12
Bab-Dummadse bendakleged-egised
David we-namaked narmaksad. Namakmalad-e-iduedga soglenaid:
We-namakleged, Seminitʼba namaklegoye.
1 Bab-Jehováʼye, be anmar-bendake.
Dule-be-sogedba-nanamalad bergusad.
We-napneggine, dule-napiragwad bar-daklesulid.
2 Dulemar na muchub-muchub gakangi sunmakmalad,
nue-nabiridyob sunmakmalad.
Asginbi nued sunmakmalad,
ulubgindi, emar-yardakedgi binsamalad.
3 Bab-Jehováʼye, dule-nue-nabiridyob-sunmakmalad, bela be obeloge.
Dule-san-dummarba-sunmakmalad, bela be osuloge.
4 We-dulemar sogdimalad:
“Sunmakedgi anmar dulemargi obinoed.
Aga anmar gwabin-duku nikasursi.
Anmar-gwabin-duku dule-baidgadsulid.
¿Degite, doa anmargi obinosunna?
Dule anmargi-obined sate.”
5 Emide, Bab-Jehová, bede soged:
“Dule-e-bendaked-satemalad mesagwar-imaklediid-ular, an gwisguoye.
Dule ibmar-sate-gudimaladba bela-belad-bodimalad,
an bendakoye.”
6 Bab-Jehová-gayaburba isedar-swilimakaledid.
Igi mani swilimakar-imaklegega, soo-yagi gannar-gannar ilagugle (7) dulege,
aba bur bule Bab-Dummad-gayaburba swilidik gued.
7 Bab-Jehováʼye, bebi-unnila dule-isganamar-idu, be anmar-edarboed.
We-dule-isganamar-idu, degisadegu, be anmar-irwa gwisguoed.
8 Dule-isganamar anmar-ebirdiile, bee be anmar-edarboed.
We-napneggi igar-isganamar bur yeerdaklealile, bee be anmar-bendakoed.