3. GARDA-SOGBAAGWAD
73
(Salmos 73:1–89:52)
Dule-isganamar igi berguoe
Asaf we-namaked narmaksad.
1 Ibibayobi, Bab-Dummad Israel-dulemargi nued-binsae,
ibibayob dule-gwage-swilidikmaladgi nueddae.
2 An iche-napinad isguednaganad,
an iche-napinad nue-dummad-noenad.
3 Dule-san-dummarba-imakmaladgi an nobguded,
we-dule-isganamar nasgumai an dakargua, an egi nobguded.
4 We-dulemar gwen boni nikasurmalad,
na san-swilidik gudidimalad.
5 Dulemar-ibmarbina-sogeyob ibmarbina-sogdisurmalad,
dule-baigan-wiledimaladyob, wiledisurmalad.
6 We-dulemar, e-san-dummarba-imaked, wingwa-dukargi-naiyob ise-daklegaled.
E-sabsur-dule-imaked, mor-yoeyobi ise-oyogar damalad.
7 Ibmar-isgana-ulubgi-sediid ise-oyogar damalad,
ibmar-isgana-imaked bakar-buud oyomalad.
8 Dulemar-baigangi sunnasur sunmakdamalad.
Gadi dule-baigangi dododamalad.
Na san-dummarba-imakmaladba aimar-ibgwensur imakmalad.
9 E-sunmakedgi Bab-Dummadgi isdar sunmakdamalad,
e-sunmakedba bela dulemar eba selediid.
10 A-ulale, dulemar ese idaknaddamalad,
ega ibmar-soged bela nabiridbiiye binsadamalad.
11 We-dule-isganamar sogdedamalad: ¿Ar wede, Bab-Dummad wisguosi?
¿Ar wede, Bab-Dummad-Bur-Birigined mag-itogosi?
12 We-dule-isganamar dogdar-alamaknai dasurmalad,
degite, baisursunna mani-ibedga guddamalad.
13 Binsarsunna, an gwage-swilidik gudiid,
binsarsunna, an ibmar-nued imakdiid.
14 Ar emide, sabsur-an-imakdigumalad,
wakudaryalaba an-sarsoardamalad.
15 An weyob sogsana: “We-dule-isganamaryob an sunmakoye.”
An be-mimmigangi aibichanad.
16 An we-ibmarmala magar-itobi gusanad,
suli-suli-itogega an-imaksad, aku an itogusad.
17 Bab-Dummadse-goled-negse an dogsagua,
geb an magar-itosad, igi-dule-isganamar bergumaloe.
18 Bab-Dummad, be we-dulemar bonimar-abargi ogwichisad,
we-dulemar na san-berguedse nadapmalad.
19 ¡Wemar ukiagwar bergudmaloed!
Wemar dobedba bergudmaloed.
20 Bab-Jehová, bedi, igi dule e-gabdaksad napiragwadsulidba baisursunna daknonidae,
deyobi, be gwisgualile, we-dule-isganamar-baisursunna dakoed,
be we-dulemar-obelogoed.
21 Bab-Dummad, suli-suli an itodigua,
an-ulubgi nue-sae an itodii gusad.
22 Ar an ibmar-wissulidbali, gannar-gannar an imaksad,
ibmar-durganyob an gusad.
23 Degi-inigwele, an begi bangussulid,
bee be nue-an-nidii gusad.
24 Be anga binsaed-ukedba an nanadiid.
We-napneg-bergusale, ise-nuedgi be an-abingaoed.
25 ¿Ar doa nibneggi an-edarbemaisunna? Unnila bebi an-edarbemaid.
Ar an beba gudiile, we-napneggi ibmar-baid an abesulid.
26 An-gangued bar nika an itosulid,
degi-inigwele, Bab-Dummad, be an-ganguedid.
Beginbi gudigu an sadeguoed.
27 Dulemar-begi-banguddamaladdi bese berguoed.
Dule-be-sogedba-nanadisurmaladdi bese burgwemaloed.
28 Ar andina, Bab-Dummad-walikaa-gudigued bur nued an itoged.
Be, an-Bab-Jehová gued,
be, an-odukuedid.
Degisoggu, bela be-ibmar-imaksad,
dulemar-baiganga an sogoed.