoed, adi, Israel-dorgan-sogambe-gakabogwadga igar-nabosii be gumalagar.
29 ”Ar doa-dule anba-naid-ular ibmar-metele, e-negmar-metele, e-gwenadgan-metele, e-bunmar-metele, e-bab, e-nan, e-ome, e-mimmigan, degine, e-nainumar-metele, we-dule ibmar-dulataledba (100) bur bule abingaoed, degine, burba-geg-berguedi nikubaloed.
30 ”Ar bukidar emar-idudimaladi, emar-sorbalidga gumaloed. Bukidar emar-sorbarmaladdi, emar-idumaladga gumaloed.”