56
Bensulidgi Bab-Dummadse-goled
Namakmalad-e-iduedga soglesad:
Sapur-nuu surgar-war-birgi namaksidaedba namakoye.
Deunni, Filistea-dulemar Gat-neggweburgi David-gasgusmalad.
Agi David Mictam-narmaksad.
1 Bab-Dummadye, wile be an-dake,
dulemar an-balegindii nanaed.
Bane-bane sae-an-dakmaladi, an-wiodimalad.
2 Bane-bane an-isdarmaladi, an-balegindii nanaed.
Dule-san-dummarba-imakdimaladi, bukidar angi gwisgudimalad.
3 An dobe-itoalile,
begi an benguosulid.
4 Bab-Dummad, an begi bensulid,
an be-gayaburba odummoged.
Bab-Dummad, an begi bensulid,
an dobe-itosulid.
Degisoggu, ¿ar igi dule an-imakosunna?
Dule akar an-imakosulid.
5 Bane-bane an-sunmaked oakaloddamalad,
gusgu an-oakalogedgi binsadamalad.
6 Danakwaa ambikusdamalad,
na dukusdamalad.
An-oburgwed na yeer-itomalad.
Yamo arbakee an-ibmar-imaked dakdimalad.
7 Bab-Dummad, we-dulemar be sabsur-odurdaksun.
Melle begi wakinnega be imako.
8 An-bukib-binsadiid be nue-wisid.
An-ibyanis-aryodiid be daksabalid
¿Ar we-ibmar be-gardagi narmakar maisursi?
9 An-bendakega na bese gotele, an-isdarmalad duurmakdoed.
Ibmar-soggwen an wisid:
Bab-Dummad, nue anba naid.
10 Bab-Dummad, an begi bensulid,
be-gayaburba an odummoged.
Bab-Jehová, an begi bensulid,
be-gayaburba an odummoged.
11 Bab-Dummad, an begi bensulid,
an dobe-itosulid.
Degisoggu, ¿ar igi dule an-imakosunna?
Dule akar an-imakosuli.
12 Bab-Dummad, an be-asabinni ibmar-saoye-an-sogsadi, angi siid.
Ibmar-uklegedi, an bega ukoed.
13 Bab-Dummad, burgwedgi be an-ollorsasad.
Igar-bulegangi be an ollor-imaksad.
Adi, be-asabinni, neg-meegwadgi dula-nanadii guegar.