14
1 Ome-binsaed-ibed e-neguya onasgued.
Ome-binsaed-sulidaeddina, na dukin e-neguya obeloged.
2 Dule-inniki-nanadiid, Bab-Jehová-sogedba gudiid.
Dule-igar-isganaba-gudiiddina, isdar Bab-Dummad-dakdiid.
3 Dule-binsaedsulidaed-e-sunmaked, unnila na san-odummogedgi sunmaked.
Dule-binsaed-ibeddina, e-sunmakedgi bendakleged.
4 Dule moli-bebe-nikad-satele, e-ob-aila binsa ollo sigoed.
Ar moli-bebe-nikad-e-arbaedgi masgulleged nue-amileged.
5 Dule-ibmar-gusad-barsoged-innikigwad, wissur-gakansaed.
Dule-ibmar-gusad-barsoged-napiragwadsuliddi, unnila gakangi sunmaked.
6 Dule-galagwensulidaedi aisaar binsaed-nued nikubi gudidaenad, degi-inigwele, gwen amiosur guoed.
Dule-binsaed-nued-nikarbaddina, baisursunna ibmar durdaked.
7 Dule-binsaedsulidaedgi be bannaba gudisae,
ar a-dulegi, gwen be binsaed-nued amiosulid.
8 Dule-itoakwaadaedi, binsaed-nued-nikadba na magar neg-itoge gudiid.
Dule-binsaedsulidaeddina, na e-binsaedgi yardaklediid.
9 Dule-binsaedsulidaedi, unnila isguedgi burgudiid.
Dule-nuedmargindina, Bab-Dummad nued-binsaed.
10 Dule, na sana-walagwen e-nunmaked magar itoged.
E-wergued, dule-baid eba itogosulid.
11 Dule-isgana-e-neguya bela bergudoed.
Dule-innikidaed-e-neguyadina, nasgumai gudoed.
12 Imbagwenale, dule na e-ibmar-imakedi, inniki-imakye bidaed,
degi-inigwele, e-ibmar-imakedgine, sunna burgwed-igar amied.
13 Imbagwenale, alled-abalagine, gwage-nunmaked itoleged.
Imbagwenale, weligwar-itogedgine, nunmak itoledabalid.
14 Dule-binsaedsulidaedi, na e-igar-isganagi wergudiid.
Dule-nued-daeddina, na ibmar-nued-imakedgi wergudimogad.
15 Dule-baisur-binsaedi, baisursunna binsaed-galeged.
Dule-itoakwaa-binsaeddina, ibmar-imaked-iduale itoakwaa binsaed.
16 Dule-binsaed-ibedi, ibmar-isgana-abin dobekwaa nanaed,
igar-isganagi bachikii gudidaed.
Dule-binsaedsulidaeddina, na san-buled imaked,
gwen-akar-guosurye na binsadabalid.
17 Dule-baisursunna-urwedi, galagwensuli ibmar imaked.
Dule-itoakwaa-binsaeddina, na san-bargaed oyoged.
18 Dule-baisur-binsaedi, unnila galagwensur-binsaleged abingaoed.
Dule-itoakwaa-binsaedgala binsaed-nikarbad uklegoed.
19 Dule-isganamar, dule-nued-asabin yokorgi-sindigar sigmaloed.
Dule-isganamar, dule-innikidamalad-e-igar-itogedgi, gan-bipigi sii gumaloed.
20 Dule-wilegedi, e-aimarbela isdarsunna dakdamalad.
Dule-mani-ibeddina, bukidar e-aimar nikad.
21 Dule, dule-mesagwar-imakdiile, bato isgusye sogleged.
Dule, dule-wileged-sabgudiile, we-dulegi ise-nued binsalesad.
22 Dule-galagwensuli-binsadiid igar-noar imaked.
Dule-ibmar-inniki-imakdiiddi, sabgued-igar amied, igar-innikigwad amibalid.
23 Nue-arbalegedgine, ibmar-nuegan amileged.
Binsa-gayaginbi-soglegeddina, wilegedga emar-imaked.
24 Dule-binsaed-ibedi, e-binsaed-nikaguedgi e-nug dungued.
Dule-binsaedsulidaeddina, e-binsaedsulidaedgi na e-wileged amied.
25 Dule-ibmar-gusad-barsoged-innikigwadi, burgwedgi nue-emar-bendaked.
Dule-ibmar-gusad-barsoged-napiragwadsuliddi, unnila gakansaedba emar-wioged.
26 Bab-Jehováʼgi-dobekwaa-nanalegedgine, bela-bela bendakleged siid.
E-mimmigana, Bab-Dummadgi bendakleged nue-amimarmogad.
27 Bab-Jehováʼgi-dobekwaa-nanalegedgine, nued-gudiguleged amileged.
Dule-deyob-gudiile, muis burgosulid.
28 Rey-e-garganguedi e-dulemar-bukidarad-nikadba siid.
Dule-nuga-nikadi e-dulemar-satedba, bingesaar dakleged, agi nollomaksiid.
29 Dule baisursunna-urwesulidi, magasar neg-itoged.
Dule-bargaedsuli-gudiiddina, galagwensuli-binsaed yoga-oyogar imaked.
30 Dule-gwage-bogidik-nikadi, nued-gudii gued.
Dule-nobgueddina, bela na san-oichoged.
31 Dule-wileged-apor-imakedi, Bab-Dummadgine-yolenaid.
Dule-wileged-sabgudiiddina, Bab-Dummad-e-nug odummodiid.
32 Dule-isgana e-ibmar-isgana-imakedgi boni-amied.
Dule-innikidaeddina, e-daedgine na san-bendaked amied.
33 Dule-binsaed-ibed-e-gwagegine binsaed-nikagued naid.
Dule-binsaedsulidaeddina, binsaed-nikagued magar-itosulid.
34 Ibmar-inniki-imaklegedgi neggwebur ogannolesiid.
Isguedgindina, neggweburmar wiolesiid.
35 Rey, e-mai-itoakwaa-gudiidgi, nued-binsaed oyoged.
Dule-e-nuggi-dododiidgardina, e-urwed oyoged.