71
Dador-Babse-goled
(Salmo 31:1-4; 71:1-3)
1 Bab-Jehová, an begi bensulid,
mer bipisaar bingeguega be an-imake.
2 Be-igar-innikigwadba be an-bendake, be an-ollorsae,
wis be an-itoge, be an-bendake.
3 Bee be, an-akwasaila-dukuedga gue,
adi, an ase bali-bali dukudii guegar.
Bedi an-bendakega be igar uksad.
Be an-akwasailaga gued, bedi an-ganguedid.
4 An-Bab-Dummad, dulemar-isgana-e-ganguedgi be an-ollorsae.
Dule-isgudimalad-e-ganguedgi, be an-ollor-imake.
Emar-sabsur-imakmalad-e-ganguedgi be an-ollorsae.
5 Ar bedi, Bab-Dummad-Jehová, an-bendakedid.
Sapingwagwad-akale, an begi bengudisulid.
6 An sapidukugi-mai, be an-akwide gusad.
Bee be, muu-neggi-mai we-napnegse be an-odesad.
A-ulale, degisadegu an be-nug-odummodii guoed.
7 Dulemarga an ibmar-gegerdaklegedyob gued,
ar bedi an-odukued-gandikidid.
8 Bab-Dummad, bali-bali an be-nug odummoged,
be-ganguedgi, be-yeerdaklegedgi an sunmakdii osedoddaed.
9 Bab-Dummadye, an seredgusale, mer be an-obano,
an-gangued bergudele, mer be an-obano.
10 Ar an-isdarmalad angi sunmakmalad,
an-oburgwebimalad na muchub-muchub angi sunmakmalad,
11 weyob sogmalad: “Bab-Dummad we-dulegi bar binsamaisurye.
Anmar baleginmala, ganamala, ar dule-e-bendaked sated.”
12 Bab-Dummadye, mer be angi bangue,
an-Bab-Dummad, gwae be an-bendakdage.
13 An-isdarmalad bingegumarsun, burgwemarsun.
An-oakalobimalad, bela-bela bingegumarsun,
bela-bela oesgudii gumarsun.
14 Ar andi begi degisadegu benguosulid,
bur bule an be-nug-odummodii guoed.
15 Be-Igar-innikigwad, be-abonoleged-igar, amba an wissuli-inigwele,
an egi sunmakdii osedodoed.
16 Bab-Dummad-Jehová, be-ganguedba-be-ibmar-imaksad an sogoed,
be-igar-innikigwad an ebinsaoed,
unnila abi an ebinsaoed.
17 Bab-Dummad, sapingwagwad-akale, be an-odurdaksad,
amba emise-bakale, an be-ibmar-gegerdaklemalad-imaksadgi an sunmakdiid.
18 Bab-Dummad, an-seredgusale, an nono-dableargusale, mer be angi banguo.
Amba dulemar-danimaloedga be-ganguedgi an sunmakbied,
amba yoo-gwalulemaladga be-garganguedgi an sunmakbied.
19 Bab-Dummad, be ibmar-dummagan imaksad,
be-igar-innikigwad nibnegse warmakmaid.
Bab-Dummad, dule beyobid sulid.
20 Bedi, surbinsa-itolegedba galitonai an-imaksad,
wile-itolegedba galitonai an-imaksad.
Degi-inigwele, gannar be an-ogannogoed,
napa-urba-mai gannar be an-odurguoed.
21 An-nug-dummarba be imakoed,
gannar be baisur-itoge an-imakoed.
22 Deyobi, an bega gar-salterioʼba doggus-nuedye sogoed,
An-Bab-Dummad, innikigwadba-be-ibmar-imakedgi gar-arpaʼba an bega namakoed,
Israel-Bab-Dummad, an bega gar-liraʼba namakoed.
23 An bega namakdele, an weligwaledgi bega namakoed,
ar ade, be an-abonosad.
24 Deginbali, be-igar-inniki-imaksadgi an sunmakdii guoed.
An-oakalobimalad nue-bingegusmalad, nug-bipii gusmalad.