86
Wile-e-dakega Bab-Dummadse goled
David Bab-Dummadse gornaid.
1 Bab-Jehováʼye, wis be an-itoge,
be an-abin-imake.
Ar ande, dule-wilegedid,
ibmarbina an bela-bela soged.
2 Bab-Dummadye, be an-bendake,
ar ande begala sogedba nanadiid.
Be, an-Bab-Dummadid. An begi bensulid.
Be-mai be bendake.
3 Bab-Jehováʼye, wile-be-an-dake,
ar an bese gordii osedoddaed.
4 Be-nug-odummodiid weligwar be imake,
adi, Bab-Jehová, an bese golegar.
5 Bab-Dummad, be dule-nued gued, isgudsuliyob be emar-dakedid.
Dulemar-bese-gormalad be bela-bela sabed.
6 Bab-Jehováʼye, an bese-gornaid be itoge,
an-wilesagwar-gornaid be itoge.
7 An suli-suli-itogedgi an bese goled,
ar be an-abin-imakdaed.
8 Bab-Jehová, bab-dummagan-beyobid sated,
be-ibmar-imaksadyobi gege ibmar imakmalad.
9 Bela be dulemar-obinnisadi, be-asabin sindigar signonimaloed,
be-nug odummomaloed.
10 Bab-Dummad, ar bebi dummarba-maid,
ar bebi ibmar-gegerdakleged imaked.
¡Ar bebi unnila Bab-Dummad gued!
11 Bab-Jehová, an be-igar-innikigwadba nanadii guega, Be-Igar-Maid be anga oyoge.
Bab-Dummad, an be-nug-odummodii nanaega, be an-gwage ogannoge.
12 An-Bab-Dummad-Jehová, bela-bela an napiragwadgi be-nug odummogoed,
degisadegu, an be-nug odummodii guoed.
13 Ar bela-belad be an-sabed,
degisoggu, burgwega be an-imaksasulid.
14 Bab-Dummad, dulemar-na-san-buled-imakmalad angi gwisgunanaid,
dule-gindakmalad an-oburgwebied.
We-dulemar gwen begi binsasurmalad.
15 Bab-Jehová, bedi dule-nuedid, emar-wiledakedid.
Bedi, baisursunna urwesulidid,
sabgued-dummad-nikadid,
dule-innikigwadbalidid.
16 Bab-Dummad, be an-dake,
wile-be-an-dake.
Be-nug-odummodiidga be-gargangued be uke.
Ome-be-nug-odummodiid-e-machi be bendake.
17 Bab-Dummad, an-isdarmalad dakmalaga,
an-isdarmalad bingegumalaga, be-sabgued be angi oyoge.
Ar be Bab-Jehová, be an-bendakedid, be an-gwage-armakedid.