21
Bab-Dummad Rey-David-nakwega imaksad
David we-namaked narmaksad. Namakmalad-e-iduedga soglenaid.
1 Bab-Jehová, be-ganguedgi rey weligwar itoged.
E-isdarmaladgi-nakwega be imaksadba, rey nue-weligwar itoged.
2 Bab-Jehová, e-ulubgi ibmar-abediid ega be uksad.
Ibmar-bese-egichisadi, mer an ega gwen ukodeeye be sogsasulid.
3 Bab-Jehová, reygi be nued binsasad.
E-nonogi, gurgin-olobiid ega be sisad.
4 We-reyde, san-burba-dula-gudigued bese egichisad.
Suitii degisadegu dula-gudiguega be imaksad.
5 Bab-Jehová, be rey-bendakedba, rey bila-ononanaidgi-nakwega be imaksad.
Be-bendakedba, e-gangued dummarba naded.
Be-bendakedba, e-nug nue be odungusad.
Bela-bela e-gangued-yeerdakleged reyga be uksabalid.
6 Bab-Dummad, reygi nuedbi degisadegu be binsamaid.
Eba be gudiidbali, rey weligwar itodaed.
7 Bab-Jehová-Bur-Birigined-e-sabgued geg bergusoggu,
rey a-Bab-Jehováʼgi bensulidbali, gandik megoed, onolegosulid.
8 Bab-Jehová, be-ganguedgi bela be-isdarmalad bese galegoed,
bela begi gwisgudidimalad bese galebaloed.
9 Bab-Jehová, be nonikile, be-isdarmalad sooga be obinyoed.
Bab-Jehová, be ulude-sogele, igi soo bela ibmar-obelodae,
deyobi, bela be-isdarmalad bese bergumaloed,
bela bese girgumaloed.
10 Bab-Dummad, bela we-napneggi be-isdarmalad-e-mimmigan be osulogoed,
dulemar-abargi bela e-anagan be sate imakoed.
11 Amba akar be-imakbimalandibe, amba gwen be-oakalogosurmalad.
Ibmar-isgana-imakega igar-amimardibe, gwen imakosurmalad.
12 Be-warsi be-isdarmaladgi be oyodogu,
be-abin yogasaar duurmakdemaloed.
13 ¡Bab-Jehováʼye, be-nug-odummolegega be-gangued be oyoge!
¡Be-ganguedgi namakar anmar be-nug odummomaloed!