7
Ega igar-nabogega Bab-Dummadse goled
David, Benjamín-wagwa-Cus-ibmar-imaksadgi
Bab-Jehováʼga Sigaiónʼgi namaksad.
1 An-Bab-Dummad-Jehováʼye, be an-bendake,
ar an begi bendakleged amied.
¡Dulemar-an-balegindimaladgi be an-bendake!
¡Amargi be an-ollor-imake!
2 Ar be an-bendaksulile, ¿doa bar an-bendakosunna?
Dule-baid an-bendaked sated.
Ar igi achumigur dule-ichimake,
deyobi, an-isdarmalad an-imakmaloed.
Ar igi achumigur dule-gunne,
deyobi, an-obelomaloed.
3 An-Bab-Dummad-Jehováʼye, we-ibmar-soggwengi nosa be an-dakdibe:
An ibmar-isgana imaksadibe,
4 an-aigi an nue-yolesdibe,
an-isdarad-ibe an yogasaar ibmar-susdibe,
5 adi, an-isdarmalad an-baleginner, akarsurdo,
an-isdarmalad an-bargado,
dii-dii napagi an-oburgwedse angi annamardo.
An-nug-dummad-nikad obelomalar, akarsurdo.
6 Bab-Jehováʼye, be sae-itogedba an-isdarmalad-anse-urwebukwadgi be gwisgudage.
Anga be igar nabodage.
An-Bab-Dummadye, anba be nague,
igar-innikigwadba be anga igar naboge.
7 Bab-Jehováʼye, dulemar-baid-baid be-asabin-ambikuega be imake.
Nibnega-akar a-dulemar-e-saila-dummadga be gue.
8 Bab-Jehováʼye, be dulemarga igar itosoggu,
an-ibmar-inniki-imakdiidba be anga igar itoge,
an-nossulidba be anga igar naboge.
9 Bab-Jehová, bedi Bab-Dummad-innikigwadid,
bedi dule-binsaed bela baramied.
Degisoggu, dule-isganamar-e-ibmar-isgana-imakdimalad be obeloge.
Dule-nuegandi, melle be osikirmakega imake.
10 Bab-Dummad, sigu-abgaedyob an-irwa-gwisguedid,
Bab-Dummad, na dule-gwage-ulubgi-inniki-binsadimalad bendakedid.
11 Bab-Dummad, dulega igar-itogedgine, innikigwadba ega igar nabiroged,
bane-bane dule-isganamar sabsur-odurdaked.
12 Ar dule-isganamar, na e-isguedga bukib-binsasulile, amar-idu, Bab-Dummad es-suid-e-nugar ebinoed,
amar-idu e-warsi guagwar dakbaloed.
13 Ar deyopira, Bab-Dummad ibmar-dule-gindakmalad guagwar urbisbalid,
sigu-sooba-gamalad sobsabalid.
14 Dule-isgana, igar-isganaginbi binsadaed,
ibmar-isgana-imakega igar amidaed,
geb igar-isgana imaknonidaed.
15 Dule-isgana, yaa-matusur akwisad.
A-yaa-matusulidgi na dukin argwanoed.
16 Dule-isgana, na e-igar-isgana-imaked egi aibinoed,
e-sabsur-urwed egi aibinoed.
17 Bab-Jehová anga igar-inniki-nabosadba, an e-nug odummogoed.
Bab-Dummad-Bur-Birigined-Jehováʼga, an namaked.