8
Binsaed-Nikagued dulemarse gornaid
1 Binsaed-Nikagued, ¿anmarse iseedi gornaisursi?
Ibmar-wisigued, ¿iseedi gornaisursi?
2 Binsaed-Nikagued, igarba yar-birigwagi gorgwisdaed,
igarmar-abingunanaidgi gorgwisdaed.
3 Neggwebur-doged-e-yawagakmar-dikarba ise-gollar gornaidaed.
E-yawagak-dogedgine binnasuli weyob-gornaid:
4 “Machergan, bemarse an gornaid,
bela-dulemar-bukwadse an gornaid.
5 Bemar-ibmar-wissurmalad, itoakwaa be gudisamala.
Bemar-binsaedsate-gudimalad, ibmar-magar-itoged be amimala.
6 Nue an-itomalo, an ibmar-nuegan sogesokalid.
An-gwabinduku igar-innikigwadba sunmaksokalid.
7 An ibmar-sogedi gakangi sunmakosulid,
ar gakanmar an nabir-daksulid.
8 An-gayaburbamar, igar-innikigwadbi sunmaked,
darbo sunmaksulid, ibmar-isganagi sunmaksulid.
9 An-gayaburbamar, dule-magar-neg-itogedgala baisursunna-noed.
Dule-binsaed-ibeganga, an-gayaburbamar innikigwadbi ega noed.
10 Mani-abelegedba an-ibmar-odurdakedbina bur bule be sogmala.
Olo-nued-abelegedba ibmar-wisgulegedbina bur bule be sogmala.
11 Ar Binsaed-Nikagued, dimmurgiid-e-akwa-yeerdaklegedba bur bule ibnuedid.
Ibmar-bur-nued egi obinsulid,
ar ibmar-baid-ebo geg wilub-imakleged.”
Binsaed-Nikagued-e-damalad
12 “Ani an Binsaed-Nikaguedi, itoakwaa-binsaedbogwa an gudiid.
Ibmar-wisigued an nikad, itoakwaadaed an nikabalid.
13 Dule, Bab-Jehová-dobekwaa nanadiile,
isdar ibmar-isgana daked.
Ar san-dummarba-imaked, an isdarsun daked,
san-bule-bule-saed, an isdar dakbalid.
Sunnasur-daed, galagwensur-sunmaked, an isdarsun dakbalid.
14 Binsaed-uklegeddi, angi maid,
nuekwa-igar-nabolegeddi, angi maibalid.
Neg-magar-itolegeddi, angi maid,
gargangueddi, angi maibalid.
15 Ani an Binsaed-Nikaguedi, an-sogedba reymar wis negsedimalad.
An-sogedba dule-nug-nikamalad, wis igar-innikii nabodimalad.
16 An-sogedba dule-nug-nikamalad negsedimalad,
an-sogedba dule-negsedimalad napneg-sedimalad.
17 Dule-an-sabmaladi, an sabmogad.
Dule-an-amidimaladi, baisursunna an-amimalad.
18 Ibmar-bukidar-nikuleged angi danikid,
nuga-nued-nikuleged angi danibalid.
Nue-nasguleged-degisadeguad angi danikid,
igar-inniki-imakleged angi danibalid.
19 An-binsaed-ukedi, olo-nuedba bur-nuedid.
Angi-binsaed-nued-amilegedi, mani-nuedba bur-nuedid.
20 Ani an Binsaed-Nikaguedi, igar-inniki-imaklegedba an nanaed,
igar-inniki-naboleged-igarba an gudiid.
21 Dule-an-sabesar-gudimalad an onasgudiid,
ibmar-nued-bukidar-nikubaliga an imakdiid.”
Binsaed-Nikagued-e-danikid
22 “Bab-Jehová ibmar-obinyed-iduale, bato anga burba-dulad uksad.
Amba-yoo ibmar-obinyegua, bato an-obinnisad.
23 Yoo neg-nagued-iduale, Bab-Jehová an-obinnisad.
Napneg amba yoo nagugua, sailanagi an-obinnisad.
24 An gwalulesgua, demar-wilagan amba yoo nagued.
An gwalulesgua, suke-dummagan amba yoo megmalad.
25 Yala-dummagan-nagued-idu, an gwalulesad,
yala-senigana-ambikued-idu, an gwalulesad.
26 Bab-Dummad amba yoo napneg-nasikgua,
amba yoo sapurmar-bukwad-nasikgua,
amba yoo napa-buru-napneg-sobsad-obinyegua,
bato an gwalulesad.
27 Bab-Dummad mogir-arad-nasiknaigua, a-idu, bato an gudiid.
Mogir-demarbo-abingunaid-nasiknaigua, a-idu, bato an gudiid.
28 Bab-Dummad mogirmar-nasiknaigua, a-idu, bato an gudiid.
Demar-wiladgine suke-dummagan-ogannonaigua, a-idu, bato an gudiid.
29 Bab-Dummad demar-mer-murega, demargala igar-abingunanaid-ilemaknaigua, a-idu, bato an gudiid.
Napneg-e-sailagan-mesnaigua, a-idu, bato an gudiid.
30 Bab-Dummadbogwa bela igar-ilemaknai an gusad.
Iba-ilibali weligwar an-itodidaed.
Bab-Dummad-asabinni iba-ilibali an wergudidaed.
31 Bab-Dummad-napneg-obinnisadgi an wergudiid,
dulemar-gudimaladba an wergudiid.”
Burba-dula-gudigued amie, melle burgwedgi binsae
32 Ani an Binsaed-Nikaguedi sogbalid:
“Degisoggu, mimmigan, nue an-itomalo:
Dule an-igar-maidba-nanadiile, egi ise-nued binsalesad.
33 An-binsaed-uked be-nue-itomala,
binsaed-nikaa be damala, mer baisur-dakmala.
34 Dulemar-nabir-an-itodimalad, bane-bane an-yawagak-naba an-edarbedimalad,
we-dulemargi ise-nued binsalesad.
35 Ar dule an-aminonidibe, burba-dula-maid aminonikoed.
Bab-Jehová we-dulegi nabir binsanonikoed.
36 Dule an-obandibe, na dukin bonigan-amioed.
Dule isdar an-dakdibe, na burgwed-amied.”