45
Rey-ome-nikunaidgi namakleged
Namakmalad-e-iduedga sogleged: “Dutu-lirioʼga-namaklegedyob we-namaked namaklegoed.”
Coré-wagan we-namaked narmaksad.
1 An-ulubgi ibmar-nued sogbie an itoged.
An reyga an-namaked-narmaksad soged.
An-gwabin garda-suar-yeer-narmakeyobi gued.
2 Rey, be bur dulemar-baiganba yeerdakleged,
be bur yeer-sunmaked,
ar Bab-Dummad degisadegu begi ise-nued binsasad.
3 Rey, be-ganguedgi, be-yeerdaklegedgi, be-es-suid be-saderba be nasike.
4 Be-gangued-yeerdaklegedgi nakwemai be imake.
Igar-napiragwadbina urwedii be sae.
Dule-wileganaga ibmar-innikigwad-imakdii be gue.
¡Rey, be-ganguedgi ibmar-dummagan-imakdii be nanae!
5 Be-sigu-swiswidikmaladgi, be-isdarmalad-bese-galakudii be imake.
A-sigumar, rey-e-isdarmalad-gwagegi yoledapoed.
6 Bab-Dummad, be-negsemaid degisadeguoed.
Be-negsemaid, igar-maidba be imaked.
7 Igar-innikigwad-imaked be yeer-itodaed,
ibmar-isganadi, be isdar-daked.
A-ulale, Bab-Dummad-be-Bab-Dummadi, be-aimar-baiganba be-susad.
Be-Bab-Dummad, ina-wawadikidgi be-wawamaksad,
weligwar-ito be-imaksad.
8 Be-mola, we-ina-wawadikmaladbi yapanned:
Mirraʼye-nugadbi, áloeʼye-nugadbi, canelaʼye-nugadbi yapanned.
Reyneg-marfilʼgi-ise-nudakaled-akale,
gar-bega-ogorlenaidi weligwar be-imaked.
9 Yagana-be-ebilidmaladi, reymar-sisgan nanaed.
Be-ologana-argan-nuedsik rey-ome siid.
We-rey-omede, Ofir-or-nuedgi ise-nudakar siid.
10 Bunagwa, an bega-ibmar-sogoedi, nue be an-itogo.
Be-dulemar be iege,
be-gwenadgangi mer be bar binsae.
11 Be-yeerdaklegedba rey nue-be-abeged.
Rey be-dummadid, degisoggu, eba be ibsae.
12 Tiro-dorgan binsa-ibmar-uklemalad bega sedagoed.
Dule-mani-ibgan ega-ibmar-nued-imakbi be-abemaloed.
13 Rey-e-sisgwa e-gabedyaba nue-nudakar maid.
E-mor ber olobi dakleged.
14 E-mor-ise-nue-sobaled-yoi reyse seledoed.
E-aimar-yagana e-sorba-nai nadapmaloed.
15 Weligwar itonadapmaloed,
Rey-e-negse weligwaledgi dogdapmaloed.
16 Rey, be-masmala be-dadgan-negsemai-gusad-ganagi sigmaloed.
Amar bela bemar-yala-semamai gumaloed.
17 An bega we-namaknaidgi, dulemar-be-iegega an imakosulid.
Bela neggwebur-baiganginmalad be-ebinsadiguega an imakoed.