25
Bab-Dummad be an-bendake
David we-namaked narmaksad.
1 Bab-Jehováʼye, an be-bensuli
an bese goled.
2 An-Bab-Dummadye, an begi bendakleged amied,
mer bingeguega be an-imake.
¡An-isdarmalad mer angi-dodoged be imake!
3 Ar begi-bendakleged-amimalad bipisaar bingeguosulid,
dulemar igarsuli emargi-gwisgudimaladdi bingegumaloed.
4 Bab-Jehová, Be-Igarmar be anga oyoge,
Be-Igarmargi be an-odurdake.
5 Be-Igar-innikigwadba be an-nide,
a-Igargi be an-odurdake.
Bedi, an-Bab-Dummad-an-abonogedid,
andi, gusgu beginbi bendakleged amied.
6 Bab-Jehová, be-ebinsao, be wile-dule-dakedid, be dule-sabguedid.
Weyob be-daedi, anga be oyodiguad.
7 An sapingwaun isgudigusaddi, an begi-yolesaddi, mer be ebinsao.
Bab-Jehová, be-wile-dule-dakedba, wile be an-dako.
Bab-Jehová, ar bedi dule-nuedid.
8 Bab-Jehová dule-nuedid, dule-innikigwadid,
a-ular, dule-isganamarga igar-maid-imakega oyoged.
9 Bab-Jehová igar-innikigwadba dulemar-san-bipi-imakdimalad nied,
Bab-Dummad e-igargi dulemar-san-dummarba-imakdisurmalad odurdakbalid.
10 Bab-Jehová-Igar-Mesisadba-ibsadimaladga, Bab-Jehová-Igar-Islidikid-Mesisadba-nanadimaladga,
bela Bab-Jehová-e-Igarmar, sabgued-igalad, napiragwad-igalad.
11 Bab-Jehová, na be-nug-sabedba,
an-nue-isgusadi, be anga osuloge.
12 Bab-Jehová, dule-e-dobee-nanadiidga oyogoed,
biti-igarba nanaoe.
13 A-dule, nued-gudii guoed,
e-wagandi nainumar gamaloed.
14 Bab-Jehová dulemar-e-nug-odummodimaladbo walikaa gued,
amarga e-igar-mesisad sogbalid.
15 Ar Bab-Dummaddi emar-yamoged-igargi an-ollorsaed.
A-ular, Bab-Jehováʼginbi an ataked.
16 Bab-Jehováʼye, be wile-an-dake,
andi walagwen gudiid, an wile itodiid.
17 Bab-Jehováʼye, an-suli-suli-itoged bur bule gangumaid.
An-bukib-binsadiid, be anga osuloge.
18 Bab-Jehováʼye, an-ulubgi-naibi-itoged be dake,
an boniganba-galitodiid be dake.
Bela an-isgued be anga elie.
19 Bab-Jehováʼye, be dake, ibiyobi an-isdarmalad mergusa,
bela-bela nue-isdar an-dakmalad.
20 ¡We-dulemar-idu be an-odukue!
¡We-dulemargi be an-ollorsae!
Mer bingegued be an-imake,
ar andi begi bensulid.
21 An-ibmar-oakalossulid, an-inniki-daedi,
an-bendakedga gued. Ar andi begi bensulid.
22 ¡Bab-Dummadye, Israel-dulemar suli-suli-itogedgi, be bendake!