31
Bab-Jehováʼgi bengusulid
David we-namaked narmaksad. Namakmalad-e-iduedga soglenaid.
1 Bab-Jehová, an begi bensulid.
Mer bingeguega be an-imake.
¡Be-igar-innikigwadgi, be an-bendake!
2 Bab-Jehováʼye, be an-itoge,
gwae be an-bendakdage.
¡Be an-akwasaila-gandikidyob gued,
be an-abonoged-gandikidyob gued!
3 Bab-Jehová, be an-akwasaila-gandikid-dukuedid,
an-abonoged-neggandikidid.
Degisoggu, be-nug-sabed-ular,
be an-idue, be an-nide.
4 Bab-Jehováʼye, an-isdarmaladi emar-yamoged-igar-an-idu-mesismaladgi be an-ollor-imake,
ar bedi an-dukuedid.
5 Bab-Dummad, be-argangi an-san-burba an uksun.
Bab-Dummad-Jehová-napiragwad, bee be an-abonosad.
6 Dule-ibmar-babyob-imakleged-e-nug-odummodimalad an isdar-daked.
Ar andi, Bab-Jehováʼgi bensulid.
7 Bab-Jehová, an be-sabguedgi yeer itoged,
an egi wergubalid.
Ar bedi an-ulubgi-naibi-itoged daksad,
an-ulubgi-surbinsa-itoged be wisid.
8 Bab-Jehová an-isdarmaladga be an-uksasulid,
be an-ollor-imaksad.
9 Bab-Jehováʼye, wile be an-dake,
ar andi surbinsa-itoged.
An wile-itogedba an-ibya mommoleded,
an-abagan, an-ulub bela nunmaked.
10 An-naibi-itogedba bela an-abagan nollomakded,
an bukib-binsaedbi birgamar onamaid.
An-isgued-ular, an-gangued bela berguded,
an-garmar bela nollomakded.
11 Bela an-isdarmaladga an ibmar-dodogedga gued,
an-neg-dikarba-mamaid bur bule angi dodomalad.
Dulemar-magar-an-dakmalad an-dakalile, an-dobguddamalad,
¡Dulemar igarba an-abingualile, angi gwakiddamalad!
12 Burgwisayobi dulemar bar angi binsasulid,
nog-mamarisayobi an gunonikid.
13 Dulemar-bukidar emargi-gakansaar-sunmakmar an itoged.
An bia naddibe, an dobee itoged.
Ar dulemar angi-aibinega na atosmalad,
an-oburgwedgi binsamalad.
14 Bab-Jehová, ar andi begi bensulid.
Andi soged: “¡Be an-Bab-Dummadye.
15 An be-nugginbi gudiiye!”
An-isdarmaladgi, an-balegindimaladgi, be an-ollor-imake.
16 Bab-Jehováʼye, angi be nued binsae,
¡Be-sabgued-dummad-nikadba be an-abonoge!
17 Bab-Jehováʼye, ar an bese gochasoggu,
mer bingeguega be an-imake.
Dule-isganamardi bingeguega be imake,
gaya-bogidiki burgwarmalad-meged-galugi be mese.
18 Dule-gakansilimar-e-gaya bogidik be imake.
Na san-dummarba-imakedba, dule-mesagwar-imakedba, dule-nuedgi ibmar-sabsur-sogdimalad.
19 Bab-Jehová, be-sabgued ibiyobi dungue.
Dule-be-nug-odummodimaladga, be-sabed be oyoged.
Dulemar-wagab, dule-begi-bengusurmaladga, be-sabgued be oyoged.
20 Bab-Jehová, dule-nued dule-egi-isdar-binsaedgi, be-walik be odukued.
Dule-nued dule-urwedginbi-sunmakmaladgi, bese-goled-neg-sunna-selegedgi be odukued.
21 Bab-Jehová-nug an odummosun.
Ar sordamar neggwebur-ebiris an-oburgwega bukwagusmargu, e-sabgued-dummad anga oyosad.
22 An surbinsa-itogedba an sogde gusad: “Be-asabin bar be an-ogwisguosurye.”
Degi-inigwele, Bab-Jehová, an bese gochagua, bedi an-wilesakwaa-gornaid itosad.
23 Bela-bemar-Bab-Jehováʼba-nanaid, Bab-Jehová-sabgumala.
Bab-Jehová, dule-ega-galakudisurmalad na edarbed.
Ar Bab-Jehová dule-na-san-dummarba-imakdimaladdi, sabsur-odurdaked.
24 Bela Bab-Jehováʼgi-bensurmalad gangumala, niga-ogannomala.