89
Bab-Dummad Davidʼbo-igar-mesisad
Ezraí-dule-Etán, we-namaked-Masquilʼye-nugad narmaksad.
1 Bab-Jehováʼye, an degisadegu be-sabguedgi namakdii guoed.
An degisadegu bela dulemarga, be-innikidaedgi sunmakdii guoed.
2 An sogdii guoed: Be-sabguedi degisadegu gege berguye.
Be-innikidaedi nibneg-naiyob degisadeguye.
3 Bab-Jehová, be sogsa gusad: “An-dule-susadbo an igar mesisye.
An-mai-Davidʼga an ise-sogar sogsagusye:
4 ‘Be-sorbali, be-wagan degisadegu reyga-megmalaga an imakoye,
be-wagan degisadegu negsemamai an imakoye.’ ”
5 Bab-Jehová, be ibmar-gegerdaklemalad-imaksadba nibnegginmaladi be-nug odummomalad.
Dule-gwage-swilidikmalad-onmakbukwadgi be-innikidaedgi sunmakmalad.
6 Nibneggine, ¿doa Bab-Jehováʼyopira gue? Dule deyobid sate.
Nibnegginmalad-abargi, ¿doa Bab-Jehováʼyob gue? Dule deyobid sate.
7 Dule-gwage-swilidikmalad onmakbukwale, Bab-Dummad-dobee itodamalad.
Bab-Dummad na e-ebiris-bukmaladba bur-dummadid, bur-dutusurbalid.
8 Bab-Dummad-Bela-Gangued-Nika-Maid, ¿doa beyob gue? Dule beyobid sate.
Bab-Jehová, bedi gandikidid, bedi innikidaedid.
9 Bab-Dummad, demar-dagumakmaid be bargaed.
Demar-dummagan-arwemaid be obogileged.
10 Be ibdula-dummad-Rahabʼye-nugad, maataa be oburgwisad.
Bela-bela be gangued-nikadba be-isdarmaladgi be nakwisad.
11 Bab-Jehová, nibneg begadid, napneg begadid.
Be we-napneg-naidi obinnisad, bela egi-ibmar-bukwadi be urbisad.
12 Be dad-nakwed-argan-sapiledsik-yar-bukwad obinnisad,
dad-nakwed-argan-nuedsik-yar-bukwad be obinnisbalid.
Tabor-yar weligwar be-nugga namaked,
Hermón-yar weligwar be-nugga namaked.
13 Bab-Jehová, bela-bela be gangued-nikadba be ibmar-dummagan imaked.
Be-argan-nued be onakwed, ar be emargi obichad.
14 Bab-Jehová, igar-maidba, igar-innikigwadba be negsemaid.
Dule-wiledaked be oyoged,
igar-innikigwad be oyobalid.
15 Bab-Jehová, dulemar weligwaledgi-be-nug-odummomaladgi, nued binsalesad.
Wemar be-sogedba nanadimalad.
16 Be-nuggi wergudii osedoddamalad,
be-igar-innikii-imakedgi wergudimalad.
17 Ar be we-dulemar-e-gangued-e-yeerdakleged gued.
Nued be anmargi-binsaedbali, be anmar-gangued ogannoged.
18 Be, Bab-Jehová, be anmar-sigu-abgaedga gued.
Be, Israel-dulemar-e-reyd, Gwage-Isligwaledid.
19 Ibagwengine, be-dula-gwage-swilidikmaladga be negburgan oyosad,
aba ega be sunmaksad.
Be-dulamar-bega-nued-nanadimaladga be sogsagusad: “An dule-wargwen-buled bendaksad.
Dulemar-abargi dule-bur-emargi-obindiid-e-nug an odummosad.
20 An-mai-David an sunonikid,
reyga-guega an-gwallu-wawad, an e-nonogi eosad.
21 An bendakdii guoed.
An-ganguedgine ogannodii an imakoed.
22 E-isdarmalad egi nakosulid,
dule-isganamar sabsur-imakosulid.
23 An e-isdarmalad obelogoed,
dule-e-isdardakdimaladi an osulogoed.
24 An degisadegu David-sabgudii guoed.
An-nuggine e-gangued dungumai guoed.
25 David, demar-Mediterráneoʼye-nugad-naid-akar,
Éufrates-diwar-maidse neg-gani guoed.
26 Anga sogoed: ‘Be an-baba,
be an-Bab-Dummad-an-abonogedid, be an-edarbedid.’
27 Machi-sailaginedga an imakoed,
bela reymar-baiganba bur dummadga-megega an imakoed.
28 An degisadegu sabgudii guoed,
an-ebo-igar-mesisadi degisadegu-mai guoed.
29 E-wagan e-sorba negsemamai gumaloed,
Igi nibneg degisadegu nai,
deyobi e-wagan degisadegu negsemamai gumaloed.
30 ”Ar e-wagan an-igar-maidgi bangudmalale,
an-igar-maidba nanasurmalale,
31 An-igar-maidgi annadmalale,
an-igar-uksadba ibsasurmalale,
32 e-uayasulidaed-ulale, an sabsur-odurdakoed,
e-isgusad-ulale, an bibyogoed.
33 Degi-inigwele, an David-sabguosuli bipisaale guosulid,
an egi innikidaedi oberguosurbalid.
34 An Davidʼbo-igar-mesisadi an bisgosulid,
an-ibmar-sogsadi an osulogosurbalid.
35 An-nug-islidikid-ular, an unnila irgwennaa ise-sogar imaksad,
an Davidʼga gakansaosulid:
36 David-sorba, e-wagan degisadegu negsemamai gumaloed.
An-asabin, igi dad-ibeler degisadegu-nai,
deyobi, e-wagan degisadegu negsemai gumaloed.
37 Igi nii nibneggi degisadegu-nai,
deyobi, David-e-wagan degisadegu negsemai gumaloed.”
38 Degi-inigwele, Bab-Dummad, be Reyga-guega-dule-susadi, be meted, be obachad,
a-dulegi bela-bela be uluded.
39 Be-maibo be igar-mesisadi be bichisad,
e-wagan-degisadegu-negsemai-guoed e-ibe be obelosad.
40 Bela e-galu-dikar-matusulid e-ibe be omukusad,
e-neg-gandikbukmalad e-ibe be obelosad.
41 Bela dulemar-a-igargi-nasdamaladi, e-ibe ibmar atursadamalad.
Neggweburmar-e-dikarba-bukmalad egi dodomalad.
42 David-e-isdarmalad-e-gangued be ogannosad,
e-isdarmalad weligwar-itogega be imaksad.
43 David-e-es-suid-nugar sate be imaksad,
bila-onogedgine gwen be bendaksasulid.
44 E-gangued-yeerdakleged e-ibe be osulosad,
e-ologana napase e-ibe be meted.
45 E-birga-dulagudigued e-ibe be osikirmaksad,
binged-dummad ega be uksad.
46 Bab-Jehová, ¿wede degisadegu be dukumai guoe?
¿Wede sooyobi be-urwed degisadegu guoe?
47 Bab-Jehová, be insao, an-dula-gudiguedi unnila sikwas gued.
Degisoggu, ¿ibiga be dule-obinnisa?
48 ¿Ar doa burgosuli degisadegu dula gudiguoe?
¿Ar doa burgwedgine wakinnoe?
49 Bab-Jehová, be sabguedsailagined,
be Davidʼga be-innikidaedba ise-sogar-sogsa-gusadi, ¿bia nade?
50 Bab-Jehová, be-maimargi-dodolediid, be ebinsao,
dulemar-bukidar-angi-dodogedi an ulubgi sediid.
51 Bab-Jehová, be-isdarmalad anmargi dodomalad.
Na be dule-susadgi dodomalad.
52 ¡Bab-Jehová-e-nug degisadegu odummolesun!
¡Degisadegu odummolesun!