2
Nínive-neggwebur berguoed
Nínive-dorgan, bemargi dule-ibmar-obeloged gwichigudanikid,
be-neggandikidgi, be nakulegwichi imake.
Be-igarmarba be nakulemala, es-suid be guagwar gamala,
bela bemar na niga ogannomala.
Danale be ambikumala,
adi, na be gargangued nikumalagar.
Ar Bab-Jehová Jacob-dulemar-e-yeerdakleged gannar obinoged.
Israel-dulemar-e-yeerdakleged gannar obinoged.
Ar dule-atursamalad e-ibe ibmar susmalanad,
bela e-ibe uva-dub obelosmalanad.
 
E-sorda-bila-onomalad-bulegan-e-sigu-abgamalad, ginnitibi magaled,
sordamar-bila-onomalad mor-ginnigan yoimalad.
E-ur-napaginmalad guagwar bila-onogega-nanaidi, soo-gaeyobi dakarmaknanaid.
Sorda-bila-onomalad e-eswarmar-gani-gani, sakwa bipinmakdanimalad.
E-ur-napaginmalad neg-imbaba gwae-gwae oabarmakdemalad,
binnasuli dulemar-danar-bukumaladgi iirmakdidimalad.
Acha-gwallu-gaeyobi urmar daklenanaed,
mar-gaeyobi dakar-dakar gamalad.
Nínive-neggwebur-bergusad, degi, e-ibe ibmar-sulesad
Nínive-e-rey e-sordagan-bila-onomalad-buleganse goled,
we-sordagan duurmakdegua, na muchub-muchub yolenanai gusad.
Egi-ubodanimalad-abin-bukuega, galu-matusulidsik abarmakdemalad,
degi-inigwele, yawagak-dummagan-diwar-abgamaid argaded, reyneg aimukuded.
Rey-ome gales selemaid,
omegan-ega-arbamaladi nuu-akiginmaiyobi selemamaid,
nue-nunmak-itogedbali bonadapmalad.
 
Nínive-neggwebur dii-sied-mamarisadyob gued, e-diimar ariomaid.
Ese gornanaid: “¡Mer be abarmakmala! ¡Be gannar dagmala!”
Ar dule-wargwensaar gwen gannar aibirsulid.
¡Mani be sumala!
¡Or be atursamala!
Nínive-neggwebur e-ibmar-nuegan yaisulid,
manimar bukidar nikad, ibmar-yeerdaklemalad bukidar nikbalid.
10 Nínive-neggwebur bergus siid,
dule-sate siid, napabi-nai nagusad.
Dobedbali dulemar nig-argwatemalad,
e-yokormar nollomakded.
Bela e-abagan wawanmakded,
e-wagarmar bela sibudiki daklenaded.
Achumigur-nono-wawaad-obelolegoed
11 Achumigur-nono-wawaad-e-neg, ¿bia nade?
Achumigur-e-mimmigan-e-neg, ¿bia nade?
A-neggine, achumigur-machered, e-ome, degi, e-mimmigan, dule-e-ogwayed-sate, dobsuli mamaidaenad.
12 Achumigur-machered na e-mimmiganga san-goa-goa-imakdidaedi, ¿bia nade?
Na e-omeganga ibdurgan-oburgwedaedi, ¿bia nade?
Na e-megedgi ibdurgan-oburgwisad-urbedidaedi, ¿bia nade?
Na e-neggi san-sabodidaedi, ¿bia nade?
3. NÍNIVE-NEGGWEBURGINMALAD WILEDAR-ITOMALOED
(2:13–3:19)
13 Bab-Jehová Bela-Gangued-Nikad weyob soged:
“Emigindi, an bemargi gwisguega danikid.
Be-urmar-napagined-bila-onomalad burubi-sii an imakoed,
be-achumigur-burwigana an es-suidgi oburgoed.
Ibmar-atursamaladi be-yargi an osulogoed,
be-dule-gayaburba-barsogmalad bar bipisaale itolegosulid.”