8. REY-LEMUEL BINSAED-NUEGAN NARMAKSAD
31
(31:1-9)
Rey-Lemuel-ibmarmar-sogsad. E-nana we-igargi Lemuel-odurdaksad:
 
“Machi, ¿igi an bega ibmar sogsale?
An-nukugi-dungued, ¿igi an be-unasale?
Bab-Dummadse-ise-egislegaled-mimmi-gued,
¿igi na bega binsaed uksale?
 
”Melle omeganbina surbinsa itogo.
Bukidar reymar omeganse galakumaid.
 
”Lemuel, reymar sisa-gobedi, igar-nuedsulid.
Dule-dummagan-negdakmaidi mumguedi, igar-nuedsurbalid.
Abakale, mumgudedgi, igar-maid iedmalale,
dule-wilemaladgi bar binsasuli gudmalale.
Bur be dulemar-burgwedanigus-maidga sisa uke,
bur be dulemar-sae-itodiidga vino uke,
adi, itoba na mumgumalagar, ibmar-abesa-gudiid, iemalagar,
ise-wilegar-gudiidgi mer bar binsamalagar.
 
”Dule-belagwadamalad-ular be sunmake,
dule-sergan-sated-ibmar-ular be gwisgue.
Wemar-ular be sunmake,
igar-napiragwadba ega be igar itoge,
dule-wilese-gudimalad be bendake.
Dule-ibmar-nue-abesagudimalad be bendake.”
9. OME-INNIKIDAED-E-NUG-ODUMMOLEGED
(31:10-31)
10 Ome-innikigwadba-e-daed-oyogedi, ¿doa amioe?
Ar akwa-nuegan-gargerbamaladba bur sunsogedid.
 
11 E-sui egi bensurdaed.
E-omeba ibmar nikagudaed, ega ibmar galakusurdaed.
12 Ome e-suiga, bane-bane ibidar-nuedga gued,
ibmar-isganaga ega gusulid.
13 Ome, lino-dub-baknaddaed, sibad-wawaad-e-absar baknaddabalid,
na yeer-itogedba e-gonugargi morgi arbadaed.
14 Igi-ur-dummagan-ibmar-ukedi, dikasuli-mas-sedanidae,
debayobi, ome mas sedanidaed.
15 Bolegoedba gwichiguardaed,
masgi na e-mimmigan ogunnardaed,
e-maimarga, neggi-ibmar-imaklegedi urmakdaed.
16 Nainu-nued amidaed, geb nainu bakdaed,
nainugi, uvaʼbi bipirmaknai imakdaed.
17 Ome, arbaega, guagwar gunaidaed,
gandikidba na surgan-minaidaed.
18 Ome, e-ibmar-ukedi nueganbi nasgumaidaed.
Mutikidbali, e-neggi gwallu-dummad akinsisulid,
ar mutik-mutik arbasidaed.
19 Argan-nailik mor-sobed-naku gani sidaed.
Argan-baidsik, dub ebisidaed.
20 Ome, dule-wileged-bendakdaed,
dule-ibmar-abesaagudiid-bendakdaed.
21 Dambed-sibudik-sibudik batealile, e-mimmiganga bukib-binsadasulid.
Ar bela e-mimmigan dambed-mor yoyoidbi damalad.
22 Ome na dukin, ubsan-mor-uki mor-baid makdaed,
mor-suir-akwagiid yoidaed, lino-mor-sunsogmalad yoidabalid.
23 Dulemar bela neggweburgi e-sui mag-dakedbimalad.
E-sui, ibmar-dummadga dummagan-abargi simogad.
24 Ome, lino-mor-nued-sobedi, saderba-mor-nagumalad-imakedi,
dulemar-ibmar-ukmaladga manigi ukdaed.
25 Ome, innikigwadba gudidaed. E-nug dummarbaa gued.
Ibmar-guoedga, bukib binsadasulid, ega alledaed.
26 Sunmakdele, binsaed-nikaa sunmakdedaed,
dule-odurdakdele, sabekwaa dule-odurdakdaed.
27 E-neguya-selemaidgi nue-nakuledaed,
e-mani-amiedginbi na mas-gundaed.
 
28 E-mimmigan, e-nanga sokardaed, bedi nan-nuedye.
E-sui, e-ome-nug odummodamogad. Ega sogdaed:
29 “Ome-nuegan bukidar nikaye,
degi-inigwele, bedi amarba bur bule ome-nuedye.”
 
30 Yeerdaklegedi, dule-yamogedid. Yeerdaklegedi, sikwas yeer dakledaed.
Ome Bab-Jehová-dobee-nanaeddi, e-nug odummolegoed.
 
31 Dulemar, ome-e-ibmar-imaked magar dakmarsun.
Bela dulemar-abargi e-nug odummolesun.