68
Bab-Dummad, Sinaí-yala-e-ibedid, Neg-Islidikid-e-ibedid
David we-namaked namakmalad-e-iduedga narmaksad.
1 Bab-Dummad, dakebinne. Be-isdarmalad bela be oaisakisun.
Dule-be-isdardakdimalad bela be-idu be oduurmaksun.
2 Igi waa burwaba yogguddae,
debayobi, Bab-Dummadi dule-isganamar-imakoed.
Igi baka-gwallu soo-abin daluddae,
debayobi, dule-isganamar Bab-Dummad-abin bergudoed.
3 Dule-innikidamaladdi weligwale itomaloed,
Bab-Dummad-asabin yeer itomaloed,
weligwaledbali oichomakdemaloed.
4 Bab-Dummadga be namakmar,
E-nuggi-namaklegedgi be namakmar,
mogir-billigangi-sii-nanaed-e-nug be odummomar,
¡Bab-Jehováʼgi wergumala!
¡E-asabin be namakmala!
5 Bab-Dummad-e-neg-islidikidgi-maidi, dulemar-sergan-sated-e-babad,
ome-ei-sui-burgwismalad-e-bendakedid.
6 Bab-Dummad, dule-wilesakwaa-walagwen-gudimalad, neguya-nikuega imaked,
dule-galesbukwamalad-onogedid.
Dule Bab-Dummadba-ibsadisurmaladdi, napa-isganagi ambikuoed.
7 Bab-Dummad, be Israel-dulemar-abargi-noargua,
nega-dulesulidganba be idu-nadapgua,
8 napnega giglimakdegusad, mogir dii-owidegusad,
Sinaí-yala, be-abin giglimakdegusad.
Deyobi, Sinaí-yala Bab-Dummad-abin gusad,
deyobi, Sinaí-yala Israel-e-Bab-Dummad-abin giglimaksad.
9 Bab-Dummad, bedi bela-belad dii-owisagusad,
be-dulamar geggus-danimargua, be e-niga-ogannosad.
10 Bab-Dummad, a-napagine, be-dulamar ambikusad,
dule-wilegedgi be nued-binsaedgi ega napa-nued be nasiksad.
11 Bab-Jehová, e-gayaburba uksad,
omegana mili-milibali (1,000-1,000), a-gayaburba-nued weyob sogmalad:
12 “Reymar duurmakdemalad,
sorda-bila-onomalad duurmakdemalad.
E-isdarmalad-ibe-ibmar-sulesmaladi, omegan e-neggine mimidmalad:
13 Ibmar manigi-sobarmalad, orgi-sobarmalad, mimidmalad.
Ar bemardi unnila sibad-wawaad-abargi meremai gusmalad.”
14 Bab-Dummad-Bela-Gangued-Nikadi, reymar-oakinnaigua,
Salmón-yala-birgi dambed-sibudik-sibudik-batemaibayobi reymar-imaksad.
15 Basán-yalagan, yalagan-dummagan nanaed.
Basán-yalagan-e-billigan matusuli nanaed.
16 Yala-dummagan, ¿ibiga be Bab-Dummad-yala-nug-imaksadgi be nobe itomala?
Ar Bab-Jehová degisadegu agi mai guoed.
17 Bab-Dummad-e-moli-ur-bila-onomaladi, mili-miliba mergued (1,000-1,000).
A-abalagine, Bab-Jehová Sinaí-yalase nonikid,
e-neg-islidikid-yaba dogenonikid.
18 Bab-Dummad-Jehová, niba be nakwisgua, dule-galesmalad beba be sesa gusad.
Dulemar-ibmar-bega-binsa-uksad be susad,
dule-uayasulidamalad-e-ibmar be susad.
Adi, be be-dulamar-abargi gudii guegar.
19 ¡Bab-Jehová-nug odummolesun!
Bab-Dummad-anmar-abonogedi, iba-irbali anmar-bendakmaiguad.
20 Anmar-Bab-Dummadi, dule-bendakmaidid.
Bab-Jehová-Bur-Dule-Dummad burgwed-igargi anmar-onogedid.
21 Bab-Dummad, dule-e-isdarmalad-nonogi annaoed,
e-nono-binsaed-isganabi-sediid ei sagamakoed.
22 Bab-Jehová anmarga sogsad: “Basán-akale, gannar an be-barmidagoed.
Demar-mata-wilaganba gannar-naega an be-imakoed.
23 Be-naga, be-isdarmalad-e-ablisbi-moodo-guega an imakoed.
Be-achumar we-ablis elomaloed.”
24 Bab-Dummad, be-Neg-Islidikidgi dulemar-yaryarmakmamaidi, magar dakleged.
Dule-duurmakmaidi, an-Bab-Dummadgadid, an-Reygad gued.
25 Dule-namakmaladi idumamaid,
a-yalabali, yagana gar-panderetaʼmar ogornadapid,
solaba dule-gar-ogormalad nadapmogad.
26 Danar-bukwadgi Bab-Dummad-nug be odummomalo,
Israel-wagan, Bab-Jehová-nug be ogannomalo.
27 Benjamín-wagan we-dulemar-iduedga nadapid,
amar-yalabali, Judá-dulemar-e-dummagan bukidar nadapmogad,
solanapi, Zabulón-dulemar-e-dummagan,
Neftalí-dulemar-e-dummagan nadapmarmogad.
28 Bab-Dummad, be-gargangued be oyoge,
Bab-Dummad, be anmar-bendakegala be-gangued-oyosgusadi, be oyobali.
29 Bese-goled-neg Jerusalén-neggweburgi-siid-ulale,
reymar bega ibmar ukmaloed.
30 Bab-Dummad, we-ibdula-masarganbalidga sabsuli be ibmar-soge.
Moli-bebe-nikad-machergan-ursilimaladga, ise-sabsuli ega be ibmar soge.
Yarmar-baiganbali, moli-bebe-nikad-sapinganayob-damaladga, ise-sabsuli ega be ibmar soge.
Ibmar-bela-bela-nikubiedba dulemar-sabsuli-imakdiidga, sabsuli be ibmar soge.
¡Dule-bila-onogedgi-binsadimalad be oaisakisun!
31 Egipto-akale, dule-sapin-dummagan danimaloed,
Etiopía-dorgandi, gwae-gwae Bab-Dummadse wilenonimaloed.
32 Napneggi-dule-bukmalad, Bab-Jehováʼga be namakmala.
Namaklegedgi Bab-Dummadga be namakmala.
33 Mogir-negasailaun-nagusmalad-birgi-sii-nanaedga, be namakmala.
E-sunmaked-itogega-dule-imakedga, be namakmala.
E-sunmaked mala-gollomakeyob-goledga, be namakmala.
34 Bab-Dummad-e-gargangued magar be dakmala.
E-ganguedi, Israel-neggweburgi maid.
E-garganguedi, nibneg-akale oyonaid.
35 Bab-Dummad, be-Neg-Islidikidgi, bedi, dule-geger-dakleged maid.
Israel-e-Bab-Dummad, e-neggweburga, gargangued ukedid, niga-gangued ukedid.
¡Bab-Dummad-nug odummolesun!